ലെക്‌സസ് 450d — ഇത് ആഢംബര എസ്‌യുവികളുടെ അവസാന വാക്ക്?

ടൊയോട്ട ലാന്‍ഡ് ക്രൂസറില്‍ നടത്തിയ മിനുക്കുപണി മാത്രമായിരുന്നു 1996 ല്‍ ലെക്‌സസ് ആദ്യമായി അവതരിപ്പിച്ച LX. എന്നാല്‍ കാലത്തിനൊത്ത മാറ്റങ്ങള്‍, LX ന്റെ ആഢംബര മുഖത്തിന് പ്രശോഭയേകി.

ടൊയോട്ട ലാന്‍ഡ് ക്രൂസറില്‍ ലെക്‌സസ് നല്‍കിയ ഫാന്‍സി ബോഡിവര്‍ക്കുകള്‍, LX ന്റെ ഓഫ്‌റോഡിംഗ് കരുത്തിനെ മറച്ച് വെയ്ക്കുന്നതാണ്. അതിനാല്‍ തന്നെ ഓഫ്‌റോഡിംഗിലുപരി, റോഡ് 'പവര്‍പ്ലേ'കളിലാണ് LX ഉപയോഗിക്കപ്പെട്ടിട്ടുള്ളതും.

ഇപ്പോള്‍ ലെക്‌സസ് ഇന്ത്യയില്‍ അവതരിപ്പിച്ചിരിക്കുന്ന LX 450d, പേരും പെരുമയും കാക്കുന്നുണ്ടോ? കണ്ടെത്താം ഇവിടെ-

എക്‌സ്റ്റീരിയര്‍

റോഡ് പ്രസന്‍സിന്റെ കാര്യത്തില്‍ ലെക്‌സസ് LX 450d എതിരാളികളെക്കാല്‍ ബഹുദൂരം മുന്നിലാണ്. എവിടെ ചെന്നാലും LX 450d ശ്രദ്ധ വിളിച്ച് വരുത്തുമെന്നതില്‍ യാതൊരു സംശയവും വേണ്ട.

അഞ്ച് മീറ്ററിലേറെ നീളവും, രണ്ട് മീറ്ററോളം വീതിയുമുള്ള LX 450d യ്ക്ക് മുന്നില്‍ മറ്റ് എസ്‌യുവികള്‍ 'കുള്ളന്മാരായി' മാറുന്നു.

ഫ്രണ്ട് എന്‍ഡില്‍ ലെക്‌സസ് സ്വീകരിച്ചിരിക്കുന്ന കോര്‍പറേറ്റ് സ്പിന്‍ഡില്‍ ഗ്രില്ലാണ് ഡിസൈനിലെ ശ്രദ്ധാകേന്ദ്രം.

ക്രോം ലൈനിംഗ് ലഭിച്ച ഗ്രില്ലിനോട് ചേര്‍ന്ന് ഇടംപിടിച്ചിരിക്കുന്ന എല്‍ഇഡി ഹെഡ്‌ലൈറ്റുകളും, L-shaped ഡെയ്‌ടൈം റണിംഗ് ലൈറ്റുകളും LX 450d യ്ക്ക് മുൻപരിചയമില്ലാത്ത അഗ്രസീവ് ലുക്കാണ് നല്‍കുന്നത്.

വലുപ്പമേറിയ ബമ്പറും, അതില്‍ നല്‍കിയിരിക്കുന്ന ആംഗുലാര്‍ ഫോഗ് ലാമ്പുകളും മോഡലിന്റെ മസ്‌കുലാര്‍ പ്രതീതി വര്‍ധിപ്പിക്കുന്നു. 5 സ്‌പോക്ക് 18 ഇഞ്ച് അലോയ് വീലുകളാണ് വീല്‍ ആര്‍ച്ചുകള്‍ക്ക് കീഴെ ഇടംപിടിക്കുന്നത്.

റിയര്‍ എന്‍ഡിലും ക്രോം ലൈനിംഗില്‍ തീര്‍ത്ത L-shaped എല്‍ഇഡി ടെയില്‍ ലാമ്പുകളാണ് സാന്നിധ്യമറിയിക്കുന്നത്.

ഇന്റീരിയര്‍

നേരത്തെ സൂചിപ്പിച്ചത് പോലെ ആഢംബരം തുളുമ്പുന്ന ഇന്റീരിയറാണ് LX 450d യില്‍ ലെക്‌സസ് ഒരുക്കിയിരിക്കുന്നത്.

മികച്ച കാഴ്ചപരിധിയാണ് ഡ്രൈവര്‍ക്കും ഫ്രണ്ട് സീറ്റ് യാത്രക്കാരനും കാറില്‍ ലഭിക്കുക. എന്നാല്‍ റിയര്‍ സീറ്റുകളില്‍ കുറഞ്ഞ ലെഗ് റൂമാണ് യാത്രക്കാര്‍ക്ക് ലഭിക്കുക.

11.6 ഇഞ്ച് വലുപ്പമുള്ള ഇന്‍ഫോടെയ്ന്‍മെന്റ് ഡിസ്‌പ്ലേയാണ് LX 450d യില്‍ ഇടംപിടിച്ചിരിക്കുന്നത്. ജോയ്‌സ്റ്റിക്കിന് സമാനമായ കണ്‍ട്രോളര്‍ ഉപയോഗിച്ചാണ് ഡിസ്‌പ്ലേ നിയന്ത്രിക്കേണ്ടതും.

19 സ്പീക്കര്‍ മാര്‍ക്ക് ലെവിന്‍സണ്‍ ഓഡിയോ സിസ്റ്റവും ഇന്റീരിയര്‍ ഫീച്ചറുകളില്‍ എടുത്ത് പറയേണ്ടതാണ്. സണ്‍റൂഫും, സെന്റര്‍ കണ്‍സോളില്‍ ലഭിച്ചിരിക്കുന്ന അനലോഗ് ക്ലോക്കുമെല്ലാം ഇന്റീരിയര്‍ ആഢംബരം വിളിച്ചോതുന്നവയാണ്.

സുരക്ഷ

സുരക്ഷാ മുഖത്തും ഏറെ ക്രമീകരണങ്ങള്‍ ലെക്‌സസ് നടത്തിയിട്ടുണ്ട്. 10 എയര്‍ബാഗുകള്‍, ട്രാക്ഷന്‍ കണ്‍ട്രോള്‍, സ്റ്റബിലിറ്റി കണ്‍ട്രോള്‍, എബിഎസ്, ബ്രേക്ക് അസിസ്റ്റ് ഉള്‍പ്പെടുന്നതാണ് LX 450d യിലെ സുരക്ഷ സജ്ജീകരണങ്ങള്‍.

4-ക്യാമറ 360 ഡിഗ്രി മള്‍ട്ടി-ടെറെയ്ന്‍ മോണിറ്ററും, പാര്‍ക്കിംഗ് അസിസ്റ്റും സുരക്ഷയുടെ ഭാഗമായി LX 450d യില്‍ ഇടംപിടിക്കുന്നു.

പെര്‍ഫോര്‍മന്‍സ്

261 bhp കരുത്തും 650 Nm torque ഉം ഉത്പാദിപ്പിക്കുന്ന 4.5 ലിറ്റര്‍ ടര്‍ബ്ബോചാര്‍ജ്ഡ് V8 ഡീസല്‍ എഞ്ചിനിലാണ് LX 450d ഒരുങ്ങിയിരിക്കുന്നത്.

ഫോര്‍-വീല്‍-ഡ്രൈവില്‍ എത്തുന്ന LX 450d യില്‍ 6 സ്പീഡ് ഓട്ടോമാറ്റിക് ഗിയര്‍ബോക്‌സാണ് ലെക്‌സസ് ഉള്‍പ്പെടുത്തിയിരിക്കുന്നത്. ഇക്കോ, നോര്‍മല്‍, സ്‌പോര്‍ട് S, സ്‌പോര്‍ട് S+ എന്നിങ്ങനെ നാല് ഡ്രൈവിംഗ് മോഡുകളാണ് LX 450d യില്‍ ഉള്ളത്.

സ്റ്റീയറിംഗും, ത്രോട്ടിലും, സസ്‌പെന്‍ഷനും അതത് മോഡുകള്‍ക്ക് അനുസൃതമായി പെരുമാറും.

2.9 ടണ്‍ ഭാരത്തിലും 100 കിലോമീറ്റര്‍ വേഗത കൈവരിക്കാന്‍ LX 450d യ്ക്ക് വേണ്ടത് കേവലം 8.6 സെക്കന്‍ഡുകളാണ്. മണിക്കൂറില്‍ 210 കിലോമീറ്ററാണ് LX 450d യുടെ ടോപ്‌സ്പീഡും.

ബോഡി-ഓണ്‍-ഫ്രെയിം ചാസിയ്ക്ക് ഒപ്പമുള്ള അഡാപ്റ്റീവ് വേരിയബിള്‍ സസ്‌പെന്‍ഷന്‍ ദുര്‍ഘടമായ റോഡുകളില്‍ പോലും സുഗമമായ ഡ്രൈവിംഗ് ഉറപ്പ് വരുത്തുന്നു.

വളവുകളില്‍ ബോഡിറോള്‍ (Body Roll) അനുഭവപ്പെടുമെങ്കിലും സ്‌പോര്‍ട് മോഡില്‍ ഇത് അനുഭവപ്പെടുന്നില്ല എന്നതും ശ്രദ്ധേയം.

LX 450d ?

2.32 കോടി രൂപ വിലയിലാണ് ലെക്‌സസ് LX 450d ഇന്ത്യന്‍ വിപണിയില്‍ എത്തുന്നത്. ലാന്‍ഡ് ക്രൂസറുമായി താരതമ്യം ചെയ്യുമ്പോള്‍, ഒരു കോടി രൂപയുടെ വ്യത്യാസത്തിലാണ് LX 450d നിലകൊള്ളുന്നതും.

എന്നാല്‍ വ്യത്യസ്തമായ റോഡ് അനുഭവവും, അണുവിട പതറാത്ത സുരക്ഷയുമാണ് നിങ്ങള്‍ ആഗ്രഹിക്കുന്നത് എങ്കില്‍ LX 450d മികച്ച ഒരു ഓപ്ഷനാണ്.