ഹോണ്ട ബിആർവി പ്രോട്ടോടൈപ്പ് ചിത്രം പുറത്ത്

By Santheep

Published: Saturday, August 22, 2015, 16:57 [IST]

ഇന്ത്യ അടക്കമുള്ള വിപണികളിൽ അധികാരം സ്ഥാപിക്കാൻ ആഗ്രഹിക്കുന്ന ഏതൊരു കാർനിർമാതാവും കയറിയിരിക്കേണ്ട ചില സെഗ്മെന്റുകളുണ്ട്. ചെറു ഹാച്ച്ബാക്കുകൾ, കോംപാക്ട് സെഡാനുകൾ, കോംപാക്ട് എസ്‌യുവികൾ എന്നിവയാണവ. ഹോണ്ട ഈ സെഗ്മെന്റുകളിലേക്കെല്ലാം പതുക്കെപ്പതുക്കെ കയറിക്കൊണ്ടിരിക്കുകയാണ്. ഇതിനകം തന്നെ കോംപാക്ട് സെഡാൻ വിഭാഗത്തിൽ സാന്നിധ്യമായിത്തീർന്ന ഹോണ്ട ഇനി കോംപാക്ട് എസ്‌യുവി വിഭാഗത്തിലേക്കാണ് കയറാൻ പോകുന്നത്. ഇതിനായി തയ്യാറാക്കിയിട്ടുള്ള വാഹനമാണ് ബിആർവി എന്ന പേരിലറിയപ്പെടുന്നത്.

നിലവിൽ ഹോണ്ടയുടെ പക്കൽ കോംപാക്ട് എസ്‌യുവി മോഡലുകളൊന്നുമില്ല. ഈ സെഗ്മെന്റ് അനുദിനം വളർന്നുകൊണ്ടിരിക്കുകയാണ്. ബിആർവി കൺസെപ്റ്റ് ചിത്രങ്ങൾ ഹോണ്ട നേരത്തെ തന്നെ പുറത്തുവിട്ടിരുന്നു. ഈ വാഹനത്തിന്റെ പ്രോട്ടോടൈപ്പ് ചിത്രം പുറത്തിവിട്ടിരിക്കുകയാണ് ഹോണ്ട ഇപ്പോൾ. താഴെ ചിത്രങ്ങൾ കാണാം.

ഹോണ്ട ബിആർവി പ്രോട്ടോടൈപ്പ് ചിത്രം പുറത്ത്

ഹോണ്ട ബ്രിയോയുടെ പ്ലാറ്റ്ഫോമിലാണ് ബിആർവി കൺസെപ്റ്റ് നിർമിച്ചിരിക്കുന്നത്. ബ്രിയോയുടെ പ്ലാറ്റ്ഫോമിൽ നിർമിക്കപ്പെട്ട അമേസ് സെഡാൻ ഇന്ത്യയിൽ മികച്ച നിലയിൽ വിറ്റുപോകുന്നുണ്ട്. ഈ കൺസെപ്റ്റിന്റെ പ്രോട്ടോടൈപ്പാണ് ചിത്രത്തിൽ കാണുന്നത്.

ഈ പുതിയ സെഗ്മെന്റിൽ ഹോണ്ടയ്ക്ക് വാഹനങ്ങളൊന്നുമില്ല. വിപണിയിൽ മറ്റ് കാർ നിർമാതാക്കളെ അപേക്ഷിച്ച് സ്ഥിരതയുള്ള വളർച്ച പ്രകടിപ്പിക്കുന്ന ബ്രാൻഡാണ് ഹോണ്ട. മത്സരത്തിൽ പിടിച്ചുനിൽക്കാൻ ഹോണ്ടയ്ക്കും വേണം ഒരു ചെറു യൂട്ടിലിറ്റി എന്നതാണ് കാര്യം.

2015 ഇന്തോനീഷ്യൻ മോട്ടോർഷോയിൽ അവതരിപ്പിക്കാനൊരുങ്ങുന്ന ബിആർ-വി കോംപാക്ട് എസ്‌യുവി കൺസെപ്റ്റിന്റെ ഏതാണ്ട് ഉൽപാദനത്തോടുത്ത മോഡലിന്റെ ചിത്രമാണ് പുറത്തുവന്നിട്ടുള്ളത്.

ഓഗസ്റ്റ് 20നും 30നും ഇടയിലുള്ള ദിവസങ്ങളിലാണ് ബിആർവി ഇന്തോനീഷ്യൻ മോട്ടോർഷോയിൽ അവതരിപ്പിക്കുക. ഇന്തോനീഷ്യയിലെ ടാങ്ഗരാംഗിലാണ് ഈ മോട്ടോർഷോ നടക്കുന്നത്.

ബോൾഡ് റൺഎബൗട്ട് വെഹിക്കിൾ എന്നാണ് ബിആർവി എന്നാലർഥം. റിനോ ഡസ്റ്റർ, നിസ്സാൻ ടെറാനോ, ഫോഡ് ഇക്കോസ്പോർട്, ഹ്യൂണ്ടായ് ക്രെറ്റ, മഹീന്ദ്ര ടിയുവി300 എന്നീ എതിരാളികളാണ് ബിആർവിക്കുള്ളത്. മാരുതിയുടെ പുതിയ എസ് ക്രോസ്സും ഈ ഗണത്തിൽ പെടുന്നു. കത്തിപ്പടരുന്ന മത്സരത്തിലേക്കാണ് ബിആർവി വരുന്നത്.