ലോകത്തിലെ ഏറ്റവും സുരക്ഷിതമായ കാര്‍ ഇന്ത്യയിലെത്തി

ഭൂമിയിലെ ഏറ്റവും സുരക്ഷിതമായ ആഡംബര വാഹനമാണിതെന്ന് മെഴ്‌സിഡിസ് അവകാശപ്പെടുന്നു.

ഇന്ത്യയില്‍ വളര്‍ന്നുവരുന്ന നവ ബിസിനസ്സ് ഭീമന്മാരെയാണ് മെഴ്‌സിഡിസ് ലക്ഷ്യം വെക്കുന്നത്. തോക്കുകള്‍, സ്‌ഫോടകവസ്തുക്കള്‍ തുടങ്ങിയവയില്‍ നിന്ന് പൂര്‍ണമായും സംരക്ഷണം നല്‍കുന്നവയാണ് എസ്600 ഗാര്‍ഡ് കാറുകള്‍.

ഇന്ത്യയില്‍ 8.9 കോടി രൂപയാണ് ഈ കാറിന് വില. ദില്ലി എക്‌സ്‌ഷോറൂം നിരക്ക് പ്രകാരമാണിത്.

ഒരു 6.0 ലിറ്റര്‍, വി12 പെട്രോള്‍ എന്‍ജിനാണ് വാഹനത്തില്‍ ഘടിപ്പിച്ചിരിക്കുന്നത്. 530 പിഎസ് കരുത്തുല്‍പാദിപ്പിക്കാന്‍ ഈ എന്‍ജിന് ശേഷിയുണ്ട്. 830 എന്‍എം ചക്രവീര്യം.

കാറിന്റെ ആകെ ഭാരം 4 ടണ്ണാണ്. ഓരോ വിന്‍ഡോയ്ക്കും 80 കിലോഗ്രാം ഭാരമുണ്ട്. ഓരോ ഗ്ലാസ്സും 65 മില്ലിമീറ്റര്‍ തടിയുള്ളവയാണ്.

കര്‍ശനമായ നിരവധി ടെസ്റ്റുകള്‍ നടത്തിയാണ് ഈ കാറിന്റെ അവസാന ഉല്‍പാദനരൂപം തീരുമാനിക്കപ്പെടുന്നത്. പൂര്‍ണമായും ആയുധപ്രതിരോധശേഷിയില്‍ നിര്‍മിച്ച വാഹനത്തിന്റെ അടിഭാഗം സ്‌ഫോടനങ്ങളില്‍ പോലും തകരില്ല. വിവിധ തരത്തിലുള്ള ആയുധങ്ങള്‍ ഈ വാഹനത്തില്‍ ടെസ്റ്റ് ചെയ്യപ്പെട്ടിട്ടുണ്ട്.