ഓര്‍മയുണ്ടോ ആ പ്രീമിയര്‍ പദ്മിനിക്കാലം?

താളുകളിലൂടെ നീങ്ങുക.

പ്രീമിയം ഓട്ടോമൊബൈല്‍സ് ലിമിറ്റര്‍ (പിഎഎല്‍) ആണ് പ്രീമിയര്‍ പദ്മിനിയെ ഇന്ത്യന്‍ നിരത്തുകളില്‍ എത്തിക്കുന്നത്. ഫിയറ്റ് 100 ഡി എന്ന ചെറുകാറിനെ ആധാരമാക്കി നിര്‍മിച്ച വാഹനമാണിത്. ഇറ്റാലിയന്‍ ഡിസൈനിലുള്ള പദ്മിനിയെ ഇന്ത്യ ഇരുകൈയും നീട്ടി സ്വീകരിച്ചു. അംബാസ്സഡര്‍ കാറുകള്‍ നിറഞ്ഞിരുന്ന ഇന്ത്യയുടെ പാതകളില്‍ ആദ്യമായി വ്യത്യസ്തത കൊണ്ടുവരുന്നത് പദ്മിനിയാണ്. 1964ലാണ് ഇതെല്ലാം സംഭവിച്ചത്.

പ്രീമിയര്‍ പദ്മിനിയെ ഓര്‍ക്കുമ്പോള്‍ ശരാശരി മെയ്ല്‍ ഷൗവനിസ്റ്റ് മലയാളി പുരുഷന് ബ്ലാക്ക് ആന്‍ഡ് വൈറ്റ് കാലത്തെ ഒരു പാവാടക്കാരിയെ ഓര്‍മ വരുന്നുവെങ്കില്‍ കുറ്റം പറയാനൊക്കില്ല. കുറഞ്ഞ എന്‍ജിന്‍ ശേഷി, 4 സ്പീഡ് മാന്വല്‍ ഗിയര്‍ബോക്‌സ്, ബലം കുറഞ്ഞ ശരീരം തുടങ്ങിയവ ചൂണ്ടിക്കാണിക്കും അവര്‍. എന്നാല്‍, ഈ വാഹനം റേസിങ്ങുകളില്‍ പങ്കെടുത്തിട്ടുണ്ട് എന്നറിയുമ്പോഴോ? ചെന്നൈയിലും മറ്റും നടന്നിരുന്ന റേസിങ്ങുകളില്‍ സജീവമായിരുന്നു ഈ കാര്‍.

കാറിനകം വളരെ 'കാര്യമാത്രപ്രസക്ത'മായിട്ടാണ് സജ്ജീകരിച്ചിരുന്നത്. അടിസ്ഥാനപരമായ ആവശ്യങ്ങള്‍ മാത്രം നിര്‍വഹിക്കാനുള്ള സന്നാഹങ്ങളാണ് ഡാഷ്‌ബോര്‍ഡില്‍ സജ്ജീകരിച്ചിരുന്നത്. ഉയരം കൂടിയ ഡ്രൈവര്‍മാരുടെ വലതുകൈ വിന്‍ഡോയിലൂടെ പുറത്തു കിടക്കുന്നത് ചിലരെങ്കിലും കണ്ടിരിക്കും.

80കളുടെ അവസാനം വരെ പ്രീമിയര്‍ പദ്മിനിയുടെ പ്രതാപം നിലനിന്നു. 91ല്‍ മന്‍മോഹന്‍ സിങ്ങിന്റെ കാര്‍മികത്വത്തില്‍ ഇന്ത്യയില്‍ സാമ്പത്തിക ഉദാരീകരണം നടപ്പാക്കിത്തുടങ്ങി. വിദേശ കാര്‍നിര്‍മാതാക്കള്‍ ഇന്ത്യയില്‍ സജീവമാകുന്നത് ഈ കാലയളവിലാണ്. വന്‍തോതില്‍ നിക്ഷേപം വന്നുതുടങ്ങിയതോടെ പഴക്കം ചെന്ന സാങ്കേതികതയിലുള്ള പദ്മിനി പതുക്കെ പിന്‍വാങ്ങിത്തുടങ്ങി. വാഹനത്തില്‍ മാറ്റങ്ങള്‍ വരുത്തി പിടിച്ചു നില്‍ക്കാന്‍ പ്രീമിയര്‍ ശ്രമിക്കുകയുണ്ടായി. ഗിയര്‍ഷിഫ്റ്ററിന്റെ സ്ഥാനം താഴേക്കു മാറ്റി. ബഞ്ച് സീറ്റുകള്‍ മാറ്റി ബക്കറ്റ് സീറ്റുകള്‍ ഘടിപ്പിച്ചു. പുതിയ പെട്രോള്‍, ഡീസല്‍ എന്‍ജിനുകള്‍ നിസ്സാനില്‍ നിന്നും വാഹ്ങി ഘടിപ്പിച്ചു. പക്ഷേ, കാര്യമായ ഫലമൊന്നും കണ്ടില്ല. വാഹനത്തിന്റെ ഉല്‍പാദനം 1997ല്‍ നിലച്ചു.

ഇന്ന് ഏറ്റവുമധികം പ്രീമിയര്‍ പദ്മിനി കാറുകള്‍ കാണാന്‍ കഴിയുക മുംബൈയിലാണ്. കുര്‍ളയില്‍ പ്രീമിയറിന്റെ ഒരു നിര്‍മാണ പ്ലാന്റ് ഉണ്ടായിരുന്നു. മുംബൈയില്‍ പ്രീമിയര്‍ കാറുകള്‍ ഇത്രയധികം കാണുന്നതിനാ കാരണം ഇതാവാം. കരിമ്പുകച്ചട്ടങ്ങള്‍ കര്‍ശനമായിത്തുടങ്ങിയ ഇന്നത്തെ സാഹചര്യത്തില്‍ ഈ വാഹനത്തെ ഇനി അധികകാലം നിരത്തില്‍ കാണാന്‍ കഴിയില്ലെന്നാണ് കരുതേണ്ടത്.

ഫിയറ്റിന്റെ 1100-103 മോഡലില്‍ നിന്നാണ് പദ്മിനിയുടെ ജനനം. ഇന്ത്യയിലേക്ക് ഈ വാഹനം ഇറക്കുമതി ചെയ്തിരുന്നു. പ്രീമിയര്‍ തന്നെയായിരുന്നു ഇതിനു പിന്നിലും ഇപ്പോള്‍ ഈ വാഹനം കാര്‍ കലക്ടര്‍മാരുടെ പ്രിയം നേടിയിരിക്കുന്നു.