ഇന്ത്യ കാത്തിരുന്ന സ്പോർട്സ് കാർ 'ഗോഡ്‌സില്ല' വന്നെത്തി; വില 1.99കോടി

ഓക്ടോബർ മാസം തന്നെ ഈ സൂപ്പർകാറിനുള്ള ബുക്കിംഗ് ആരംഭിച്ചിരുന്നു. 25 ലക്ഷം അഡ്വാൻസ് തുക നൽകിയായിരുന്നു പ്രീ ബുക്കിംഗ് നടത്തിയിരുന്നത്.

ആഗോള വിപണിയിൽ 2007 ലായിരുന്നു ആദ്യമായി നിസാന്റെ ഈ ഫ്ലാഗ്ഷിപ്പ് മോഡൽ അരങ്ങേറിയത്. എന്നാലിത് മൂന്നാം തവണയാണ് മുഖം മിനുക്കി വീണ്ടുമെത്തുന്നത്.

നിസ്സാന്റെ പ്രകടനക്ഷമതയ്ക്കുള്ള ഉത്തമ ഉദാഹരണാണ് ജി ടി-ആർ. ഈ പുതിയ കാറാവട്ടെ കൂടുതൽ കരുത്തുറ്റതും ആഡംബര സമൃദ്ധവുമാണ്. അതുകൊണ്ട് തന്നെ ഇന്ത്യയിലെ സൂപ്പർകാർ പ്രേമികളുടെ മനം കവരാൻ പുതിയ ജിടി-ആറിന് സാധിക്കുമെന്ന് കമ്പനി ഉറച്ചു വിശ്വസിക്കുന്നു.

യൂറോപ്പ്യൻ വിപണിയിലേക്കായി നിർമിച്ച പ്രീമിയം എഡിഷൻ ജി ടി-ആർ ആണിപ്പോൾ ഇന്ത്യയിലെത്തുന്നത്.

ഏറ്റവും മികച്ച പരിഷ്കാരങ്ങളോടെ പുറത്തിറങ്ങിയ ജിടി-ആറിന്റെ പുതിയ രൂപകല്പനയും, ആഡംബരത്വം തുളമ്പുന്ന അകത്തളവും, മികച്ച സൗകര്യങ്ങളും, ഉയർന്ന ഡ്രൈവിംഗ് അനുഭൂതിയുമാണ് ഈ കാറിനെ മികവുറ്റതാക്കുന്നത്.

ഗോഡ്സില്ല എന്ന വിളിപ്പേരുള്ള നിസാൻ ജിടി-ആറിന് കരുത്തേകാൻ 3.8ലിറ്റർ ട്വിൻ-ടർബോചാർജ്ഡ് വി6 എൻജിനാണ് ഉപയോഗിച്ചിരിക്കുന്നത്. 562 ബിഎച്ച്പിയും 637എൻഎം ടോർക്കും നൽകുന്ന എൻജിനിൽ 6 സ്പീഡ് ഇരട്ട ക്ലച്ച് ഓട്ടോമാറ്റിക് ഗിയറും ഉൾപ്പെടുത്തിയിട്ടുണ്ട്.

നിശ്ചലാവസ്ഥയിൽ നിന്ന് 100 കിലോമീറ്റർ വേഗത കൈവരിക്കാൻ വെറും മൂന്ന് സെക്കന്റു മാത്രം മതി ഈ കരുത്തൻ ജിടി-ആറിന്.

ക്രോം ഫിനിഷിങില്‍ വി ആകൃതിയിൽ നൽകിയിട്ടുള്ള ഗ്രില്‍ വാഹനത്തിന്റെ ആഡംബരം വിളിച്ചോതുന്ന മറ്റൊരു ഘടകമാണ്. കാറിന്റെ പുറമെയുള്ള നിറത്തോട് കിടപിടിക്കുന്ന തരത്തിലുള്ള ലെതറാണ് അകത്തളത്തിൽ ഉപയോഗിക്കുന്നത് എന്നതാണ് മറ്റൊരു പ്രത്യേകത.

പുതുക്കിയ ഹെഡ്‌ലാമ്പ്, ആൻഗുലാർ എയർവെന്റ്, ഡെ ടൈം റണ്ണിംഗ് ലാമ്പുകൾ, 20 ഇഞ്ച് വൈ-സ്പോക് അലോയ് വീലുകൾ എന്നിവയാണ് മുൻഭാഗത്തെ മറ്റു സവിശേഷതകളായി പറയാവുന്നത്.

വൃത്താകൃതിയിലുള്ള ടെയിൽലാമ്പുകളാണ് പിൻഭാഗത്തെ ഏറെ ആകർഷകമാക്കുന്നത്. ബംബറിന്റെ ഇരുഭാഗത്തുമായുള്ള ക്വാഡ് എക്സോസ്റ്റുകൾ, സ്പോയിലർ എന്നിവയാണ് മറ്റ് പ്രത്യേകതകൾ.

ലെതർ സീറ്റ്, 8 ഇഞ്ച് ടച്ച് സ്ക്രീൻ ഇൻഫോടെയിൻമെന്റ് സിസ്റ്റം, പാഡൽ ഷിഫ്റ്റ് ഉൾപ്പെടുത്തിയിട്ടുള്ള സ്റ്റിയറിംഗ് വീൽ എന്നിവയാണ് അകത്തളത്തിലെ പുതുമകൾ.

കാറ്റ്സുര ഓറഞ്ച്, വൈബ്രന്റ് റെഡ്, അള്‍ട്ടിമേറ്റ് സില്‍വര്‍, പേള്‍ ബ്ലാക്ക്, സ്റ്റോം വൈറ്റ്, ഡേടോണ ബ്ലൂ, ഗണ്‍ മെറ്റാലിക് എന്നീ ഏഴു നിറങ്ങളിലായിരിക്കും ഈ സൂപ്പർ കാർ ഇന്ത്യയിൽ ലഭ്യമാവുക.

നിസാൻ ജിടി-ആറിനെ വെല്ലാൻ ഓഡി ആർ8 വി10, പോഷെ911 ടർബോ കാറുകളാണ് വിപണിയിൽ നിലയുറപ്പിച്ചിട്ടുള്ളത്.