പോളാരിസിൻറെ ഓഫ്-റോഡ് ആംബുലൻസ്

ഇന്ത്യയില്‍ ഇനിയും അടിസ്ഥാന സൗകര്യങ്ങള്‍ എത്തിയിട്ടില്ലാത്ത ഗ്രാമങ്ങള്‍ നിരവധിയാണ്. മറ്റൊന്ന് തീര്‍ത്ഥാടനങ്ങള്‍ക്കും മറ്റുമായി മല കയറുന്നവരുടെ എണ്ണവും അധികരിച്ചുവരികയാണ്. ഈ സാഹചര്യത്തില്‍ പോളാരിസ്സിന്റെ നീക്കം തികച്ചും തന്ത്രപരവും പ്രശംസനീയവുമാണ്.

പോളാരിസ് റെയ്ഞ്ചര്‍ 6X6 800-നെ മോഡിഫൈ ചെയ്താണ് ഈ ആംബുലന്‍സ് നിര്‍മിച്ചിരിക്കുന്നത്. ഏറ്റവും ദുഷ്‌കരമായ പരുക്കന്‍ പാതകളില്‍ മികച്ച പ്രകടനം നടത്താന്‍ ശേഷിയുള്ള എടിവിയാണ് റെയ്ഞ്ചര്‍ 6X6 800.

ഇന്ത്യയുടെ നിലവിലുള്ള സാഹചര്യങ്ങള്‍ വലിയ തോതില്‍ ആവശ്യപ്പെടുന്ന തരം ആംബുലന്‍സാണ് തങ്ങള്‍ നിര്‍മിച്ചിരിക്കുന്നതെന്ന് പോളാരിസ് ഇന്ത്യ എംഡി പങ്കജ് ദുബേ പറയുന്നു.

1 ടണ്‍ ഭാരമുള്ള വസ്തുക്കള്‍ വലിച്ചു കൊണ്ടുപോകുവാനും 566.99 കിലോഗ്രാം ഭാരമുള്ളവ ഏറ്റിക്കൊണ്ടുപോകുവാനും ശേഷിയുള്ള എടിവിയാണ് പോളാരിസ് റെയ്ഞ്ചര്‍ 6X6 800. 760സിസി ശേഷിയുള്ള ഈ എടിവിയുടെ എന്‍ജിന്‍ 40 കുതിരകളുടെ കരുത്ത് പുറത്തെടുക്കുന്നു. ഒരു സ്വിച്ചിന്റെ സഹായത്താല്‍ 4 വീല്‍ ഡ്രൈവിലേക്കും 6 വീല്‍ ഡ്രൈവിലേക്കും എളുപ്പത്തില്‍ മാറുവാന്‍ ഈ വാഹനത്തെ സന്നാഹപ്പെടുത്തിയിരിക്കുന്നു.