നിയന്ത്രണം വിട്ട കാറിനെ പിടിച്ച് നിര്‍ത്തിയ 'സൂപ്പര്‍ഹീറോ'; വീഡിയോ വൈറല്‍

എന്നാല്‍ അപ്രതീക്ഷിത സാഹചര്യത്തില്‍ സൂപ്പര്‍ ഹീറോ പരിവേഷം ലഭിച്ചാലോ? അമേരിക്കന്‍ സ്വദേശി രാണ്ടി ടോംകിന്‍സിന് ലഭിച്ചിരിക്കുന്നത് ഇത്തരത്തിലുള്ള ഒരു പരിവേഷമാണ്.

ഡ്രൈവര്‍ അബോധാവസ്ഥയിലായതിനെ തുടര്‍ന്ന് നിയന്ത്രണം വിട്ട കാറിലേക്ക് കുതിച്ച് ചാടി വാഹനത്തെ നിര്‍ത്തിയ രാണ്ടി ടോംകിന്‍സ്, സോഷ്യല്‍ മീഡിയയില്‍ താരമായിരിക്കുകയാണ്.

പിന്നിലുണ്ടായിരുന്ന പൊലീസ് കാറിലെ ഡാഷ്‌ബോര്‍ഡ് ക്യാമറയിലൂടെയാണ് ടോംകിന്‍സിന്റെ ധീരകൃത്യം പുറംലോകം അറിയുന്നത്.

ഡിക്‌സോണ്‍ പൊലീസിന്റെ റിപ്പോര്‍ട്ട് പ്രകാരം, ഡ്രൈവര്‍ക്ക് ശാരീരിക അസ്വാസ്ഥ്യത സംഭവിച്ചതാണ് കാറിന്റെ നിയന്ത്രണം നഷ്ടപ്പെടാന്‍ കാരണമെന്ന് വ്യക്തമാക്കുന്നു.

ടോംകിന്‍സിന്റെ സമയോചിത ഇടപെടല്‍ വലിയ അപകടം ഒഴിവാക്കിയെന്നും റിപ്പോർട്ട് കൂട്ടിച്ചേർക്കുന്നു.

ജൂണ്‍ 3 ന് ഡിക്‌സോണ്‍ പൊലീസ് തന്നെയാണ് വീഡിയോ പുറത്ത് വിട്ടത്. ട്രാഫിക് ജംങ്ഷന്‍ കടന്നതിന് ശേഷം നീല നിറത്തിലുള്ള കാർ അസ്വഭാവികത കാണിക്കുകയായിരുന്നു.

ട്രാഫിക് നിയമങ്ങള്‍ ലംഘിച്ച കാര്‍, ഒരു അവസരത്തില്‍ മറ്റ് വാഹനങ്ങളുടെ നേര്‍ക്ക് സഞ്ചരിച്ചതായും വീഡിയോ വ്യക്തമാക്കുന്നു.

എതിര്‍ദിശയില്‍ വരുന്ന വാഹനങ്ങളിലേക്ക് ചെന്ന് കയറാന്‍ ഭാവിച്ച കാറിലേക്കാണ് ടോംകിന്‍സ് ചാടി വീണത്. ഡ്രൈവര്‍ അബോധാവസ്ഥയിലാണെന്ന് മനസിലായതിനെ തുടര്‍ന്നാണ് താന്‍ കാറില്‍ ചാടി വീണതെന്ന് ടോംകിന്‍സ് വ്യക്തമാക്കി.

എന്തായാലും സംഭവത്തിന് ശേഷം രാണ്ടി ടോംകിന്‍സിന് സൂപ്പർഹീറോ പരിവേഷമാണ് ലഭിക്കുന്നത്.