തെലങ്കാന മുഖ്യമന്ത്രിയുടെ 5 കോടിയുടെ കാരവാന്‍ വിവാദമാകുന്നു

By Santheep

Updated: Friday, July 3, 2015, 17:13 [IST]

തെലങ്കാന മുഖ്യമന്ത്രി കെ ചന്ദ്രശേഖര റാവുവിന് വിവാദങ്ങളാണ് അത്താഴത്തിന് സൈഡ് ഡിഷ്. രാഷ്ട്രീയ ജീവിതത്തിന്റെ വലിയൊരു പങ്കും വിവാദങ്ങളുമായി കഴിഞ്ഞ കെ ചന്ദ്രശേഖരറാവു തെലങ്കാന സംസ്ഥാനത്തിന്റെ മുഖ്യമന്ത്രിയായതിനു ശേഷവും ഇത് തുടരുകയാണ്.

പുതിയ വിവാദം ഇദ്ദേഹം ഒരു വാന്‍ വാങ്ങിയതിനെച്ചൊല്ലിയാണ്. 5 കോടി രൂപയാണ് ഈ വാനിനു വില!

തെലങ്കാന മുഖ്യമന്ത്രിയുടെ 5 കോടിയുടെ കാരവാന്‍

അഞ്ച് കോടി രൂപയുടെ വാനിറ്റി വാനാണ് തെലങ്കാന മുഖ്യമന്ത്രി കെ ചന്ദ്രശേഖരറാവു വാങ്ങിയിരിക്കുന്നത്. തെലങ്കാനക്കാരുടെ ചിരകാലാഭിലാഷമായ സംസ്ഥാനപദവി നേടിക്കൊടുത്ത നേതാവാണിദ്ദേഹം.

ബുള്ളറ്റ് പ്രൂഫുള്ള വാനാണ് ചന്ദ്രശേഖരറാവു വാങ്ങിയിരിക്കുന്നത്. സംസ്ഥാനത്ത് ഇദ്ദേഹം നടത്താനിരിക്കുന്ന പ്രചാരണ യാത്രകള്‍ക്കാണ് ഈ വാന്‍ ഉപയോഗിക്കുക. വധിക്കപ്പെടാന്‍ വരെ തനിക്കുള്ള യോഗ്യതയെ പുരസ്‌കരിച്ചാണ് മുഖ്യമന്ത്രി വാന്‍ സ്വന്തമാക്കിയിരിക്കുന്നതെന്ന് കേള്‍ക്കുന്നു.

അത്യാധുനിക സാങ്കേതികതകള്‍ ഉപയോഗിച്ചാണ് ഈ ബസ്സ് നിര്‍മിച്ചിരിക്കുന്നത്. ജെസിബിഎല്‍ ആണ് ബസ്സ് നിര്‍മിച്ചു നല്‍കിയത്.

സിനിമാതാരങ്ങളും മറ്റും ഉപയോഗിച്ചുവരുന്ന 'കാരവാന്‍' ശൈലിയിലാണ് വാഹനം നിര്‍മിച്ചിരിക്കുന്നത്. ഈ വാനില്‍ കുറച്ചധികം പേര്‍ക്ക് ഇരുന്ന് സഞ്ചരിക്കാനുള്ള ഇടംകൂടി നല്‍കിയിട്ടുണ്ടെന്നു മാത്രം.

ബുള്ളറ്റുകളെ മാത്രമല്ല, ചെറിയ ഷെല്ലാക്രമണങ്ങള്‍ തുടങ്ങിയവയെയും ചെറുത്തു നില്‍ക്കാന്‍ ഈ വാനിന് സാധിക്കും. നിലവില്‍ ഹെലികോപ്റ്ററിലാണ് റാവു ഉദ്ഘാടനങ്ങള്‍ക്കും മറ്റും സംസ്ഥാനത്തിന്റെ വിവിധ ഭാഗങ്ങളില്‍ പോകുന്നത്.