പ്യാജിയോ വെസ്പ എലഗന്റ് മോഡല്‍ ഇന്ത്യയിലേക്ക്

പ്യാജിയോ വെസ്പയുടെ പുതിയൊരു രൂപം കൂടി ഇന്ത്യന്‍ വിപണിയിലെത്തുന്നു. പ്യാജിയോ വെസ്പ എലഗന്റ് മോഡലാണ് രാജ്യത്ത് ലോഞ്ച് ചെയ്യാനൊരുങ്ങുന്നത്. വരുന്ന ദീപാവലി സീസണില്‍ ഈ വാഹനം നിരത്തുകളിലെത്തും.

വെസ്പ വിഎക്‌സിന്റെ അതേ പ്ലാറ്റ്‌ഫോമില്‍ നിലപാടുറപ്പിച്ചിട്ടുള്ള മോഡലാണിത്. വിഎക്‌സില്‍ നിന്ന് വേറിട്ടുനില്‍ക്കുന്ന ഡിസൈന്‍ മാറ്റങ്ങള്‍ ഈ വാഹനത്തിനുണ്ട്. ലോകവിപണികളില്‍ പലയിടത്തും ലഭ്യമായിട്ടുള്ള വെസ്പ പ്രൈമാവേറ മോഡലിന്റെ ഡിസൈന്‍ സവിശേഷതകള്‍ പലതും കടംകൊണ്ടാണ് എലഗന്റ് മോഡലിനെ രൂപപ്പെടുത്തിയിട്ടുള്ളത്. ചിത്രത്തില്‍ കാണുന്നത് പ്രൈമാവേറ മോഡലാണ്.

സ്പ്ലിറ്റ് സീറ്റുകള്‍, ത്രികോണാകൃതിയിലുള്ള ഗ്രില്ലുകള്‍ തുടങ്ങിയ ഡിസൈന്‍ സവിശേഷതകള്‍ ഈ മോഡലിനുണ്ടായിരിക്കും. പേള്‍ വൈറ്റ്, മറാക്കേഷ് ബ്രൗണ്‍ എന്നീ നിറങ്ങളില്‍ വെസ്പ എലഗന്റ് ലഭ്യമാകും.

125സിസി ശേഷിയുള്ള 3 വാല്‍വ്, ഫോര്‍ സ്‌ട്രോക്ക് എന്‍ജിനാണ് എലഗന്റ് മോഡലില്‍ ഘടിപ്പിച്ചിട്ടുള്ളത്. 10 പിഎസ് കരുത്തും 10.06 എന്‍എം ചക്രവീര്യവും പകരാന്‍ ഈ എന്‍ജിന് സാധിക്കുന്നു. മുന്‍വശത്ത് ഡിസ്‌ക് ബ്രേക്കും പിന്‍വശത്ത് ഡ്രം ബ്രേക്കുമായിരിക്കും നല്‍കുക.

79,000 രൂപയുടെ പരിസരത്ത് വെസ്പ എലഗന്റിന് വില കാണുമെന്ന് പ്രതീക്ഷിക്കുന്നു.