സുരക്ഷ പാഴ്‌വാക്കല്ലെന്ന് വീണ്ടും ടാറ്റ; ഇടിയിലും അടിപതറാതെ ടിയാഗൊ

ജര്‍മ്മന്‍, അമേരിക്കന്‍ കാറുകള്‍ ദൃഢതയ്ക്കും സുരക്ഷയ്ക്കും പര്യായമായപ്പോള്‍, ഇന്ത്യന്‍ കാറുകള്‍ ഇന്ധനക്ഷമതയ്ക്ക് വേണ്ടി ഭാരം കുറയ്ക്കാന്‍ മത്സരിക്കുകയായിരുന്നു.

പക്ഷെ ഇന്ന് 'എത്ര കിട്ടും' എന്നതില്‍ നിന്നും 'എന്ത് സുരക്ഷ നല്‍കും' എന്ന ചോദ്യത്തിലേക്ക് ഉപഭോക്താക്കള്‍ ചുവട് മാറിയതോട് കൂടി, നിര്‍മ്മാതാക്കളും ഉണര്‍ന്നു.

സുരക്ഷ ഉറപ്പ് വരുത്തുന്നതില്‍ ഇന്ത്യന്‍ കാറുകള്‍ പുരോഗമിച്ച് കൊണ്ടിരിക്കുകയാണെന്ന് അടുത്തിടെ നടന്ന നിര്‍ഭാഗ്യകരമായ അപകടങ്ങള്‍ വെളിപ്പെടുത്തുന്നുണ്ട്. കടപുഴകിയ ഭീമന്‍ മരത്തെ അതിജീവിച്ച ഹെക്‌സയും, കുത്തിയൊഴുകിയ വെള്ളത്തെ അതിജീവിച്ച ടിഗോറും ഇതിനുള്ള ഉദ്ദാഹരണങ്ങളാണ്.

ഇപ്പോള്‍ കോരിച്ചൊരിയുന്ന മഴയത്ത് തലകീഴായി മറിഞ്ഞ ടിയാഗൊയുടെ ചിത്രമാണ് ഇന്റര്‍നെറ്റില്‍ പ്രചരിക്കുന്നത്. ഇന്ത്യന്‍ നിര്‍മ്മാതാക്കളില്‍ ടാറ്റ ഒരുക്കുന്ന സുരക്ഷ വിപണിയില്‍ ശ്രദ്ധ നേടിക്കൊണ്ടിരിക്കവെ, ടിയാഗൊ ഹാച്ച്ബാക്കിന്റെ അപകടദൃശ്യം ടാറ്റയുടെ കരുത്ത് വീണ്ടും വിളിച്ചോതുകയാണ്.

Recommended Video

Tata Tiago XTA AMT Launched In India | In Malayalam - DriveSpark മലയാളം

പൂനെയില്‍ വെച്ചാണ് സംഭവം. അമിത വേഗതയില്‍ സഞ്ചരിച്ച ടിയാഗൊ, പൊടുന്നനെ പെയ്ത കനത്ത മഴയില്‍ കാഴ്ചപരിധി കുറഞ്ഞതിനെ തുടര്‍ന്ന് ഡിവൈഡറില്‍ ചെന്ന് ഇടിച്ച് തെറിക്കുകയായിരുന്നു.

ഇടിയുടെ ആഘാതത്തില്‍ കാര്‍ പൂര്‍ണമായും തലകീഴായാണ് വീണത്. അതേസമയം, ഇടിയുടെ ആഘാതത്തെ പ്രതിരോധിച്ച ടിയാഗൊയുടെ A-Pillar, യാത്രക്കാരുടെ സുരക്ഷ ഉറപ്പ് വരുത്തി എന്നത് ശ്രദ്ധേയം.

ടാറ്റയുടെ പുതുതലമുറ പ്ലാറ്റ്‌ഫോമില്‍ ഒരുങ്ങുന്ന ടിയാഗൊ ഹാച്ച്ബാക്ക്, ശ്രേണിയില്‍ ഏറ്റവുമധികം വിറ്റഴിക്കപ്പെടുന്ന കാറുകളില്‍ ഒന്നാണ്.

പെട്രോള്‍, ഡീസല്‍ പതിപ്പുകളില്‍ ലഭ്യമാകുന്ന ടിയാഗൊ ഹാച്ച്ബാക്കിനെ, 3.33 ലക്ഷം രൂപ ആരംഭവിലയിലാണ് ടാറ്റ അണിനിരത്തുന്നത്.

Image Source:Shifting-gear