ഇനി കളി മാറും; ആഢംബര ഇലക്‌ട്രിക് നിര കീഴടക്കാന്‍ ഔഡി ഇ-ട്രോണ്‍ എത്തി, പ്രാരംഭ വില 99.99 ലക്ഷം രൂപ

മോഡലിന്റെ പ്രാരംഭ മോഡലായ ഇ-ട്രോൺ 50 പതിപ്പിന് 99.99 ലക്ഷം രൂപയും കൂടുതൽ ശേഷിയുള്ള ഇ-ട്രോൺ 55, ഇ-ട്രോൺ സ്‌പോർട്‌ബാക്ക് 55 എന്നിവയ്ക്ക് യഥാക്രമം 1.16 കോടി രൂപയും 1.17 കോടി രൂപയുമാണ് ഇന്ത്യയിലെ എക്സ്ഷോറൂം വില.

ഇന്ത്യൻ ആഢംബര ഇലക്‌ട്രിക് എസ്‌യുവി നിര വാഴുന്ന മെർസിഡീസ് ബെൻസ് EQC, ജാഗ്വർ I-പേസ് എന്നിവയ്ക്കെതിരെയാണ് ഔഡി ഇ-ട്രോൺ നിരയിയെ അവതരിപ്പിച്ചിരിക്കുന്നത്. കഴിഞ്ഞ മാസം മോഡലുകൾക്കായുള്ള ബുക്കിംഗ് ആരംഭിച്ച കമ്പനി ഉടൻ തന്നെ ഡെലിവറിയും ആരംഭിക്കുമെന്ന് വ്യക്തമാക്കിയിട്ടുണ്ട്.

ഒരു സിബിയു ഉൽപ്പന്നമായാണ് ഇന്ത്യയിൽ എത്തുന്നതെങ്കിലും സ്വന്തമായൊരു ഇടംകണ്ടെത്താൻ ഇലക്‌ട്രിക് പതിപ്പുകൾ പ്രാപ്‌തമാണെന്ന് ഔഡി വിശ്വസിക്കുന്നുണ്ട്. ഇ-ട്രോൺ, ഇ-ട്രോൺ സ്പോർട്ബാക്ക് എന്നിവ പ്രധാനമായും കാഴ്ച്ചയിലും വ്യത്യ‌സ്‌തരാണ്.

ഇ-ട്രോൺ കൂടുതൽ പരമ്പരാഗത എസ്‌യുവി പ്രൊഫൈൽ ഉണ്ടെങ്കിലും സ്‌പോർട്‌ബാക്ക് എസ്‌യുവി മസ്ക്കുലർ കൂപ്പെ ശൈലിയാണ് പ്രതിനിധീകരിക്കുന്നത്. ഇ-ട്രോൺ 50 വേരിയന്റിന് 71 കിലോവാട്ട് ബാറ്ററിയാണ് തുടിപ്പേകുന്നത്.

അതേസമയം ഇ-ട്രോൺ 55, ഇ-ട്രോൺ സ്‌പോർട്‌ബാക്ക് 55 എന്നിവ 95 കിലോവാട്ട് ബാറ്ററിയാണ് ഉപയോഗിക്കുന്നത്. ഇ-ട്രോണിന്റെ മൂന്ന് മോഡലുകളും ഒരേ 408 bhp കരുത്തിൽ 664 Nm torque ആണ് ഉത്പാദിപ്പിക്കുന്നത്.

2.5 ടൺ ഭാരം ഉണ്ടായിരുന്നിട്ടും 5.7 സെക്കൻഡിനുള്ളിൽ 100 കിലോമീറ്റർ വേഗത കൈവരിക്കാൻ ഇവ പ്രാപ്‌തമാണെന്നും ജർമൻ ബ്രാൻഡ് അവകാശപ്പെടുന്നുണ്ട്. പ്രോഗ്രസീവ് സ്റ്റിയറിംഗ്, അഡാപ്റ്റീവ് എയർ സസ്പെൻഷൻ, ഇലക്ട്രിക് ഓൾ-വീൽ ഡ്രൈവ് സിസ്റ്റം എന്നിവയും ഔഡിയുടെ ഇലക്ട്രിക് എസ്‌യുവികളുടെ പ്രത്യേകതകളാണ്.

ഇ-ട്രോൺ 55, ഇ-ട്രോൺ സ്‌പോർട്‌ബാക്ക് 55 എന്നിവ 359 മുതൽ 484 കിലോമീറ്റർ വരെ ശ്രേണി നൽകുമ്പോൾ ഇ-ട്രോൺ 50 വേരിയന്റ് 264 കിലോമീറ്ററിനും 379 കിലോമീറ്ററിനും ഇടയിൽ ശ്രേണി വാഗ്‌ദാനം ചെയ്യും.

11 കിലോവാട്ട് എസി ഹോം ചാർജർ ഉപയോഗിച്ച് ഇ-ട്രോൺ, ഇ-ട്രോൺ സ്‌പോർട്‌ബാക്ക് എന്നില ഏകദേശം 8.5 മണിക്കൂറിനുള്ളിൽ പൂർണമായും ചാർജ് ചെയ്യാം. രണ്ട് ഇവി മോഡലുകളും 150 കിലോവാട്ട് വരെയുള്ള പോയിന്റുകൾ ഉപയോഗിച്ച് ഫാസ്റ്റ് ചാർജിംഗ് ഓപ്ഷനുകളുമായി വരെ പൊരുത്തപ്പെടും.

രൂപകൽപ്പനയുടെ കാര്യത്തിൽ ഔഡി ഇലക്ട്രിക് എസ്‌യുവികൾ അത്ര സമൂലമല്ലെന്നുവേണം പറയാൻ. മാത്രമല്ല ബോഡി ശൈലി അതിന്റെ ജനപ്രിയ എസ്‌യുവി മോഡലുകൾക്ക് സമാനമായി നിലനിർത്താൻ കമ്പനി മനപൂർവം ശ്രമിച്ചിരിക്കാം.

മുൻവശത്ത് ഒരു വലിയ സിൽവർ ഗ്രില്ലാണ് ആധിപത്യം പുലർത്തുന്നത്. മാട്രിക്സ് എൽഇഡി ഹെഡ്‌ലാമ്പുകൾ വാഹന നിരയിൽ സ്റ്റാൻഡേർഡായാണ് ഇടംപിടിച്ചിരിക്കുന്നത്. ആഢംബര ഇവിയുടെ ഇരുവശത്തും ചാർജിംഗ് പോയിന്റുകളുണ്ടെന്നതും ശ്രദ്ധേയമാണ്.

ഡിജിറ്റൽ മാട്രിക്സ് എൽഇഡി ഹെഡ്‌ലൈറ്റുകൾ, എൽഇഡി സ്ട്രിപ്പുള്ള എൽഇഡി പിൻ ലൈറ്റുകൾ, സോഫ്റ്റ് ഡോർ ക്ലോസിംഗ്, 20 ഇഞ്ച് അലോയ് വീലുകൾ, പനോരമിക് സൺറൂഫ്, അഡാപ്റ്റീവ് വിൻഡ്ഷീൽഡ് വൈപ്പർ എന്നിവയും ഔഡി ഇ-ട്രോൺ മോഡലുകളുടെ സവിശേഷതകളാണ്.

10.1 ഇഞ്ച് സെൻട്രൽ ഇൻഫോടെയ്ൻമെന്റ് സ്‌ക്രീനാണ് പ്രധാന ശ്രദ്ധാകേന്ദ്രം. ഓപ്പറേറ്റിംഗ് HVAC നിയന്ത്രിക്കുന്നതിന് പ്രധാന യൂണിറ്റിന് കീഴിൽ രണ്ടാമതൊരു (8.6 ഇഞ്ച്) സ്ക്രീനും ഉണ്ട്. ഫോർ സോൺ ക്ലൈമറ്റ് കൺട്രോൾ, ഹെഡ്-അപ്പ് ഡിസ്പ്ലേ, ആംബിയന്റ് ആൻഡ് കോണ്ടൂർ ലൈറ്റിംഗ്, 16 സ്പീക്കറുകളുള്ള B&O സൗണ്ട് സിസ്റ്റം, എയർ ക്വാളിറ്റി പാക്കേജ് എന്നിവയെല്ലാമാണ് ആഢംബര ഇലക്ട്രിക് എസ്‌യുവിയുടെ അകത്തളത്തളത്തിലെ പ്രത്യേകതകൾ.