ഷെവർലെ ഉപഭോക്താക്കൾക്ക് ആശ്വസിക്കാം; ഇന്ത്യയിലെ വിൽപ്പനാനന്തര സേവനങ്ങൾ തുടരും

എന്നാൽ കയറ്റുമതി വിപണികൾക്കായി രാജ്യത്ത് ഉത്പാദനം തുടർന്ന ഷെവർലെ അടുത്തിടെ പൂർണമായും തങ്ങളുടെ പ്ലാന്റിന്റെ പ്രവർത്തനം അവസാനിപ്പിച്ചു. എന്നാൽ 2021-ലും അതിനുശേഷവും ഇന്ത്യയിലെ ഉപഭോക്താക്കൾക്ക് വിൽപ്പനാനന്തര പിന്തുണ തുടരുമെന്ന് കമ്പനി ഇപ്പോൾ സ്ഥിരീകരിച്ചിരിക്കുകയാണ്.

രാജ്യത്തുടനീളമുള്ള അംഗീകൃത സർവീസ് പ്രവർത്തനങ്ങളുടെയും പാർട്സ് വിതരണക്കാരുടെയും ശക്തമായ ശൃംഖലയിലേക്കുള്ള ഉപഭോക്താക്കളുടെ പ്രവേശനം തുടരും. അതിനായി ഇന്ത്യയിലെ 142 നഗരങ്ങളിൽ ബ്രാൻഡ് നിലവിൽ സർവീസ്, പാർട്സ് ശൃംഖലകൾ പ്രവർത്തിപ്പിക്കുന്നുണ്ട്.

MOST READ: നിരത്തിലേക്ക് എത്താൻ വൈകില്ല, പുത്തൻ സഫാരിയുടെ നിർമാണവും ആരംഭിച്ച് ടാറ്റ

പൂനെയിലെ തലെഗാവിൽ ഷെവർലെക്ക് ഒരു പാർട്സ് ഡിസ്ട്രിബൂഷൻ കേന്ദ്രമുണ്ട്. ആവശ്യമായ എല്ലാ സ്പെയർ പാർട്‌സുകളും എല്ലാ സമയത്തും അതിന്റെ മുഴുവൻ സർവീസ് ശൃംഖലയിലേക്കും എത്തിക്കുന്നുവെന്ന് ഈ കേന്ദ്രം ഉറപ്പാക്കുന്നു.

രാജ്യത്തെ എല്ലാ സർവീസ് കേന്ദ്രങ്ങളിലും ശക്തമായ സാങ്കേതിക പിന്തുണയും ഫീൽഡ് ടീമും ഷെവർലെക്ക് ഉണ്ടെന്നാണ് പറയപ്പെടുന്നത്. ആദ്യത്തെ 'സീറോ ലേബർ ക്യാമ്പ്' എന്ന സർവീസ് പദ്ധതി ഈ വർഷവും തുടരുമെന്ന് കമ്പനി വ്യക്തമാക്കിയിട്ടുണ്ട്.

MOST READ: കോടീശ്വരൻമാരിലെ കോടീശ്വരനായി ടെസ്‌ലയുടെ എലോൺ മസ്‌ക്; വിജയഗാഥ ഇങ്ങനെ

അതോടൊപ്പം 2021-ൽ രാജ്യത്തുടനീളം മറ്റ് പ്രാദേശിക, സീസണൽ ക്യാമ്പുകളും ഉണ്ടാകുമെന്നും ഷെവർലെ ഉറപ്പുനൽകിയിട്ടുണ്ട്. ഈ ക്യാമ്പുകളിൽ ഉപഭോക്താക്കൾക്ക് പ്രൊഫഷണൽ മെയിന്റനെൻസ് സേവനങ്ങൾ അനുഭവിക്കാനുള്ള അവസരവും ആകർഷകമായ കിഴിവുകളുമാണ് ലഭിക്കുന്നത്.

കൂടാതെ ബ്രാൻഡിന്റെ ഔദ്യോഗിക വെബ്‌സൈറ്റിൽ കയറി ലഭ്യമായ സേവനങ്ങളെയും ഓഫറുകളെയും കുറിച്ചുള്ള കൂടുതൽ വിവരങ്ങളും അറിയാം. അതുമല്ലെങ്കിൽ ഷെവർലെ ഇന്ത്യയുടെ കസ്റ്റമർ കെയർ ഹെൽപ്പ്ലൈനുമായി (1800-208-8080) ബന്ധപ്പെടാനുള്ള അവസരവും ഉപഭോക്താക്കൾക്കുണ്ട്.

MOST READ: കളംനിറയാൻ ഹ്യുണ്ടായിയും; ജനുവരിയിൽ 1.50 ലക്ഷം രൂപ വരെയുള്ള കിടിലൻ ഓഫറുകൾ

2017-ൽ ഇന്ത്യൻ വിപണിയിൽ നിന്നും പിൻമാറിയിരുന്നെങ്കിലും കഴിഞ്ഞ മൂന്ന് വർഷമായി വിൽപ്പനാനന്തര സേവനങ്ങളും പിന്തുണയും കമ്പനി ഉപഭോക്താക്കൾക്ക് നൽകുന്നുണ്ട്.

1996-ൽ ഇന്ത്യയിലെത്തിയ ഈ അമേരിക്കൻ ബ്രാൻഡിന് നമ്മുടെ വിപണിയിൽ വേരോടിക്കാൻ കഴിഞ്ഞില്ലെന്നു വേണം പറയാൻ. എന്നാൽ 2006-ൽ ഓപലിനെ പിൻവലിച്ച് ഷെവർലെയെ വിപണിയിലെത്തിച്ചതുപോലെ പുതിയൊരു ബ്രാൻഡിനെ ജനറൽ മോട്ടോർസ് പരിചയപ്പെടുത്താനുള്ള സാധ്യതകൾ ഇനിയുമുണ്ട്.

പുതിയ പ്രഖ്യാപനം എന്തായാലും നിലവിലെ ഷെവർലെ ഉപഭോക്താക്കൾക്ക് ആശ്വാസകരമാണ്. നിലവിൽ സേവനങ്ങൾ തുടരുന്നുണ്ടായിരുന്നെങ്കിലും വരുംകാലത്ത് ഇത് ഇല്ലാതാകുമെന്ന അഭ്യൂഹങ്ങൾ പ്രചരിച്ചിരുന്ന ഘട്ടത്തിലണ് കമ്പനിയുടെ ഈ സ്ഥിരീകരണം.