ഗൂർഖ എസ്‌യുവിക്കും 5-ഡോർ വേരിയന്റ് എത്തും; അണിയറയിൽ പ്രവർത്തനം ശക്തമാക്കി ഫോഴ്‌സ്

ഈ വർഷം മൂന്നാം പാദത്തോടെയാകും എസ്‌യുവിയുടെ പുതുതലമുറ പതിപ്പ് അതായത് 3-ഡോർ വേരിയന്റ് ഇന്ത്യയിൽ വിൽപ്പനയ്ക്ക് എത്തുക. പുതിയ മോഡൽ ശേഷിയിൽ വിട്ടുവീഴ്ച ചെയ്യാത്തതും മെച്ചപ്പെട്ട സ്റ്റൈലിംഗും സവിശേഷതകളും നിറഞ്ഞതുമാണെന്നാണ് കമ്പനിയുടെ അവകാശവാദം.

പൂർണ ഓഫ്-റോഡ് എസ്‌യുവിയിൽ നിന്നും ലൈഫ്-സ്റ്റൈൽ എസ്‌യുവിയായി മാറിയ മഹീന്ദ്ര ഥാറിന്റെ അതേ തന്ത്രമാണ് ഫോഴ്‌സ് ഗൂർഖയും പിന്തുടരുന്നത്. ഇതുകൂടാതെ വരാനിരിക്കുന്ന 5-ഡോർ മാരുതി സുസുക്കി ജിംനിയെയും മഹീന്ദ്ര ഥാറിന്റെ വിപുലീകൃത പതിപ്പിനെയും വെല്ലുവിളിക്കാനാണ് ഗൂർഖയുടെ വലിയ മോഡൽ എത്തുന്നത്.

നിലവിലെ കണക്കനുസരിച്ച് 5-ഡോർ ഫോഴ്‌സ് ഗൂർഖയുടെ വിശദാംശങ്ങൾ ഇപ്പോഴും പരിപൂർണമായും മറച്ചുവെച്ചിരിക്കുകയാണ്. കൂടുതൽ ലൈഫ്-സ്റ്റൈൽ വാഹനമായി സ്ഥാപിക്കുകയും ഓഫ്-റോഡ് പ്രേമികളെയും വ്യക്തിഗത വാങ്ങലുകാരെയും ലക്ഷ്യമിടുകയും ചെയ്യുന്ന 2-ഡോർ പതിപ്പിൽ നിന്ന് വ്യത്യസ്തമായി, 5-ഡോർ മോഡൽ കുടുംബ ഉപഭോക്താക്കളായിരിക്കും പ്രാഥമികമായി ലക്ഷ്യംവെക്കുക.

ഓഫ്-റോഡ് കഴിവുകളും പരുക്കൻ സ്റ്റൈലിംഗും സംയോജിപ്പിച്ച് പിൻസീറ്റുകളിലും ബൂട്ടിലും ഇത് കൂടുതൽ ഇടം നൽകും. സ്റ്റാൻഡേർഡ് മോഡലുമായി താരതമ്യപ്പെടുത്തുമ്പോൾ ഫോഴ്‌സ് ഗൂർഖ 5-ഡോർ വേരിയന്റ് ദൈർഘ്യമേറിയതും വലിയ വീൽബേസുമുള്ളതായിരിക്കും.

അതേസമയം വാഹനത്തിന്റെ മൊത്തത്തിലുള്ള വീതിയും ഉയരവും മാറ്റമില്ലാതെ തുടരാൻ സാധ്യതയുണ്ട്. 90 bhp കരുത്ത് ഉത്പാദിപ്പിക്കുന്ന അതേ ബിഎസ്-VI കംപ്ലയിന്റ് 2.6 ലിറ്റർ ഡീസൽ എഞ്ചിനാകും 5-ഡോർ ഫോഴ്‌സ് ഗൂർഖ ഉപയോഗിക്കുക.

പുതിയ എഞ്ചിൻ മുൻഗാമികളേക്കാൾ 5 bhp കൂടുതൽ വികസിപ്പിക്കാൻ പ്രാപ്‌തമായിരിക്കും. അഞ്ച് സ്പീഡ് മാനുവൽ ഗിയർബോക്സ് ഓപ്ഷനായിരിക്കും സ്റ്റാൻഡേർഡായി വാഹനത്തിൽ തെരഞ്ഞെടുക്കാൻ സാധിക്കുക.

സ്റ്റാൻഡേർഡ് മോഡലിന് സമാനമായി ഫോർ-വീൽ ഡ്രൈവ്, ടു-വീൽ ഡ്രൈവ് ഓപ്ഷനുകളും ഫ്ലോർ കൺസോളിലെ ലിവർ വഴി നിയന്ത്രിക്കുന്ന മാനുവൽ ലോക്കിംഗ് ഡിഫറൻഷ്യലുകളും ഗൂർഖയിൽ വരും.

പുതിയ ഗൂർഖ 3-ഡോർ കോംപാക്‌ട് ഓഫ് റോഡ് എസ്‌യുവി നേരായ റെട്രോ നിലപാട് നിലനിർത്തും. പുതുക്കിയ ഫ്രണ്ട്, റിയർ ബമ്പറുകൾ, പുതിയ ഗ്രിൽ, ക്ലാഡിംഗുകളുള്ള വലിയ വീൽ ആർച്ചുകൾ, 16 ഇഞ്ച് അലോയ് വീലുകൾ എന്നിവയാണ് വാഹനത്തിലെ മാറ്റങ്ങളിൽ ഉൾപ്പെടുക.

പുതിയ ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, പുതിയ ഇൻസ്ട്രുമെന്റ് ക്ലസ്റ്റർ, ടാക്കോയ്ക്കും സ്പീഡോമീറ്ററിനുമിടയിൽ സ്ഥാപിച്ചിരിക്കുന്ന ഡിജിറ്റൽ എംഐഡി, എയർ-കോൺ സിസ്റ്റത്തിനായുള്ള പുതിയ നിയന്ത്രണ ഉപരിതലങ്ങൾ എന്നിവ ഉപയോഗിച്ച് ഇന്റീരിയറും കമ്പനി പരിഷ്ക്കരിച്ചിട്ടുണ്ട്.