കൊവിഡ് രണ്ടാം തരംഗം വിനയായി; ഏപ്രിൽ വിൽപ്പനയിൽ 4.3 ശതമാനം ഇടിവ് രേഖപ്പെടുത്തി മാരുതി

മറ്റ് OEM -കളിലേക്കുള്ള വിൽപ്പന കഴിഞ്ഞ മാസം 5,303 യൂണിറ്റായിരുന്നു. കൊവിഡ്-19 അനുബന്ധ തടസ്സങ്ങൾ കാരണം 2021 മാർച്ചിനെ അപേക്ഷിച്ച് ബ്രാൻഡ് വിൽപ്പനയിൽ 4.3 ശതമാനം ഇടിവ് രേഖപ്പെടുത്തി.

പാസഞ്ചർ വാഹന വിഭാഗത്തിൽ, ആൾട്ടോ, എസ്-പ്രസ്സോ, വാഗൺ ആർ, സെലെറിയോ, സ്വിഫ്റ്റ്, ഇഗ്നിസ്, ബലേനോ, ഡിസൈർ എന്നിവ ഉൾപ്പെടുന്ന മിനി, കോംപാക്ട് വിഭാഗത്തിൽ 97,359 യൂണിറ്റ് വിൽപ്പന കമ്പനി രേഖപ്പെടുത്തി.

ജിപ്സി, എർട്ടിഗ, എസ്-ക്രോസ്, XL6, വിറ്റാര ബ്രെസ, ഇക്കോ എന്നിവയടങ്ങുന്ന യൂട്ടിലിറ്റി വാഹനങ്ങളുടെയും വാനുകളുടെയും വിൽപ്പന 36,953 യൂണിറ്റായിരുന്നു, ഇത് 2021 മാർച്ചിൽ രേഖപ്പെടുത്തിയ വിൽപ്പനയുമായി താരതമ്യപ്പെടുത്തുമ്പോൾ 2.0 ശതമാനം ഇടിവാണ്.

അതുപോലെ, മിഡ്-സൈസ് സെഡാൻ സിയാസിന്റെ വിൽപ്പനയും 1,628 യൂണിറ്റിൽ നിന്ന് 1,567 യൂണിറ്റായി കുറഞ്ഞു. ഇന്ത്യയിൽ മൊത്തം പാസഞ്ചിർ വാഹനങ്ങളുടെ വിൽപ്പന 1,35,879 യൂണിറ്റാണ്.

പാസഞ്ചർ വാഹനങ്ങൾക്ക് പുറമെ 1,272 യൂണിറ്റ് സൂപ്പർ ക്യാരി വാണിജ്യ വാഹനങ്ങളും മാരുതി സുസുക്കി വിറ്റു, ഈ വിഭാഗത്തിലും 61.6 ശതമാനം ഇടിവ് രേഖപ്പെടുത്തുന്നു.

OEM -കളിലേക്കുള്ള വിൽപ്പനയിൽ 2021 ഏപ്രിലിൽ 5,303 യൂണിറ്റ് റീട്ടെയിൽ വിൽപ്പനയുണ്ടായി. വാഹന നിർമാതാക്കൾ 2021 ഏപ്രിൽ മുതൽ എല്ലാ മോഡലുകളിലും വിലവർധനവ് പ്രഖ്യാപിച്ചിരുന്നു.

മെഡിക്കൽ ആവശ്യങ്ങൾക്കായി രാജ്യത്ത് ഓക്സിജൻ വിതരണത്തെ സഹായിക്കുന്നതിനായി 2021 മെയ് 1 മുതൽ മെയ് 9 വരെ ഫാക്ടറികൾ അടക്കുന്നതായി മാരുതി സുസുക്കി പ്രഖ്യാപിച്ചിരുന്നു.