ഗോള്‍ഡ് കളര്‍ വീണ്ടും അവതരിപ്പിച്ചു, വേരിയന്റുകള്‍ വെട്ടിക്കുറച്ചു; Altroz-ല്‍ മാറ്റങ്ങളുമായി Tata

ആള്‍ട്രോസ് പ്രീമിയം ഹാച്ച്ബാക്കിന്റെ വില്‍പ്പന വര്‍ധിപ്പിക്കുന്നതിന്റെ ഭാഗമായി പലപ്പോഴായി പല അവസരങ്ങളിലും കമ്പനി മാറ്റങ്ങള്‍ വരുത്താറുണ്ട്. ഇത്തരത്തില്‍ ഇപ്പോള്‍ വേരിയന്റ് ലൈനപ്പ് പരിഷ്‌കരിച്ചിരിക്കുകയാണ് കമ്പനി. കമ്പനി ഇപ്പോള്‍ ആള്‍ട്രോസിന്റെ നാല് വേരിയന്റുകള്‍ നിര്‍ത്തലാക്കുകയും ഒരു പുതിയ വേരിയന്റ് ചേര്‍ക്കുകയും ചെയ്തിട്ടുണ്ട്.

Recommended Video

Hunter 350 Walk-around In Malayalam | ഹണ്ടർ 350 ബാംഗ്ലൂർ എത്തി മുതലാളി

പെട്രോള്‍ വേരിയന്റുകളെ സംബന്ധിച്ചിടത്തോളം, XZA (O) നീക്കം ചെയ്തപ്പോള്‍ XE, XZ ഡാര്‍ക്ക്, XZ (O) എന്നിവ ഡീസല്‍ പതിപ്പില്‍ നിന്ന് ഒഴിവാക്കിയിരിക്കുന്നു.

അതേ സമയം, മിക്സിലേക്ക് ഒരു പുതിയ XT ഡാര്‍ക്ക് എഡിഷന്‍ ചേര്‍ത്തിട്ടുണ്ട്. കൂടാതെ, ടാറ്റ മോട്ടോര്‍സ് ഹൈ സ്ട്രീറ്റ് ഗോള്‍ഡ് എക്സ്റ്റീരിയര്‍ ഷേഡും വീണ്ടും അവതരിപ്പിച്ചു. ഓപ്പറ ബ്ലൂ, ആര്‍ക്കേഡ് ഗ്രേ, ഡൗണ്‍ടൗണ്‍ റെഡ്, അവന്യൂ വൈറ്റ്, കോസ്‌മോ ബ്ലാക്ക്, ഹാര്‍ബര്‍ ബ്ലൂ എന്നീ കളര്‍ ഓപ്ഷനുകളില്‍ ഹാച്ച്ബാക്ക് ഇപ്പോള്‍ ലഭിക്കും.

അതേസമയം വാഹനത്തില്‍ മറ്റ് മാറ്റങ്ങള്‍ ഒന്നും തന്നെ കമ്പനി നടപ്പാക്കിയിട്ടില്ല. ടാറ്റ ആള്‍ട്രോസ് മൂന്ന് എഞ്ചിന്‍ ഓപ്ഷനുകളില്‍ വാഗ്ദാനം ചെയ്യുന്നത് തുടരുന്നു. ഇതില്‍ 1.2 ലിറ്റര്‍ നാച്ചുറലി ആസ്പിറേറ്റഡ് പെട്രോള്‍, ടര്‍ബോ-പെട്രോള്‍, 1.5 ലിറ്റര്‍ ഡീസല്‍ എഞ്ചിന്‍ എന്നിവ ഉള്‍പ്പെടുന്നു. അഞ്ച് സ്പീഡ് മാനുവല്‍, DCT യൂണിറ്റ് എന്നിവയാണ് ഓഫര്‍ ചെയ്യുന്ന ട്രാന്‍സ്മിഷന്‍ ഓപ്ഷനുകള്‍.

അധികം വൈകാതെ തന്നെ ആള്‍ട്രോസ് ഹാച്ച്ബാക്കില്‍ ഒരു സിഎന്‍ജി വേരിയന്റ് അവതരിപ്പിക്കാന്‍ കൂടി ഒരുങ്ങുകയാണ് കമ്പനി. ഇതിന്റെ മുന്നോടിയായി ഈ മോഡലിന്റെ പരീക്ഷണയോട്ടവും കമ്പനി നിരത്തുകളില്‍ സജീവമാക്കിയിട്ടുണ്ട്. ഇന്ത്യയില്‍ എമിഷന്‍ ടെസ്റ്റിംഗ് ഉപകരണങ്ങളുമായി പരീക്ഷണയോട്ടം നടത്തുന്ന വാഹനത്തിന്റെ ചിത്രങ്ങള്‍ നേരത്തെ പുറത്തുവന്നിരുന്നു.

ആള്‍ട്രോസ് പ്രീമിയം ഹാച്ച്ബാക്കിന്റെ സിഎന്‍ജി വകഭേദം നിര്‍മ്മാണത്തിന് ഏകദേശം തയ്യാറാണെന്നും കമ്പനി അറിയിച്ചിട്ടുണ്ട്. ഈ മോഡല്‍ ഉടന്‍ തന്നെ ഇന്ത്യന്‍ നിരത്തുകളില്‍ എത്തുമെന്നാണ് ഞങ്ങള്‍ പ്രതീക്ഷിക്കുന്നത്. കൂടാതെ, ടാറ്റ ആള്‍ട്രോസ് സിഎന്‍ജിയുടെ സമാരംഭത്തോടെ, ടാറ്റ മോട്ടോര്‍സ് അതിന്റെ സിഎന്‍ജി ഉല്‍പ്പന്ന പോര്‍ട്ട്ഫോളിയോയും വിപുലീകരിക്കും.

ടാറ്റ ആള്‍ട്രോസ് സിഎന്‍ജിയുടെ സമാരംഭത്തോടെ, ഇന്ത്യയില്‍ വളരുന്ന പ്രീമിയം ഹാച്ച്ബാക്ക് സെഗ്മെന്റിലെ വിപണി വിഹിതം കൂടുതല്‍ വിപുലീകരിക്കാനാണ് ടാറ്റ പ്രതീക്ഷിക്കുന്നത്.

വര്‍ദ്ധിച്ചുവരുന്ന ഇന്ധന വിലയും സിഎന്‍ജി വാഹനങ്ങള്‍ വാഗ്ദാനം ചെയ്യുന്ന ഉയര്‍ന്ന ഇന്ധനക്ഷമതയും കണക്കിലെടുക്കുമ്പോള്‍, ടാറ്റ മോട്ടോഴ്സിന് വളരെ യുക്തിസഹമായ ഓപ്ഷനാണ് ആള്‍ട്രോസ് സിഎന്‍ജി അവതരിപ്പിക്കുന്നത്.

ടാറ്റ ടിയാഗോ സിഎന്‍ജി ഹാച്ച്ബാക്കിനും ടാറ്റ ടിഗോര്‍ സിഎന്‍ജി കോംപാക്ട് സെഡാനും കരുത്ത് പകരുന്ന അതേ എഞ്ചിനാണ് ആള്‍ട്രോസ് സിഎന്‍ജി പതിപ്പിനും കരുത്തേകുന്നതെന്നാണ് സൂചന. ഇതിനര്‍ത്ഥം വരാനിരിക്കുന്ന ടാറ്റ ആള്‍ട്രോസ് സിഎന്‍ജിയില്‍ 1.2 ലിറ്റര്‍, നാച്ചുറലി ആസ്പിറേറ്റഡ് എഞ്ചിന്‍ ഉപയോഗിക്കാനാണ് സാധ്യത.

ടിയാഗോ, ടിഗോര്‍ സിഎന്‍ജി എന്നിവയിലെ ഈ എഞ്ചിന്‍ സ്റ്റാന്‍ഡേര്‍ഡ് രൂപത്തില്‍ 84.82 bhp പവറും 113 Nm പീക്ക് ടോര്‍ക്കും ഉത്പാദിപ്പിക്കുന്നു, സിഎന്‍ജി ഇന്ധനത്തോടൊപ്പം, ഈ എഞ്ചിന്‍ 73 bhp കരുത്തും 95 Nm ടോര്‍ക്കും അല്‍പ്പം കുറഞ്ഞ പവറും ടോര്‍ക്കും ഉത്പാദിപ്പിക്കുന്നു. കൂടാതെ, ഈ എഞ്ചിന്‍ 5-സ്പീഡ് മാനുവല്‍ ഗിയര്‍ബോക്‌സുമായിട്ടാണ് ജോടിയാക്കിയിരിക്കുന്നത്.

ആള്‍ട്രോസിന്റെ സെഗ്മെന്റിലെ വില്‍പ്പന കൂടുതല്‍ മെച്ചപ്പെടുത്തുന്നതിനായി, ടാറ്റ അടുത്തിടെ പ്രീമിയം ഹാച്ച്ബാക്കിന്റെ ഓട്ടോമാറ്റിക് വേരിയന്റ് ഇന്ത്യയില്‍ അവതരിപ്പിച്ചിരുന്നു. എന്നിരുന്നാലും, ടാറ്റ ആള്‍ട്രോസിന്റെ DCA-യുടെ പ്രത്യേകത, മോഡല്‍ ഡ്യുവല്‍-ക്ലച്ച് ട്രാന്‍സ്മിഷന്‍ ഉപയോഗിക്കുന്നു എന്നതാണ്.

നിങ്ങള്‍ക്ക് രാജ്യത്ത് വാങ്ങാന്‍ കഴിയുന്ന ഏറ്റവും സുരക്ഷിതമായ ഹാച്ച്ബാക്കുകളില്‍ ഒന്നാണ് ആള്‍ട്രോസ്. കൂടാതെ ഗ്ലോബല്‍ NCAP-ല്‍ നിന്നുള്ള മുതിര്‍ന്നവര്‍ക്കുള്ള പ്രൊട്ടക്ഷന്‍ 5-സ്റ്റാര്‍ സുരക്ഷാ റേറ്റിംഗോടെയാണ് ഇത് വരുന്നത്. ഇതുകൂടാതെ, ടാറ്റ ആള്‍ട്രോസ് പ്രീമിയം ഹാച്ച്ബാക്കില്‍ ഒന്നിലധികം എയര്‍ബാഗുകള്‍, EBD ഉള്ള ABS, ISOFIX പോയിന്റുകള്‍ തുടങ്ങിന നിരവധി സുരക്ഷാ സാങ്കേതിക വിദ്യകളുമുണ്ട്.

ഫീച്ചറുകളാല്‍ സമ്പന്നമാണ് വാഹനം എന്ന് വേണം പറയാന്‍. iRA കണക്റ്റഡ് കാര്‍ ടെക്‌നോളജി, ടച്ച്സ്‌ക്രീന്‍ ഇന്‍ഫോടെയ്ന്‍മെന്റ് സിസ്റ്റം, 7.0 ഇഞ്ച് TFT ഡിജിറ്റല്‍ ഇന്‍സ്ട്രുമെന്റ് ക്ലസ്റ്റര്‍, 16 ഇഞ്ച് ഡയമണ്ട് കട്ട് അലോയ് വീലുകള്‍, ക്രൂയിസ് കണ്‍ട്രോള്‍, റിയര്‍ എസി വെന്റുകള്‍ തുടങ്ങിയ സവിശേഷതകളോടെയാണ് വരുന്നത്.

ആള്‍ട്രോസിന്റെ ഡീസല്‍ പതിപ്പും വിപണിയില്‍ ലഭ്യമാണ്. ഡീസല്‍ യൂണിറ്റ് 1.5-ലിറ്റര്‍, 4-സിലിണ്ടര്‍, ടര്‍ബോചാര്‍ജ്ഡ് യൂണിറ്റാണ്, 4,000 rpm-ല്‍ 90 bhp പീക്ക് പവറും 1,250 rpm-ല്‍ 200 Nm പീക്ക് ടോര്‍ക്കും ഇത് വാഗ്ദാനം ചെയ്യുന്നു.

ദീര്‍ഘദൂര യാത്രകള്‍ ചെയ്യുന്ന ഏതൊരാള്‍ക്കും ഈ പവര്‍ട്രെയിന്‍ അനുയോജ്യമാണ്. നിലവില്‍ രാജ്യത്ത് ലഭ്യമായ ഏറ്റവും മികച്ച ഹാച്ച്ബാക്കുകളില്‍ ഒന്നാണ് ആള്‍ട്രോസ്, കൂടാതെ 5-സ്റ്റാര്‍ സുരക്ഷാ റേറ്റിംഗുള്ള ഇന്ത്യയിലെ ഏക ഹാച്ച്ബാക്കും ഇത് മാത്രമാണ്.

ടാറ്റ ആള്‍ട്രോസിന്റെ ജനപ്രീതി വര്‍ദ്ധിച്ചുകൊണ്ടിരിക്കുകയാണെങ്കിലും, സിഎന്‍ജി പതിപ്പിന്റെ അഭാവം രാജ്യത്തെ പല നഗരവാസികള്‍ക്കും അതിനെ ആകര്‍ഷകമാക്കുന്നില്ല. ആള്‍ട്രോസിന്റെ സിഎന്‍ജി വേരിയന്റ് പുറത്തിറക്കുന്നതോടെ, ടയര്‍ 1, ടയര്‍ 2 നഗരങ്ങളില്‍ കൂടുതല്‍ വാങ്ങുന്നവരെ ആകര്‍ഷിക്കാന്‍ ടാറ്റ മോട്ടോര്‍സിന് കഴിയുമെന്നാണ് റിപ്പോര്‍ട്ടുകള്‍ പറയുന്നത്.