ഓൾ ബ്ലാക്ക് ശ്രേണിക്ക് മാറ്റ് കൂട്ടിക്കൊണ്ട് Safari ഡാർക്ക് എഡിഷൻ അവതരിപ്പിച്ച് Tata

അഞ്ച് സീറ്റർ സഹോദരങ്ങളെപ്പോലെ, സഫാരി ഡാർക്ക് എഡിഷൻ XT+, XTA+, XZ+, XZA+ എന്നീ നാല് വേരിയന്റുകളിൽ ലഭ്യമാണ്. മുൻ ഡാർക്ക് എഡിഷൻ മോഡലുകളെപ്പോലെ, പുതിയ എസ്‌യുവിക്ക് സ്റ്റാൻഡേർഡ് മോഡലിനെ അപേക്ഷിച്ച് മെക്കാനിക്കൽ മാറ്റങ്ങളൊന്നും ലഭിക്കുന്നില്ല, ചില കോസ്‌മെറ്റിക് അപ്‌ഡേറ്റുകൾ മാത്രമാണ് ഇതിൽ വരുന്നത്.

ബാക്കിയുള്ള ഡാർക്ക് എഡിഷൻ ശ്രേണിക്ക് അനുസൃതമായി, സഫാരി ഡാർക്ക് എഡിഷന് പൂർണ്ണമായും ബ്ലാക്ക് നിറത്തിലുള്ള എക്സ്റ്റീരിയറും ഇന്റീരിയറും ലഭിക്കുന്നു, ഇത് കാറിന് ബോൾഡ് ലുക്ക് നൽകുന്നു.

ഒബെറോൺ ബ്ലാക്ക് എന്ന ഓൾ-ബ്ലാക്ക് എക്സ്റ്റീരിയർ പെയിന്റ് സ്‌കീമിലാണ് എസ്‌യുവി ഒരുക്കിയിരിക്കുന്നത്, അത് വളരെ പ്രീമിയമായി കാണപ്പെടുന്നു. ഇതിനോടകം തന്നെ ഡീലർ ഷോറൂമുകളിൽ മോഡലിന്റെ ആദ്യ യൂണിറ്റുകൾ എത്തിത്തുടങ്ങിയിട്ടുണ്ട്.

എക്സ്റ്റേണൽ ഡിസൈൻ നോക്കുകയാണെങ്കിൽ സ്റ്റാൻഡേർഡ് സഫാരിയുടെ പുറംഭാഗത്തുള്ള ക്രോം ഘടകങ്ങൾ പിയാനോ-ബ്ലാക്ക് ട്രിമ്മുകൾ ഉപയോഗിച്ച് മാറ്റിസ്ഥാപിച്ചിട്ടുണ്ട്. ഫ്രണ്ട് ഗ്രില്ലും ചാർക്കോൾ ബ്ലാക്ക് ട്രീറ്റ്‌മെന്റ് നൽകിയിട്ടുള്ള അലോയി വീലുകളും പ്രത്യേക പതിപ്പിന്റെ ശ്രദ്ധേയമായ ഹൈലൈറ്റുകളിൽ ഉൾപ്പെടുന്നു.

എന്നിരുന്നാലും, ട്രൈ-ആരോ പാറ്റേൺ ഉള്ള അലോയി വീലുകളുടെയും ഗ്രില്ലിന്റെയും രൂപകൽപ്പന അതേപടി തുടരുന്നു. സാധാരണ മോഡലിൽ നിന്ന് വേർതിരിച്ചറിയാൻ എസ്‌യുവിയുടെ ടെയിൽഗേറ്റിൽ ക്രോമിൽ ഒരു ഡാർക്ക് എഡിഷൻ ലോഗോ നിർമ്മാതാക്കൾ നൽകിയിട്ടുണ്ട്.

വാഹനത്തിന്റെ പുറംഭാഗത്തുള്ള ബ്ലാക്ക് നിറത്തിലുള്ള തീമും ക്യാബിനിനുള്ളിലും പ്രതിഫലിക്കുന്നു, ഇത് യാത്രക്കാർക്ക് വളരെ സ്‌പോർട്ടി വൈബ് നൽകുന്നു.

മോഡലിന് അതേ ബെനെക്കെ കലിക്കോ ലെതറെറ്റ് അപ്‌ഹോൾസ്റ്ററിയിൽ ട്രൈ-ആരോ സുഷിരങ്ങളും സീറ്റ് ഹെഡ്‌റെസ്റ്റുകളിൽ ഡാർക്ക് എംബ്രോയ്ഡറിയും ലഭിക്കും. സഫാരിയുടെ ഡാർക്ക് എഡിഷൻ മോഡലിനൊപ്പം ആറ്, ഏഴ് സീറ്റ് കോൺഫിഗറേഷനുകൾ ടാറ്റ വാഗ്ദാനം ചെയ്യുന്നു.

എസ്‌യുവിയുടെ സാധാരണ മോഡലുകളിൽ വാഗ്ദാനം ചെയ്യുന്ന എല്ലാ ഫീച്ചറുകളും ക്യാബിനിൽ മാറ്റമില്ലാതെ തുടരുന്നു. വയർലെസ് ആപ്പിൾ കാർപ്ലേ, ആൻഡ്രോയിഡ് ഓട്ടോ എന്നിവയുള്ള 8.8 ഇഞ്ച് ടച്ച്‌സ്‌ക്രീൻ ഇൻഫോടെയിൻമെന്റ് സിസ്റ്റം, സെമി ഡിജിറ്റൽ ഇൻസ്ട്രുമെന്റ് കൺസോൾ, ജെബിഎൽ സ്റ്റീരിയോ സിസ്റ്റം, വയർലെസ് ഫോൺ ചാർജർ, ഓട്ടോ ക്ലൈമറ്റ് കൺട്രോൾ, ക്രൂയിസ് കൺട്രോൾ, പനോരമിക് സൺറൂഫ് എന്നിവ ഇതിൽ ഉൾപ്പെടുന്നു. ഒന്നിലധികം എയർബാഗുകൾ, ESC, ഹിൽ ഹോൾഡ് അസിസ്റ്റ്, ABS + EBD എന്നിവയും മറ്റും സുരക്ഷാ ഫീച്ചറുകളിൽ ഉൾപ്പെടും.

സഫാരിയുടെയും ഹാരിയറിന്റെയും മുഴുവൻ ശ്രേണിയിലും ചുമതലകൾ നിർവഹിക്കുന്ന അതേ 2.0-ലിറ്റർ ക്രിയോടെക് ഡീസൽ എഞ്ചിനാണ് സഫാരി ഡാർക്ക് എഡിഷൻ പവർ ചെയ്യുന്നത്.

ഈ യൂണിറ്റ് 168 bhp കരുത്തും 350 Nm torque ഉം ഉത്പാദിപ്പിക്കുന്നു. ആറ് സ്പീഡ് മാനുവൽ അല്ലെങ്കിൽ ആറ് സ്പീഡ് torque കൺവെർട്ടർ ഓട്ടോമാറ്റിക് ഗിയർബോക്‌സ് മുഖേനയാണ് ട്രാൻസ്മിഷൻ ചുമതലകൾ നിർവഹിക്കുന്നത്, മുൻ വീലുകളിലേക്കാണ് ഈ സെറ്റപ്പ് പവർ അയയ്ക്കുന്നത്.