ബിഎംഡബ്ല്യു G 310 GS ഇന്ത്യയില്‍ പേറ്റന്റ് നേടി

മിലാനില്‍ വെച്ച് നടന്ന 2016 EICMA യില്‍ വെച്ചാണ് ബിഎംഡബ്ല്യു മോട്ടോറാഡ് ആദ്യമായി ബിഎംഡബ്ല്യു G 310 GS നെ അവതരിപ്പിച്ചത്. നെയ്ക്കഡ് വേര്‍ഷന്‍ G 310 R ന്റെ വരവിന് പിന്നാലെ G 310 GS നെയും രംഗത്തെത്തിക്കാനാണ് ബിഎംഡബ്ല്യു മോട്ടോറാഡ് പദ്ധതിയിടുന്നതും.

വരവിന് മുന്നോടിയായി G 310 GS ന്റെ പേറ്റന്റാണ് ബിഎംഡബ്ല്യു മോട്ടോറാഡ് ഇന്ത്യയില്‍ കരസ്ഥമാക്കി. ടിവിഎസുമായുള്ള സംയുക്ത പങ്കാളിത്തത്തിലാണ് G 310 R നെ ബിഎംഡബ്ല്യു ഇന്ത്യയില്‍ അവതരിപ്പിക്കുക.

സമാനമായി, G 310 GS നെ ടിവിഎസിന്റെ ഹൊസൂര്‍ പ്ലാന്റില്‍ നിന്നുമാണ് ബിഎംഡബ്ല്യു നിര്‍മ്മിക്കുക. നിലവില്‍ വിദേശ വിപണികളിലേക്ക് നെയ്ക്കഡ് മോട്ടോര്‍സൈക്കിളിനെ ബിഎംഡബ്ല്യു കയറ്റുമതി ചെയ്യുന്നുണ്ട്.

നിലവിലുള്ള 313 സിസി സിംഗിള്‍ സിലിണ്ടര്‍, ലിക്വിഡ് കൂള്‍ഡ് എഞ്ചിനാണ് ബിഎംഡബ്ല്യു G 310 GS ന്റെ പവര്‍ഹൗസ്. 34 bhp കരുത്തും 28 Nm torque ഉം ഉത്പാദിപ്പിക്കുന്നതാണ് G 310 GS ന്റെ എഞ്ചിന്‍.

താരതമ്യേന, നെയ്ക്കഡ് വേര്‍ഷനിലും കരുത്തുറ്റതായാകും അഡ്വഞ്ചര്‍ ടൂറര്‍ വേര്‍ഷന്‍ വന്നെത്തുക.

ട്യൂബുലാര്‍ സൂപ്പര്‍ഫ്രെയിം ഷാസിയില്‍ എത്തുന്ന G 310 GS ന് അഗ്രസീവ് മുഖമാണ് ഒരുങ്ങുന്നത്.

മൂര്‍ച്ചയേറിയ ഹെഡ്‌ലാമ്പും, മസ്‌കുലാര്‍ ഫ്യൂവല്‍ ടാങ്കും, വൈഡ് ഹാന്‍ഡില്‍ബാറും, ഉയര്‍ന്ന വിന്‍ഡ്‌സ്‌ക്രീനും, ഡ്യൂവല്‍-സ്‌പോര്‍ട് ടയറുകളും ഉള്‍പ്പെടുന്നതാണ് G 310 GS ലെ ഫീച്ചറുകള്‍.

ഫ്രണ്ട് എന്‍ഡില്‍ USD ഫോര്‍ക്കുകളും, റിയര്‍ എന്‍ഡില്‍ മോണോ ഷോക്ക് സസ്‌പെന്‍ഷനുമാണ് ബിഎംഡബ്ല്യു G 310 GS ല്‍ ഇടംപിടിക്കുന്നത്. അഡ്വഞ്ചര്‍ ടൂറര്‍ ഗണത്തില്‍ ഉള്‍പ്പെടുന്ന G 310 GS ല്‍ നീളമേറിയ സസ്‌പെന്‍ഷന്‍ ട്രാവലും, ഉയര്‍ന്ന റൈഡിംഗ് ഷാസിയും സാന്നിധ്യമറിയിക്കുന്നു.

ഇന്ത്യന്‍ വിപണിയില്‍ അഡ്വഞ്ചര്‍ മോട്ടോര്‍സൈക്കിളുകളുടെ പ്രചാരം വര്‍ധിക്കുന്ന സാഹചര്യത്തില്‍ പുതിയ ബിഎംഡബ്ല്യു അഡ്വഞ്ചര്‍ ടൂററുകള്‍ തരംഗം ഒരുക്കുമെന്നാണ് വിലയിരുത്തല്‍.

റോയല്‍ എന്‍ഫീല്‍ഡ് ഹിമാലയന്‍, മഹീന്ദ്ര മോജോ, വരാനിരിക്കുന്ന കവാസാക്കി വേര്‍സിസ് X-300, കെടിഎം 390 അഡ്വഞ്ചര്‍ മോഡലുകളോടാണ് ബിഎംഡബ്ല്യു മോട്ടോറാഡ് ടൂവീലറുകള്‍ മത്സരിക്കുക.