ബിഎസ്-VI ഹോണ്ട യൂണികോൺ വിപണിയിൽ; ഇനി 160 സിസി എഞ്ചിൻ കരുത്തേകും

ഇപ്പോൾ ഹോണ്ട യൂണികോണിന്റെ ബിഎസ്-VI പതിപ്പിനെ കമ്പനി വിപണിയിൽ അവതരിപ്പിച്ചിരിക്കുകയാണ്. പരിഷ്ക്കരിച്ച പുതിയ മോട്ടോർസൈക്കിളിന് 93,593 രൂപയാണ് എക്‌സ്ഷോറൂം വില. നിലവിലുള്ള മോഡലിനേക്കാൾ ഏകദേശം 13,000 രൂപയുടെ വർധനവാണ് പുത്തൻ മോഡലിന് ഉണ്ടായിരിക്കുന്നത്.

കൂടുതൽ കരുത്തും പെർഫോമൻസ് നൽകുന്ന പുതിയ PGM-FI HET 160 സിസി എഞ്ചിനാണ് ഇനി മുതൽ ബൈക്കിൽ ഇടംപിടിക്കുക എന്നതാണ് ശ്രദ്ധേയമായ കാര്യം. മികച്ച ലോ എൻഡ് ടോർഖും ഉയർന്ന ഇന്ധനക്ഷമതയുമാണ് പുതിയ ബിഎസ്-VI യൂണികോണിന്റെ പ്രത്യേകത.

10:1 എന്ന കംപ്രഷൻ അനുപാതം ബൈക്കിന് മികച്ച പ്രകടനം നൽകാൻ സഹായിക്കുന്നു. യൂണികോൺ 160 യിൽ നിന്നുള്ള 162.71 സിസി, സിംഗിൾ സിലിണ്ടർ എഞ്ചിനാണ് CB യൂണിക്കോണിനെ ശക്തിപ്പെടുത്തുന്നത്. ഈ എഞ്ചിന്റെ ബിഎസ്-VI യൂണിറ്റിന്റെ സവിശേഷതകൾ ഹോണ്ട വെളിപ്പെടുത്തിയിട്ടില്ല.

എന്നാൽ നിലവിലുള്ള ബിഎസ്-IV എഞ്ചിൻ 8,000 rpm-ൽ 14 bhp കരുത്തും 6,000 rpm-ൽ 13.92 Nm torque ഉം ആണ് ഇത്പാദിപ്പിക്കുന്നത്. പുതിയ എഞ്ചിനിൽ ഈ കണക്കുകൾ എങ്ങനെ മാറുമെന്നത് ശ്രദ്ധേയമാണ്.

പുതിയ ബിഎസ്-VI ഹോണ്ട യൂണികോണിന്റെ ഗ്രൗണ്ട് ക്ലിയറൻസിലും വ്യത്യാസമുണ്ട്. പഴയതിൽ നിന്നും എട്ട് മില്ലീമീറ്റർ വർധനവാണ് ഉണ്ടായിരിക്കുന്നത്. അതോടൊപ്പം സീറ്റിന് 24 മില്ലിമീറ്ററിലധികം നീളമുണ്ടെന്നും ഹോണ്ട അവകാശപ്പെടുന്നു. കൂടാതെ പുതിയ മോഡലിന് ഒരു കിൽ-സ്വിച്ച്, സിംഗിൾ-ചാനൽ എബിഎസ് യൂണിറ്റ് എന്നിവയും ലഭിക്കുന്നു.

പേൾ ഇഗ്നിയസ് ബ്ലാക്ക്, ഇംപീരിയൽ റെഡ് മെറ്റാലിക്, മാറ്റ് ആക്സിസ് ഗ്രേ മെറ്റാലിക് എന്നിങ്ങനെ മൂന്ന് കളർ ഓപ്ഷനുകളിലാകും യൂണികോൺ ബിഎസ്-VI വിപണിയിൽ എത്തുക. അതോടൊപ്പം പുതിയ പതിപ്പിൽ ആറ് വർഷത്തെ വാറന്റി പാക്കേജും ഹോണ്ട വാഗ്ദാനം ചെയ്യുന്നു. ഇത് മൂന്ന് വർഷത്തെ സ്റ്റാൻഡേർഡ് വാറണ്ടിയും മൂന്ന് വർഷത്തെ എക്സ്റ്റെൻഡ് വാറണ്ടിയുമാണ്.

നിലവിൽ പുതിയ ആക്‌ടിവ 6G, Activa 125, ഹോണ്ട ഡിയോ, SP125, ഷൈൻ 125 തുടങ്ങിയ മോഡലുകളുടെ ബിഎസ്-VI പതിപ്പുകളെ ഹോണ്ട വിപണിയിൽ അവതരിപ്പിച്ചിരുന്നു. എന്നാൽ കമ്പനി അവതരിപ്പിച്ച മറ്റ് BS6- കംപ്ലയിന്റ് ഇരുചക്ര വാഹനങ്ങളിൽ നിന്ന് വ്യത്യസ്തമായി പുതിയ യൂണികോൺ ACG സ്റ്റാർട്ടർ ഉപയോഗിക്കുന്നില്ല.

എന്നാൽ എഞ്ചിൻ കിൽ സ്വിച്ച് മാത്രമാണ് ഇതിന് ലഭിക്കുന്ന പുതിയ സവിശേഷത. ഇവ മാറ്റിനിർത്തിയാൽ ബിഎസ്-IV യൂണികോൺ 150 മോഡലിന് തുല്യമാണ് പുതിയ മോട്ടോർസൈക്കിൾ.