ഹിമാലയൻ്റെ നട്ടെല്ല് ഒടിക്കാൻ ടിവിഎസ്; അപ്പാച്ചെ RTX 300-ൻ്റെ റിവ്യു വായിക്കാം

പുതിയ ടിവിഎസ് അപ്പാച്ചെ RTX 300, അഡ്വഞ്ചർ മോട്ടോർസൈക്കിൾ ശ്രേണിയിലേക്ക് എത്തിയതോടെ റോയൽ എൻഫീൽഡ്, ഹീറോ എന്നീ ബ്രാൻഡുകളുടെ നെഞ്ചത്ത് തന്നെ അമ്പെയ്തതിന് തുല്യമാണ്. മോഡലിൻ്റെ പ്രാരംഭ എക്സ്-ഷോറൂം വില 1.99 ലക്ഷം രൂപയാണ്. പുതിയ മോഡൽ, റാലിയിൽ നിന്ന് പ്രചോദനം ഉൾക്കൊണ്ട ഡിസൈൻ, പുതിയ എൻജിൻ, പരിഷ്കരിച്ച ഷാസി എന്നിവ കൊണ്ട് തന്നെ ശ്രദ്ധേയമാണ്. അപ്പാച്ചെ ശ്രേണിയിലേക്കുള്ള ഈ പുതിയ കൂട്ടിച്ചേർക്കലിലൂടെ, രാജ്യത്തെ സാഹസിക ടൂറിംഗ് മോട്ടോർസൈക്കിളുകളുടെ വർദ്ധിച്ചു വരുന്ന ആവശ്യം നിറവേറ്റാൻ ടിവിഎസ് പ്രാപ്തമാകും എന്ന കാര്യത്തിൽ സംശയമില്ല.

അപ്പാച്ചെ RTX ദിവസേനയുള്ള യാത്രക്കാർക്കും ഓഫ്-റോഡ് പ്രേമികൾക്കും ഒരുപോലെ പ്രയോജനകരമാകുന്ന ഫീച്ചറുകളോടെ മൂന്ന് വ്യത്യസ്ത വേരിയന്റുകളിലാണ് അവതരിപ്പിച്ചിരിക്കുന്നത്. ഇടത്തരം സാഹസിക മോട്ടോർസൈക്കിൾ വിഭാഗത്തിലേക്ക് ടിവിഎസിൻ്റെ വരവിനായി ആരാധകർ കാത്തിരിക്കുകയായിരുന്നു. 300 സിസി എഞ്ചിൻ, അത്യാധുനിക ഇലക്ട്രോണിക്സ്, കരുത്തുറ്റ ഷേപ്പ് എന്നിവയെല്ലാം ലഭിക്കുന്നുണ്ട്. നഗരയാത്രകൾക്കും, ദുർഘടമായ റോഡുകളിലൂടെയുള്ള യാത്രകൾക്കും ഇത് ഒരുപോലെ അനുയോജ്യമാണ്. കൂടാതെ വ്യത്യസ്ത സാഹചര്യങ്ങളിൽ മികച്ച പ്രകടനം കാഴ്ചവെക്കാൻ കഴിവുള്ളതുമാണ്.

ഹിമാചൽ പ്രദേശിലെ ഷിംലയിൽ, നല്ല റോഡിലും,ദുർഘടമായ റോഡുകളിലെയും, മലയോര മേഖലയിലെയും ഇതിൻ്റെ ശേഷി പരീക്ഷിക്കാൻ അപ്പാച്ചെ RTX-ൽ ഒരു യാത്ര പോകാൻ ഞങ്ങൾക്ക് സാധിച്ചു. അപ്പാച്ചെ RTX-ന്, റാലിയിൽ നിന്ന് പ്രചോദനം ഉൾക്കൊണ്ടുള്ള രൂപകൽപ്പനയാണ് നൽകിയിരിക്കുന്നത്. കാറ്റിനെ പ്രതിരോധിക്കാൻ സഹായിക്കുന്ന വലിയ വിൻഡ്‌സ്‌ക്രീനും, ഷാസിയും ഇതിന് ലഭിക്കുന്നുണ്ട്.

ഇരട്ട ഹെഡ്‌ലാമ്പുകൾ വ്യത്യസ്ത ലൈറ്റിംഗ് സാഹചര്യങ്ങൾക്കനുസരിച്ച് ക്രമീകരിക്കാൻ കഴിയുന്നതാണ്. ഉയർന്നുനിൽക്കുന്ന രൂപവും, വീതിയേറിയ ഹാൻഡിൽബാറുകളും റോഡിൽ ഇതിന് മികച്ച റോഡ് പ്രസൻസ് നൽകാൻ സഹായിക്കുന്നവയാണ്. മുൻവശത്ത് 19-ഇഞ്ച് ടയറും, 180mm ട്രാവലുള്ള അപ്‌സൈഡ്-ഡൗൺ ഫോർക്കുകളും ഓഫ്-റോഡിംഗിൽ മികച്ച പ്രകടനം നൽകാൻ സഹായിക്കുന്നു. പിന്നിലെ 17-ഇഞ്ച് ടയറുകൾ വിവിധതരം പ്രതലങ്ങളിൽ സ്ഥിരതയും, മികച്ച ഗ്രിപ്പും നൽകാൻ കഴിവുളളവയാണ്.

റൈഡറിനും, പിന്നിലിരിക്കുന്നവർക്കും സുഖകരമായ രീതിയിലുള്ള സീറ്റുകളാണ് അപ്പാച്ചെ നൽകിയിരിക്കുന്നത്. എക്സ്പോസ്ഡ് ഫ്രെയിമും, മെറ്റൽ ഘടകങ്ങളും ഇതിന് കരുത്തുറ്റ ഭാവം നൽകുന്നു. കൂടാതെ ടോപ് ബോക്സ് ഘടിപ്പിക്കാനുള്ള സൗകര്യം ടോപ് വേരിയൻ്റുകളിൽ അധികമായി നൽകിയിട്ടുണ്ട്. 5-ഇഞ്ച് TFT ഡിസ്‌പ്ലേ നൽകിയിരിക്കുന്നത് കൊണ്ട് ഏത് നട്ടുച്ചയ്ക്കും വ്യക്തമായ കാഴ്ച നൽകുന്നു.

ടിവിഎസിൻ്റെ X-Connect ആപ്പ്, സ്മാർട്ട്‌ഫോൺ കണക്റ്റിവിറ്റി, ഡാഷ്‌ബോർഡിൽ മാപ്പ് മിററിംഗ് എന്നിവയെ പിന്തുണയ്ക്കുന്നു, ഇത് ദൂരയാത്രകളിലെ നാവിഗേഷൻ എളുപ്പമാക്കുന്നു. NA835mm സീറ്റ് ഉയരമുള്ളതിനാൽ, മിക്ക ഇന്ത്യൻ റൈഡർമാർക്കും ഇത് വളരെ അനുയോജ്യമാണ്. വിശാലമായ ഹാൻഡിൽബാർ, നഗരയാത്രകളിലും, ദൂരയാത്രകളിലും ബൈക്ക് എളുപ്പത്തിൽ നിയന്ത്രിക്കാൻ സഹായിക്കുന്നു.

സീറ്റ് നന്നായി പാഡ് ചെയ്തതും, വിശാലവുമാണ്. ഇത് ദീർഘദൂര യാത്രകളിൽ റൈഡർക്ക് കൂടുതൽ സുഖം നൽകുന്നു. റൈഡറിനും, പിന്നിലിരിക്കുന്നവർക്കും വാഹനത്തിൻ്റെ ഡിസൈൻ പ്രയോജനകരമാണ്. കൂടാതെ, ഉയർന്ന് ഇരിക്കുന്ന രീതി ഒരുപാട് ദൂരം സഞ്ചരിക്കുമ്പോൾ ഉണ്ടാകുന്ന ക്ഷീണം കുറയ്ക്കാൻ സഹായിക്കുന്നുണ്ട്.

റൈഡ്-ബൈ-വയർ ത്രോട്ടിൽ, ബൈ-ഡയറക്ഷണൽ ക്വിക്ക് ഷിഫ്റ്റർ, ക്രൂയിസ് കൺട്രോൾ, ക്രമീകരിക്കാവുന്ന ലിവറുകൾ, എബിഎസ്, ട്രാക്ഷൻ കൺട്രോൾ എന്നിവ പ്രധാന ഫീച്ചറുകളാണ്. TFT ഡിസ്‌പ്ലേ, മറ്റ് ടിവിഎസ് മോഡലുകൾക്ക് സമാനമായ ലേഔട്ടിലുള്ളതിനാൽ പ്രവർത്തിപ്പിക്കാനും എളുപ്പമാണ്. അധിക സ്റ്റോറേജിനായി പാനിയറുകളും, ടോപ് ബോക്സും പോലുള്ള ആക്സസറികളും ലഭ്യമാണ്.

അപ്പാച്ചെ RTX-ന് 300cc, സിംഗിൾ-സിലിണ്ടർ RTX D4 എഞ്ചിനാണ് നൽകിയിരിക്കുന്നത്. ഇത് 36PS കരുത്തും, 28.5Nm ടോർക്കും നൽകുന്നു. ഈ എഞ്ചിൻ, ആറ് സ്പീഡ് ട്രാൻസ്മിഷനുമായിട്ടാണ് ജോടിയാക്കിയിരിക്കുന്നത്. റൈഡർമാർക്ക്, നാല് റൈഡിംഗ് മോഡുകൾ തിരഞ്ഞെടുക്കാം: Urban, Rain, Tour, Rally. Rally മോഡ് ഓഫ്-റോഡിംഗിൽ കൂടുതൽ നിയന്ത്രണം നൽകുന്നതിന്, പിൻവശത്തെ എബിഎസ് പ്രവർത്തനരഹിതമാക്കാൻ സഹായിക്കുന്നു.

ഷാസി, സാഹസിക യാത്രകൾക്ക് അനുയോജ്യമായ രീതിയിൽ, മെറ്റൽ ഉപയോഗിച്ച് നിർമ്മിച്ചിരിക്കുന്നവയാണ്. സസ്പെൻഷൻ സജ്ജീകരണത്തിൽ, ക്രമീകരിക്കാവുന്ന മുൻവശത്തെ ഫോർക്കുകളും, പിന്നിൽ മോണോ-ഷോക്കും ഉണ്ട്. ഇത് സുഖകരമായ യാത്രയും, സ്ഥിരതയും നൽകുന്നുണ്ട്. 200mm ഗ്രൗണ്ട് ക്ലിയറൻസ് മോശം റോഡുകളിലൂടെയും, കുന്നുകളിലെയും യാത്രകൾക്ക് അനുയോജ്യമാണ്.

എഞ്ചിൻ മികച്ച രീതിയിൽ പ്രവർത്തിക്കുന്നത് കൊണ്ട് തന്നെ എല്ലാ റൈഡിംഗ് മോഡുകളിലും സുഗമമായ പവർ ലഭിക്കുന്നുണ്ട്. വേഗത്തിലുള്ള ആക്സിലറേഷനും, ക്വിക്ക് ഷിഫ്റ്ററും ദൂരയാത്രകളിൽ ഗിയർ മാറ്റം എളുപ്പമാക്കുന്നുണ്ട്. റൈഡ്-ബൈ-വയർ ത്രോട്ടിൽ സിസ്റ്റം വളരെ വേഗത്തിൽ പ്രതികരിക്കുന്നു. ഇത് നഗരത്തിലെ ട്രാഫിക്കിലും, ഹൈവേകളിലും കൃത്യമായ നിയന്ത്രണം നൽകുന്നു.

സസ്പെൻഷൻ അൽപ്പം മൃദുവായി ക്രമീകരിച്ചിരിക്കുന്നതിനാൽ, കുഴികളും, റോഡിലെ മറ്റു കുറവുകളും യാത്രക്കാർക്ക് സുഖകരമായ അനുഭവം നൽകുന്നു. ഉയർന്ന വേഗതയിൽ പോലും ബൈക്കിന് മികച്ച സ്റ്റെബിളിറ്റി ലഭിക്കുന്നുണ്ട്. വലിയ വിൻഡ്‌സ്‌ക്രീൻ കാറ്റിൽ നിന്ന് റൈഡർക്ക് മികച്ച സംരക്ഷണം നൽകുന്നു, കൂടാതെ ഇരിക്കുന്ന രീതി ദുർഘടമായ റോഡുകളിൽ യാത്ര ചെയ്യുമ്പോൾ എഴുന്നേറ്റ് നിൽക്കാൻ സഹായിക്കുന്നു.

സുഖകരമായ യാത്രയും, ഫീച്ചറുകളും, ഓഫ്-റോഡ് കഴിവും ഒരുപോലെ നൽകുന്ന അപ്പാച്ചെ RTX-ൻ്റെ ഇലക്ട്രോണിക്സ് പാക്കേജ് അഡ്വഞ്ചർ വിഭാഗത്തിന് ഒരു പുതിയ മുഖം നൽകുന്നുണ്ട്. സസ്പെൻഷനും, ബ്രേക്കിംഗും ഇന്ത്യൻ റോഡുകൾക്കും, വ്യത്യസ്ത സാഹചര്യങ്ങൾക്കും അനുയോജ്യമാണെന്ന് പറയാതെ വയ്യ. രണ്ട് ലക്ഷം രൂപയിൽ താഴെ വില വരുന്ന ഒരു സാഹസിക ബൈക്ക് നിങ്ങങ്ങൾ തേടുന്നുണ്ടെങ്കിൽ,അപ്പാച്ചെ RTX ഒരു മികച്ച ഓപ്ഷനാണ്. ഇതിൻ്റെ കരുത്തുറ്റ രൂപകൽപ്പന, അത്യാധുനിക ഫീച്ചറുകൾ, സുഖപ്രദമായ സീറ്റിങ്ങ് എന്നിവ ദൈനംദിന യാത്രകൾക്കും, ദീർഘദൂര യാത്രകൾക്കും പരിഗണിക്കാവുന്നതാണ്.