മാരുതി സമരം വിപണിക്ക് ദോഷം: സിയാം

മാന്ദ്യകാലത്തെ തൊഴിലാളി സമരങ്ങള്‍ നേരിടുന്നതിനായുള്ള തൊഴില്‍ നിയമ പരിഷ്കരണങ്ങള്‍ കൊണ്ടുവരാന്‍ സര്‍ക്കാരിന് സാധിക്കുന്നില്ലെന്ന് സിയാം കുറ്റപ്പെടുത്തി. സ്ഥിര ജീവനക്കാര്‍ നടത്തുന്ന സമരങ്ങള്‍ നേരിടാന്‍ മാരുതി പ്രയാസപ്പെടുന്നത് സംഘടന ചൂണ്ടിക്കാട്ടി.

രാജ്യത്തെ പാസഞ്ചര്‍ കാര്‍ വിപണി കഴിഞ്ഞ മൂന്നുമാസമായി കൊടിയ മാന്ദ്യത്തിന്‍റെ പിടിയിലാണ്. ഉയര്‍ന്ന പലിശ നിരക്ക് കാരണം കാര്‍ വാങ്ങാന്‍ ഉപഭോക്താക്കള്‍ തയ്യാറാവത്തത് സിയാമിനെ കുണ്ഠിതപ്പെടുത്തുന്നുണ്ട്. മുപ്പത് മാസം തുടര്‍ച്ചയായി വളര്‍ച്ച പ്രകടിപ്പിച്ച വിപണി പെട്ടെന്നാണ് താഴോട്ട് പോകാന്‍ തുടങ്ങിയത്. സര്‍ക്കാര്‍ നയങ്ങളാണ് ഇതിന് കാരണം.

തൊഴിലാളികളെ നല്ലനടപ്പ് കരാറില്‍ ഒപ്പിടാന്‍ നിര്‍ബന്ധിക്കുകയും പ്രസ്തുത കരാര്‍ ലംഘിച്ചെന്ന് ചൂണ്ടിക്കാട്ടി നിരവധി പേരെ പുറത്താക്കുകയും ചെയ്ത നടപടിയാണ് മാരുതിയില്‍ വീണ്ടും സമരം തുടങ്ങാന്‍ തൊഴിലാളികളെ പ്രേരിപ്പിച്ചത്.