മിനി വരും, വൈകാതെ

ഇന്ത്യന്‍ വിപണിയിലേക്കുള്ള മിനിയുടെ പ്രവേശം കുറച്ച് വൈകുമെന്നാണ് കേട്ടിരുന്നത്. അല്ല, കുറച്ച് നേരത്തയുണ്ടാകുമെന്ന് ബി എം ഡബ്ലിയു പറയുന്നു. ഇന്ത്യയില്‍ ചെറുകാറുകള്‍ക്ക് വര്‍ധിച്ചു വരുന്ന പ്രിയം കണക്കിലെടുത്താവണം ബി എം ഡബ്ലിയു ഇനിയധികം വൈകിക്കേണ്ടതില്ല എന്ന തീരുമാനത്തിലെത്തിയത്. ലോക കാര്‍ ഭീമന്മാരെല്ലാം ചെറുകാര്‍ മോഡലുകള്‍ വിപണിയിലെത്തിക്കുവാന്‍ തിടുക്കപ്പെടുന്ന സമയം കൂടിയാണിത്.

രണ്ടോ മൂന്നോ വര്‍ഷത്തിനകം മിനി കാറുകള്‍ ഇന്ത്യയില്‍ ഓടുത്തുടങ്ങുമെന്ന് ബി എം ഡബ്ലിയു ഇന്ത്യ പ്രസിഡന്‍റ് ആന്‍ഡ്രീസ് ഷാഫ് അറിയിക്കുന്നു. മറ്റ് ചെറുകാറുകളുമായി എല്ലാത്തരത്തിലും താരതമ്യപ്പെടുത്താവുന്നവയല്ല മിനിയുടെ കാറുകള്‍. വിലയുടെ കാര്യത്തില്‍ ഇന്ത്യന്‍ വിപണിയിലെ മറ്റ് ചെറുകാറുകളുടെ സ്വഭാവമല്ല ഇവയ്ക്കുള്ളത്. ഇതിനാല്‍ വിദേശത്ത് പൂര്‍ണമായും നിര്‍മിച്ച് ഇറക്കുമതി ചെയ്യുകയെന്നത് വിപണിയെ സംബന്ധിച്ച് അബദ്ധമാണ്. ഇന്ത്യയില്‍ ഇവ നിര്‍മിക്കുന്നതിനുള്ള നിക്ഷേപം ആവശ്യമാണ്.