AK 47 നമ്പരിന് 3.10 ലക്ഷം!

Published: Monday, October 10, 2011, 18:43 [IST]

കാറും തോക്കും തമ്മിലെന്ത് എന്നാണോ? ചിലതുണ്ട് എന്നാണ് പഞ്ചാബില്‍ നിന്നുള്ള വാര്‍ത്തകള്‍ സൂചിപ്പിക്കുന്നത്. പഞ്ചാബില്‍ AK 47 എന്ന ഫാന്‍സി നമ്പര്‍ വിറ്റുപോയത് 3.10 ലക്ഷം രൂപയ്ക്കാണ്. ഒരു മതവിഭാഗത്തില്‍ അധിഷ്ഠിതമായി പ്രവര്‍ത്തിക്കുന്ന സംഘടനയാണ് അവരുടെ ആഡംബരക്കാറിനിടാന്‍ ഈ നമ്പര്‍ തെരഞ്ഞെടുത്തത്. മതവും തോക്കും തമ്മിലെന്ത് എന്ന വിഷയം ഇവിടെ ചര്‍ച്ച ചെയ്യുന്നില്ല.

വെറും പതിനായിരം രൂപയിലാണ് ഫാന്‍സി നമ്പരിന്‍റെ ലേലം തുടങ്ങിയത്. ഗതാഗത വകുപ്പുദ്യോഗസ്ഥര്‍ വിചാരിച്ചിടത്തൊന്നും പക്ഷെ കാര്യങ്ങള്‍ നിന്നില്ല. വിളിച്ചുകയറിപ്പോയ ലേലം ഒടുവില്‍ മൂന്നുലക്ഷം കടന്നാണ് നിന്നത്.

0007 എന്ന നമ്പര്‍ ലേലത്തില്‍ പോയത് 4.21 ലക്ഷം രൂപയ്ക്കാണ്. 0005 എന്ന നമ്പര്‍ 3.25 ലക്ഷം രൂപയ്ക്കും. 0001 എന്ന നമ്പര്‍ 3.1 ലക്ഷം രൂപയ്ക്ക് പിടിക്കാനും ആളുണ്ടായി!

ലേലം നടന്ന നമ്പരുകളില്‍ AH സീരീസില്‍ നിന്നു മാത്രം 53 ലക്ഷം രൂപ ലഭിച്ചതായി അധികൃതര്‍ അറിയിച്ചു. CH01-AJ സീരീസില്‍ 40 ലക്ഷത്തിന്‍റെ ലേലമാണ് നടന്നത്.