ഷെവര്‍ലെ ട്രെയ്‍ല്‍ബ്ലേസര്‍ വരുന്നു

Published: Monday, January 30, 2012, 14:58 [IST]

എസ് യു വി വിപണി കത്തിക്കയറുകയാണ്. ടൊയോട്ട ഫോര്‍ച്യൂണര്‍, ഫോര്‍ഡ് എന്‍ഡീവര്‍ എന്നിവരാണ് പ്രീമിയം എസ് യു വി വിഭാഗത്തില്‍ കൊമ്പുകോര്‍ക്കുന്ന രണ്ടു പേര്‍. ഇവര്‍ തമ്മില്‍ പരസ്യങ്ങളില്‍ നേരിട്ട് ഗ്വഗ്വാ വിളികള്‍ നടന്നുവരുന്നത് നമ്മളെല്ലാം കാണുന്നതുമാണ്. ഇങ്ങനെ രണ്ടു പേര്‍ തമ്മില്‍ തലതല്ലിച്ചാകുന്നത് കണ്ട് കരള് പിടഞ്ഞാണ് ഷെവര്‍ലെ പുതിയ തീരുമാനവുമായി രംഗത്തു വരുന്നത്. പുതിയൊരു എസ് യു വി പ്രീമിയം വിഭാഗത്തില്‍ തന്നെ ഇറക്കിക്കളയാം എന്നാണ് തീരുമാനം.

ഷെവര്‍ലെയുടെ പുതിയ ട്രെയ്‍ല്‍ബ്ലേസര്‍ എസ് യു വിയാണ് ഇന്ത്യന്‍ വിപണിയിലേക്ക് കൊണ്ടു വരാന്‍ കമ്പനി വിചാരിക്കുന്നത്. 2.8 ലിറ്റര്‍ പെട്രോള്‍ എന്‍ജിന്‍ പതിപ്പും 2.5 ലിറ്റര്‍ ഡീസല്‍ എന്‍ജിന്‍ പതിപ്പുമാണ് ട്രെയ്‍ല്‍ബ്ലേസറിനുള്ളത്. പെട്രോള്‍ എന്‍ജിന് 180ഉം ഡീസല്‍ എന്‍ജിന് 150ഉം കുതിരശേഷിയുണ്ട്.

കാഴ്ചയിലും കരുത്തിലും ഒരുപോലെ മികച്ചതാണ് ഈ എസ് യു വി. എന്‍ഡീവര്‍, ഫോര്‍ച്യൂണര്‍ എന്നവയ്ക്കുള്ളതിലേറെ സ്പേസ് പുതിയ വാഹനത്തിനുണ്ടായിരിക്കും.

വിദേശത്തു നിന്ന് ഘടകഭാഗങ്ങള്‍ കൊണ്ടു വന്ന് ഇന്ത്യയില്‍ അസംബ്ള്‍ ചെയ്യുവാനാണ് പ്ലാന്‍. ഇന്ത്യയില്‍ വാഹനത്തിന് 16 - 18 ലക്ഷത്തിനിടയ്ക്കായിരിക്കും വിലനിലവാരം.