ഹോണ്ട സിവിക് ടൂറര്‍ ഫ്രാങ്ഫര്‍ടിലേക്ക്

ഹോണ്ട ബ്രിയോയെ ആധാരമാക്കിയ ഒരു എംപിവി ഇന്ത്യയില്‍ അവതരിപ്പിക്കാന്‍ ശ്രമം നടക്കുന്നുണ്ട്. ഇതിന് പിന്നാലെ സിവിക് ടൂററിന് വേണ്ടി ഹോണ്ട പണം മുടക്കുമോ എന്ന കാര്യം ഉറപ്പിക്കാനാവില്ല.

സ്റ്റൈലിന്റെ കാര്യത്തില്‍ സാധാരണ വാഗണുകളെപ്പോലെ അല്ലാതിരിക്കാന്‍ പ്രത്യേകം ശ്രദ്ധ വെക്കുന്നതാണ് ഡിസൈനെന്ന് പറയുന്നു സിവിക് ടൂറര്‍ പ്രൊജക്ട് ലീഡറായ അഡ്രിയാന്‍ കില്‍ഹാം.

ഹാച്ച്ബാക്കിനെക്കാള്‍ 235 മില്ലിമീറ്റര്‍ നീളം വര്‍ധിച്ചിട്ടുണ്ട് സിവിക് ടൂററില്‍. മൊത്തം നീളം 4520 മില്ലിമീറ്ററാണ്. ഉള്‍വശം ഉദാരമാണ് എന്ന കാര്യം ഉറപ്പിക്കാം.

624 ലിറ്റര്‍ ബൂട്ട് ശേഷിയുണ്ട് സിവിക് ടൂററിന്. ഇത് നമ്മുടെ ഇന്നോവയെക്കാള്‍ മൂന്നിരട്ടിയിലധികം വരുന്നു. പിന്‍ സീറ്റുകള്‍ മടക്കിവെച്ചാല്‍ 1,668 ലിറ്റര്‍ അധികശേഷി ലഭിക്കും.

സീറ്റുകളുടെ ക്രമീകരണത്തില്‍ പരമാവധി വഴക്കം അനുവദിക്കുന്നുണ്ട് സിവിക് ടൂറര്‍. ഇക്കാരണത്താല്‍ പ്രസ്തുത സംവിധാനത്തെ 'മാജിക് സീറ്റുകള്‍' എന്നു വിളിക്കും ഹോണ്ട.

വാഹനത്തിന്റെ കാര്‍ഗോ ഏരിയയ്ക്കകത്ത് രണ്ട് മൗണ്ടൈന്‍ ബൈക്കുകളെ കൊള്ളിക്കാനുള്ള ഇടമുണ്ടെന്ന് ഹോണ്ട പറയുന്നു.

മൂന്ന് ഡ്രൈവ് ക്രമീകരണം ടൂററില്‍ സാധ്യമാണ്. കംഫര്‍ട്ട്, നോര്‍മല്‍, ഡൈനമിക് എന്നീ ക്രമീകരണങ്ങള്‍ റോഡ് സാഹചര്യങ്ങള്‍ക്കും വാഹനത്തിന്റെ ലോഡിനും അനുസൃതമായി ഉപയോഗിക്കാവുന്നതാണ്. വണ്ടിയുടെ സ്ഥിരത, സുരക്ഷ എന്നിവ ഉറപ്പുവരുത്താന്‍ കഴിയുന്നു.

ഹോണ്ടയുടെ പുതിയ എര്‍ത് ഡ്രീംസ് ഡീസല്‍ എന്‍ജിനാണ് ടൂററിന് നല്‍കുക. 118 കുതിരശക്തിയുള്ള ഈ 1.6 ലിറ്റര്‍ എന്‍ജിന്‍ കൂടാതെ ഒരു പെട്രോള്‍ എന്‍ജിനും ടൂററിനുണ്ട്. ഇത് 1.8 ലിറ്റര്‍ ശേഷിയുള്ളതാണ്.

ജനീവ മോട്ടോര്‍ ഷോയിലാണ് സിവിക് ടൂറര്‍ കണ്‍സെപ്റ്റ് ആദ്യമായി അവതരിപ്പിക്കപ്പെട്ടത്. കൂടുതല്‍ വിവരങ്ങള്‍ ഫ്രാങ്ഫര്‍ടില്‍ കാണാന്‍ കഴിഞ്ഞേക്കും.