സ്വിഫ്റ്റ്, ഡിസൈര്‍ ഗുഡ്ഗാവ് ഉല്‍പാദനം നിറുത്തി

2012ല്‍ മാസത്തില്‍ ശരാശരി 20,000 യൂണിറ്റ് വില്‍പനയുണ്ടായിരുന്നു സ്വിഫ്റ്റിന്. 2013 മെയ് മാസത്തിലെ കണക്കുകള്‍ പ്രകാരം 14,353 യൂണിറ്റായി കുറഞ്ഞിട്ടുണ്ട്. സമാനമായ വില്‍പനാ നിരക്കുണ്ടായിരുന്ന സ്വിഫ്റ്റ് ഡിസൈറും ഇപ്പോള്‍ വില്‍ക്കുന്നത് ശരാശരി 12,000 യൂണിറ്റാണ്.

നിലവില്‍ ദിവസത്തില്‍ മനെസറില്‍ നിര്‍മിക്കുന്നത് 2,466 കാറുകളാണ്. നേരത്തെയിത് 3,300ന്റെ ചുറ്റുപാടില്‍ നിന്നിരുന്നതാണ്.

മനെസറില്‍ മൂന്ന് ലക്ഷം ഡീസല്‍ എന്‍ജിനുകള്‍ ഉല്‍പാദിപ്പിക്കാന്‍ ശേഷിയുള്ള പ്ലാന്റാണ് മാരുതിക്കുള്ളത്. 13 ലക്ഷം യൂണിറ്റ് ശേഷിയുള്ള പെട്രോള്‍ എന്‍ജിന്‍ നിര്‍മാണ പ്ലാന്റ് ഗുഡ്ഗാവിലും പ്രവര്‍ത്തിക്കുന്നുണ്ട്. 1 ലക്ഷത്തോളം ഡീസല്‍ എന്‍ജിനുകള്‍ (1.3 ലിറ്റര്‍ മള്‍ടിജെറ്റ്) ഫിയറ്റില്‍ നിന്ന് വാങ്ങുന്നുമുണ്ട്. പെട്രോള്‍ കാറുകളുടം ഡിമാന്‍ഡ് ഇടിഞ്ഞതോടെ ഗുഡ്ഗാവിലെ എന്‍ജിന്‍ പ്ലാന്റിന്റെ 40 ശതമാനവും ഉപയോഗിക്കാതെ കിടക്കുകയാണ്.

വിപണിയില്‍ പൊതുവിലുള്ള മാന്ദ്യം മാരുതിയുടെ ഈ നീക്കത്തിന് കാരണങ്ങളിലൊന്നായി കാണണം. ടാറ്റ മോട്ടോഴ്‌സ്, ടൊയോട്ട കിര്‍ലോസ്‌കര്‍ തുടങ്ങിയ കമ്പനികള്‍ ഇത്തരം നീക്കങ്ങള്‍ക്ക് നിര്‍ബന്ധിതരായിട്ടുണ്ട്.

ഇതോടൊപ്പം പുതിയ വാഹനങ്ങളുടെ വിപണി പ്രവേശം മാരുതി മോഡലുകളെ എങ്ങനെ ബാധിച്ചു എന്നതും കണക്കിലെടുക്കണം.

ഹോണ്ട അമേസിന്റെ വിപണിപ്രവേശം സ്വിഫ്റ്റ് ഡിസൈറിന്റെ വില്‍പനയെ ബാധിച്ചിട്ടുണ്ട് എന്നുവേണം മനസ്സിലാക്കാന്‍. ഇക്കോസ്‌പോര്‍ട് പോലുള്ള വാഹനങ്ങളുടെ ലോഞ്ചും ഈ വാഹനങ്ങളുടെ വില്‍പന ഇടിയുന്നതിന് കാരണമായിട്ടുണ്ട്.