ഒരു വാനിൽ 51 പേരെ കുത്തിക്കയറ്റിയപ്പോൾ

1974 മോഡൽ ഫോക്സ്‌വാഗൺ കാംപർ വാനിലാണ് 51 പേരെ കുത്തിനിറച്ച് റെക്കോഡിട്ടത്. ഇക്കൂട്ടത്തിൽ എല്ലാ പ്രായക്കാരും ഉണ്ടായിരുന്നു.

ഈ സംഗതി ഗിന്നസ് വേൾഡ് റെക്കോഡായി മാറിയിട്ടുണ്ട്. മെയ്ക്ക് എ വിഷ് ഫൗണ്ടേഷൻ എന്ന സന്നദ്ധസംഘടനയക്കു വേണ്ടി പണം സംഘടിപ്പിക്കാനാണ് ഇത്തരമൊരു ശ്രമം നടത്തിയത്.

കാൻസർ പോലുള്ള രോഗങ്ങൾ പിടിപെട്ട് മരിക്കുമെന്നുറപ്പായ കുട്ടികളുടെ ആഗ്രഹങ്ങൾ പൂർത്തീകരിക്കുകയാണ് ഈ സംഘടന ചെയ്യുന്നത്.

വോഴ്സെസ്റ്റ്ഷയറൽ വെച്ചു നടന്ന ബസ്‌ഫെസ്റ്റ് വാൻ ഫെസ്റ്റിവലിലാണ് ഇതു നടന്നത്. സെപ്തംബർ ആറിനായിരുന്നു സംഭവം.

കംഫർട്ട് ഇൻഷൂറൻസ് ആണ് ഈ പരിപാടി സംഘടിപ്പിച്ചത്. ബസ്‌ഫെസ്റ്റ് ഫെസ്റ്റിവലിൽ ഏതാണ്ട് 25000ത്തിലധികം പേരാണ് കാഴ്ചക്കാരായി വന്നത്.

പുത്തൻ ബസ്സുകളും വാനുകളുമെല്ലാം പ്രദർശനത്തിനെത്തിയ ഈ ഫെസ്റ്റിവലിൽ ക്ലാസിക് വാനുകളുടെ ഒരു വൻ നിരയും കാണാമായിരുന്നു. അയ്യായിരത്തിലധികം വാഹനങ്ങളാണ് ഫെസ്റ്റിവലിനെത്തിയത്.

തുടക്കത്തിൽ പരിപാടി പരാജയപ്പെടുമെന്നാണ് താൻ കരുതിയതെന്ന് പങ്കെടുത്തവരിലൊരാളായ കാൽവിൻ പറഞ്ഞു. പങ്കാളികളുടെ മികച്ച സഹകരണത്താൽ സംഗതി വിജയിക്കുകയായിരുന്നു.