അറഞ്ചം പുറഞ്ചം വീഴ്ച്ച; നനഞ്ഞ റോഡിൽ കൂടെ യാത്ര ചെയ്യുമ്പോൾ ശ്രദ്ധിക്കണേ

ഒരു പ്രത്യേക വഴിയിൽ എത്തുമ്പോൾ ബൈക്ക് യാത്രക്കാർ എല്ലാം തെന്നി വീഴുന്നു. അതും ഒന്നിന് പിറകേ ഒന്നായി. എന്തായിരിക്കും കാരണം? പ്രേതബാധ വല്ലോ ആയിരിക്കുമോ എന്ന് വിചാരിക്കേണ്ട. സംഭവം റോഡ് നനഞ്ഞ് കിടക്കുന്നതാണ്. കേരളത്തിലാണ് സംഭവം. അതായത് ഒരു പ്രൈവറ്റ് ബസിൻ്റെ പിന്നിലായി പൊയ്ക്കൊണ്ടിരുന്ന സ്കൂട്ടറുകൾ ഒന്നിന് പിറകേ ഒന്നായി വീണു.

ബസ് ഡ്രൈവർ സ്റ്റോപ്പിൽ ബ്രേക്ക് പിടിക്കുകയും, തൊട്ട് പിറകിൽ വന്ന സ്കൂട്ടർ യാത്രികൻ ബ്രേക്ക് പിടിച്ച് ബസിൻ്റെ അടുത്തായി നിർത്തി, പക്ഷേ അദ്യം വീണത് നാലാമത്തെ സ്കൂട്ടർ യാത്രികനാണ്. അയാൾക്ക് എന്തെങ്കിലും പറ്റിയോ എന്ന് അറിയാൻ തിരിഞ്ഞു നോക്കിയ മുന്നിലുളള രണ്ട് സ്കൂട്ടർ യാത്രക്കാരും തെന്നി വീഴുകയായിരുന്നു. പ്രൈവറ്റ് ബസിൻ്റെ പിന്നിലായി ഘടിപ്പിച്ചിരുന്ന ഡാഷ്ബോർഡ് ക്യാമറയിലാണ് ഈ രംഗങ്ങളെല്ലാം പതിഞ്ഞത്. യാത്രക്കാർ വീണത് കണ്ട് സമീപത്തുളള കടകളിൽ നിന്നെല്ലാം ആളുകൾ ഓടി വന്ന് പിടിച്ചെഴുന്നേൽപ്പിക്കുന്നതും കാണാം.

നനഞ്ഞ റോഡിൽ കൂടെ വാഹനമോടിക്കുന്നത് വളരെ സൂക്ഷിച്ചു വേണം. പ്രത്യേകിച്ച് ഹെവി വാഹനങ്ങൾ പോകുന്ന വഴിയിലൂടെ. കാരണം ഹെവി വാഹനങ്ങളിൽ പലതും പഴക്കം ചെന്നതും, ക്യത്യമായി മെയിൻ്റനെൻസ് നടത്താത്തതുമായ വാഹനങ്ങൾ ആണെങ്കിൽ വാഹനങ്ങളുടെ ഓയിൽ ചോരാൻ സാധ്യതയുണ്ട്. അങ്ങനെ ചോർന്നാൽ അത് വഴിയിൽ വീഴുകയും, മഴ പെയ്യുമ്പോൾ വെള്ളവുമായി കൂടി കലർന്ന് റോഡിൽ വഴുക്കലിന് കാരണമാകും. ഇത് ഇരുചക്ര വാഹനക്കാർക്ക് വലിയ ദോഷം ചെയ്യും.

ഇത്തരത്തിലുളള റോഡിൽ കൂടെ പോകുമ്പോൾ പെട്ടെന്ന് ബ്രേക്ക് പിടിക്കുന്നതും, ഹാൻഡിൽ പെട്ടെന്ന് തിരിക്കുന്നതും വലിയ അപകടത്തിന് കാരണമാകുമെന്ന് ഓർക്കുക. അത് മാത്രമല്ല നനഞ്ഞ് കിടക്കുന്നതും വെളളം കെട്ടി കിടക്കുന്നതുമായ റോഡിൽ അക്വാപ്ലാനിങ്ങിന് സാധ്യതയുണ്ട്. ടയറുകളും റോഡും തമ്മിലുള്ള കോൺടാക്റ്റ് പാച്ച് ഈ വെള്ളം തടസ്സപ്പെടുകയും ടയറുകളുടെ ട്രാക്ഷൻ അല്ലെങ്കിൽ ഗ്രിപ്പ് നഷ്ടപ്പെടുകയും ചെയ്യുന്നു. ഇത് കാർ അല്ലെങ്കിൽ ബൈക്ക് അനിയന്ത്രിതമായി തെന്നിമാറാൻ ഇടയാക്കുന്നു.

ഇത്തരമൊരു സാഹചര്യത്തിൽ, കാർ ഡ്രൈവർക്ക് കാറിന്റെ നിയന്ത്രണം നഷ്ടപ്പെടും, മാത്രമല്ല വാഹനത്തിന്റെ ബ്രേക്കുകളും സുരക്ഷാ സംവിധാനങ്ങളും പ്രവർത്തിക്കുകയുമില്ല. ടാറുമായി ബന്ധമില്ലാത്തതിനാൽ കാർ ജലോപരിതലത്തിൽ തെന്നി വീഴുന്നതാണ് കാരണം.നിങ്ങളുടെ സ്റ്റിയറിംഗ് വീൽ വളരെ ഭാരം കുറഞ്ഞതായിരിക്കുകയും വാഹനത്തിന്റെ ദിശയുടെ കാര്യത്തിൽ നിങ്ങൾക്ക് നിയന്ത്രണമില്ലാതാവുകയും ചെയ്താൽ അക്വാപ്ലാനിംഗ് അനുഭവപ്പെടുന്നുണ്ടോ എന്ന് നിങ്ങൾക്ക് അറിയാനാകും. അതോടൊപ്പം നിങ്ങൾക്ക് വലത് കാലിന് ഭാരമുണ്ടെങ്കിൽ, ടയറുകൾ സ്വതന്ത്രമായി കറങ്ങാൻ തുടങ്ങുന്നതിനാൽ എഞ്ചിന്റെ റെവ്വുകൾ വർധിക്കുന്നതും നിങ്ങൾ ശ്രദ്ധിച്ചേക്കാം.

അക്വാപ്ലാനിംഗ് സമയത്ത് ഒരു വ്യക്തിക്ക് കാര്യമായി ചെയ്യാൻ കഴിയുന്ന കാര്യങ്ങളില്ല. ആദ്യം ചെയ്യേണ്ടതും ഏറ്റവും വ്യക്തവുമായ കാര്യം ആക്സിലറേറ്റർ ഓഫ് ചെയ്യുക എന്നതാണ്. സ്റ്റിയറിംഗ് വീൽ തിരിക്കരുത്, കാരണം ടയറുകൾ വീണ്ടും റോഡുമായി സമ്പർക്കം പുലർത്തുന്ന ഉടൻ തന്നെ വാഹനം അഗ്രസ്സീവായി തിരിഞ്ഞേക്കാം.ടയറുകൾ വീണ്ടും ടാർമാക്കുമായി സമ്പർക്കം പുലർത്തുന്നതിന് കാർ വേഗത കുറയുന്നത് വരെ കാത്തിരിക്കുക എന്നതാണ് ഏറ്റവും നല്ല കാര്യം. ഇത് വാഹനത്തിന്റെ നിയന്ത്രണവും ഗ്രിപ്പും പുനഃസ്ഥാപിക്കും.

അക്വാപ്ലാനിംഗ് ഒഴിവാക്കാൻ നിങ്ങൾക്ക് ചെയ്യാൻ കഴിയുന്ന ഏറ്റവും എളുപ്പമുള്ള കാര്യം സ്ലോ ഡൗൺ ആണ്. ഇത് ടയറുകൾക്ക് വെള്ളം പുറന്തള്ളാൻ മതിയായ സമയം നൽകും. വേഗത മണിക്കൂറിൽ 40 കിലോമീറ്ററിൽ താഴെയായി നിലനിർത്തുക.പിന്നെ ടയറുകളുടെ അവസ്ഥ വളരെ നിർണ്ണായകമായ ഒരു ഫാക്ടറാണ്. ടയറിന്റെ ത്രെഡുകൾക്ക് കുറഞ്ഞത് 4 mm എങ്കിലും ആഴം ഉണ്ടായിരിക്കണം. ടയറുകൾക്ക് ശരിയായ പ്രഷർ ഉണ്ടെന്നും ഉറപ്പാക്കുകയും വേണം.