ബോബ് മേര്‍ലിയുടെ ലാന്‍ഡ് റോവര്‍ കാറിന് പുനര്‍ജന്മം!

താളുകളിലൂടെ നീങ്ങുക.

ബോബ് മേര്‍ലി ഉപയോഗിച്ചിരുന്ന ഒരു പിക്കപ്പ് ട്രക്ക് ഈയിടെ കണ്ടെത്തുകയുണ്ടായി. വളരെ പരിതാപകരമായ അവസ്ഥയിലായിരുന്നു ട്രക്ക് കിടന്നിരുന്നത്. സാന്‍ഡല്‍സ് റിസോര്‍ട്ട് ഇന്റര്‍നാഷണല്‍ എന്ന സ്ഥാപനം ഈ ട്രക്ക് ഏറ്റെടുക്കുകയും പുതുക്കി സംരക്ഷിക്കുകയും ചെയ്തു.

1977 മോഡല്‍ സീരീസ് 3 ലാന്‍ഡ് റോവര്‍ പിക്കപ്പാണ് ബോബ് മേര്‍ലിയുടെ പക്കലുണ്ടായിരുന്നത്. ഈ വാഹനം സ്വന്തമാക്കിയതിനു ശേഷം അധികകാലം ജീവിക്കുകയുണ്ടായില്ല മേര്‍ലി.

ഈ വാഹനവുമായി അച്ഛന്‍ വീട്ടിലെത്തിയ നാളുകള്‍ ഓര്‍മിച്ചെടുക്കുന്നുണ്ട് മേര്‍ലിയുടെ മക്കളില്‍ ചിലര്‍. അവസാനം നല്‍കിയ വീഡിയോയില്‍ ഇത് കാണാവുന്നതാണ്. ബോബ് മേര്‍ലിക്ക് പലരിലായി പത്തുപതിനൊന്ന് കുട്ടികളുണ്ട്.

ലാന്‍ഡ് റോവറിന്റെ 1,2,3 സീരീസുകളുടെ നിര്‍മാണ കാലയളവ് 40കളുടെ തുടക്കം മുതല്‍ 80കളുടെ തുടക്കം വരെയാണ്. ബോബ് മേര്‍ലിയുടെ ജീവിത കാലയളവും ഏതാണ്ട് ഇതുതന്നെയാണ്.

ബോബ് മേര്‍ലിയുടെ പക്കലുണ്ടായിരുന്ന സീരീസ് 3 ലാന്‍ഡ് റോവറിന്റെ നിര്‍മാണ കാലയളവ് 1971 മുതല്‍ 85 വരെയാണ്.

81ല്‍ മേര്‍ലി കാര്‍സര്‍ പിടിപെട്ട് മരിച്ചതിനു ശേഷം അദ്ദേഹത്തിന്റെ പിക്കപ്പ് ട്രക്ക് അനാഥമായി. 2012ല്‍ ഈ വാഹനം ചിലര്‍ കണ്ടെത്തുമ്പോള്‍ വളരെ മോശം നിലയിലായിരുന്നു. ചാസി അടക്കം എല്ലാ പ്രധാന ഘടകഭാഗങ്ങളും മാറ്റി പുതുക്കിയെടുക്കുകയായിരുന്നു മെക്കാനിക്കുകള്‍. രണ്ടുവര്‍ഷത്തോളം പണിയെടുക്കേണ്ടി വന്നു ഇതിന്.

സാന്‍ഡല്‍സ് റിസോര്‍ട്ട് ഇന്റര്‍നാഷണല്‍ ഈ വാഹനം ഏറ്റെടുത്ത് പുതുക്കിയതിനു ശേഷം കിങ്സ്റ്റണ്‍ ടൗണിലെ മ്യൂസിയത്തിന് കൈമാറിയിരിക്കുകയാണ്. മേര്‍ലി താമസിച്ചിരുന്ന വീട് മ്യൂസിയമാക്കി മാറ്റിയതാണിവിടം. ബോബ് മേര്‍ലി ഉപയോഗിച്ചിരുന്ന സംഗീതോപകരണങ്ങളും മറ്റും സൂക്ഷിച്ചിരിക്കുന്നത് ഈ മ്യൂസിയത്തിലാണ്.

ലാന്‍ഡ് റോവര്‍ സീരീസ് വാഹനങ്ങള്‍ എക്കാലത്തെയും ക്ലാസിക്കുകളുടെ ഗണത്തില്‍ പെടുത്താവുന്നവയാണ്. ലാന്‍ഡ് റോവര്‍ തന്നെ ഒരല്‍പം അഹങ്കാരത്തോടെ പറയാറുള്ളത്, പുറത്തിറങ്ങിയ സീരീസ് വാഹനങ്ങളില്‍ 70 ശതമാനവും ഇപ്പോഴും ഉപയോഗത്തിലുണ്ട് എന്നാണ്.

3 സീരീസ് വാഹനങ്ങള്‍ രണ്ട് ബോഡി ശൈലികളിലാണ് വിപണിയിലെത്തിയത്. ഒന്ന് സാധാരണ എസ്‌യുവിയുടേതും മറ്റൊന്ന് പിക്കപ്പ് ട്രക്കിന്റേതുമായിരുന്നു. ഇവയില്‍ പിക്കപ്പ് ട്രക്കാണ് ബോബ് മേര്‍ലി സ്വന്തമാക്കിയത്.

ബോബ് മേര്‍ലിയുടെ ലാന്‍ഡ് റോവര്‍ വീഡിയോ