ഗരാജിലുള്ളത് 4 എണ്ണം, ഇങ്ങനൊരു മെയ്ബാക്ക് 'കൊതിയന്‍'! അവസാന പടത്തിന് വാങ്ങിയത് 25 കോടി

തങ്ങള്‍ നിര്‍മിക്കുന്ന അത്യാഡംബര കാറുകള്‍ ജര്‍മന്‍ കമ്പനിയായ മെര്‍സിഡീസ് ബെന്‍സ് മെയ്ബാക്ക് (Mercedes Maybach) എന്ന ബ്രാന്‍ഡിന് കീഴിലാണ് പുറത്തിറക്കുന്നത്. ആഡംബര സംവിധാനം, ഉയര്‍ന്ന സുരക്ഷ, മികച്ച പ്രകടനം തുടങ്ങിയ ഘടകങ്ങള്‍ കാരണം ഇന്ത്യയിലെ സെലിബ്രിറ്റികള്‍ ഇപ്പോള്‍ മെര്‍സിഡീസ് മെയ്്ബാക്ക് കാറുകളുടെ പിറകെയാണ്. അതുകൊണ്ട് തന്നെ ആഡംബര കാറുകള്‍ക്കിടയില്‍ സെലിബ്രിറ്റി സ്റ്റാറ്റസുള്ള ബ്രാന്‍ഡായി ഇത് ചുരുങ്ങിയ നാളുകള്‍ കൊണ്ട് മാറി. ഇതിനോടകം നാല് മെയ്ബാക്ക് കാറുകള്‍ സ്വന്തമാക്കിയ ഒരു നടന്‍ ഇന്ത്യയിലുണ്ട്. അത് ആരാണെന്നാണ് നമ്മള്‍ പറയാന്‍ പോകുന്നത്.

ബോളിവുഡിലെ യുവതാരങ്ങള്‍ക്കിടയില്‍ ശ്രദ്ധേയനായ നടനാണ് ഷാഹിദ് കപൂര്‍ (Shahid Kapoor). നടന്‍ പങ്കജ് കപൂറിനെറയും നര്‍ത്തകി നീലിമ അസീമിന്റെയും മകനായ ഷാഹിദ് ഇഷ്ഖ് വിഷ്ഖ് എന്ന ചിത്രത്തിലൂടെയാണ് വെള്ളിത്തിരയില്‍ അരങ്ങേറിയത്. കരീന കപൂറിന്റെ കൂടെ അഭിനയിച്ച ഇംതിയാസ് അലി ചിത്രം 'ജബ് വി മെറ്റ്' ഷാഹിദിന് ഇന്ത്യയൊട്ടാകെ ആരാധകരെ നേടിക്കൊടുത്തു. തുടക്കത്തില്‍ റെമാന്റിക് വേഷങ്ങളില്‍ തളച്ചിടപ്പെട്ടിരുന്ന ഷാഹിദ് അടുത്ത കാലത്തായി ട്രാക്ക് മാറ്റിയിട്ടുണ്ട്.

കാമിനി, ഉട്ത പഞ്ചാബ്, പദ്മാവത്, കബീര്‍ സിംഗ് എന്നീ ചിത്രങ്ങളില്‍ ശ്രദ്ധേയ പ്രകടനം കാഴ്ചവെച്ച ഷാഹിദിന്റെ് ഏറ്റവും ഒടുവില്‍ പുറത്തിറങ്ങിയ ചിത്രമാണ് 'ദേവ'.മലയാളത്തിലെ സൂപ്പര്‍ ഹിറ്റ് സംവിധായകന്‍ റോഷന്‍ ആന്‍ഡ്രൂസിന്റെ കന്നി ബോളിവുഡ് ചിത്രമായ ദേവയില്‍ പൊലീസ് ഓഫീസറുടെ വേഷമാണ് നടന്‍ കൈകാര്യം ചെയ്തിരിക്കുന്നത്. റോഷന്റെ തന്നെ ഹിറ്റ് ചിത്രമായ മുംബൈ പൊലീസിന്റെ റീമേക്ക് ആണ് ദേവ എന്ന പറയപ്പെടുന്നു. എന്നാല്‍ ചിത്രത്തിന്റെ ക്ലൈമാക്‌സിലടക്കം മാറ്റങ്ങള്‍ വരുത്തിയതായാണ് റിപ്പോര്‍ട്ടുകള്‍.

ചിത്രത്തില്‍ ഷാഹിദിന്റെ പ്രതിഫലം 25 കോടി രൂയാണെന്നാണ് റിപ്പോര്‍ട്ടുകള്‍. ദേവയുടെ റിലീസിന് മുന്നോടിയായി ഷാഹിദ് ഒരു പുതിയ മെയ്ബാക്ക് ഗരാജിലെത്തിച്ചിരുന്നു. ഇതോടെ ഒന്നും രണ്ടുമല്ല നാല് മെയ്ബാക്കുകള്‍ ഗരാജിലുള്ള ആദ്യ നടനായി മാറിയിരിക്കുകയാണ് ഷാഹിദ്. ജര്‍മന്‍ കാറുകളോട് പ്രത്യേക അഭിനിവേഷം വെച്ച് പുലത്തുന്ന നടന്‍ 2023 ഡിസംബറില്‍ ഒരു മെയ്ബാക്ക് GLS 600 സ്വന്തമാക്കിയിരുന്നു. ഡീപ് മെറ്റാലിക് ഗ്രീന്‍ ഷെയ്ഡിലുള്ള കാറാണ് അദ്ദേഹം അന്ന് വാങ്ങിയത്.

ഭാര്യ മീര കപൂറിനൊപ്പം കാറില്‍ കറങ്ങുന്ന ചിത്രങ്ങള്‍ അടക്കം നടന്‍ അന്ന് പങ്കുവെച്ചിരുന്നു. ഇന്ത്യയില്‍ 3.39 കോടി രൂപ ആണ് ഈ മോഡലിന്റെ വില. 4.0 ലിറ്റര്‍ ട്വിന്‍-ടര്‍ബോ V8 പെട്രോള്‍ എഞ്ചിന്‍ 549 bhp പവറും 770 Nm പീക്ക് ടോര്‍ക്കും സൃഷ്ടിക്കുന്നു. 20 bhp അധിക പവറും 250 Nm ബൂസ്റ്റും നല്‍കുന്ന 48V മൈല്‍ഡ്-ഹൈബ്രിഡ് സജ്ജീകരണവും ഇതിന് ലഭിക്കുന്നു.

മെയ്ബാക്ക് GLS 600 കൂടാതെ മെയ്ബാക്ക് S680, പ്രിസ്‌റ്റൈന്‍ വൈറ്റ് ഷേഡിലുള്ള S580, S400 എന്നിവയും കപൂര്‍ സ്വന്തമാക്കി. 2022 ഏപ്രിലാണ് താരം മെയ്ബാക്ക് S580 മോഡലിന്റെ ഡെലിവറിയെടുത്തത്. മെയ്ബാക്ക് S 580-യെ കുറിച്ച് പറയുമ്പോള്‍ ബ്രാന്‍ഡ് ഈ മോഡല്‍ ചക്കനിലെ പ്ലാന്റില്‍ വെച്ച് പ്രാദേശികമായി അസംബിള്‍ ചെയ്യുന്നു. സ്റ്റാന്‍ഡേര്‍ഡ് എസ്-ക്ലാസുമായി താരതമ്യപ്പെടുത്തുമ്പോള്‍ നീളമുള്ള വീല്‍ബേസോടെയാണ് ഇത് വരുന്നത് കൂടാതെ യാത്രക്കാര്‍ക്ക് കൂടുതല്‍ സ്‌പെയ്‌സും ലെഗ് റൂമും വാഗ്ദാനം ചെയ്യുന്നു.

മെയ്ബാക്ക് S580 ഏറ്റവും പുതിയ തലമുറ MBUX ഇന്‍ഫോടെയ്ന്‍മെന്റ് സിസ്റ്റവും നാപ്പാ ലെതര്‍ അപ്‌ഹോള്‍സ്റ്ററി, ബര്‍മെസ്റ്റര്‍ സൗണ്ട് സിസ്റ്റം, കൂടാതെ ആക്ടീവ്-പാസീവ് സേഫ്റ്റി എയ്ഡുകള്‍ എന്നിവയുമായാണ് വരുന്നത്.496 bhp കരുത്തും 700 Nm ടോര്‍ക്കും ഉത്പാദിപ്പിക്കുന്ന 4.0 ലിറ്റര്‍ ട്വിന്‍-ടര്‍ബോ V8 എഞ്ചിനാണ് മെയ്ബാക്ക് S580 സെഡാന്റെ കരുത്ത്. ഈ പവര്‍പ്ലാന്റ് ഇക്യു ബൂസ്റ്റ് 48-വോള്‍ട്ട് മൈല്‍ഡ്-ഹൈബ്രിഡ് സിസ്റ്റവുമായി ഇണചേരുന്നു.

ഈ ഹൈബ്രിഡ് സാങ്കേതികവിദ്യ പ്രാരംഭ ആക്‌സിലറേഷനും ഇന്ധനക്ഷമതയും മെച്ചപ്പെടുത്തുന്നതിന് സഹായിക്കുന്നു. റിയര്‍ വീല്‍ ഡ്രൈവ് (RWD) കോണ്‍ഫിഗറേഷനും 9-സ്പീഡ് ഓട്ടോമാറ്റിക് ട്രാന്‍സ്മിഷനുമായാണ് ഈ വാഹനം വരുന്നത്. മെയ്ബാക്ക് S680-യുടെ കാര്യം വരുമ്പോള്‍ ഇത് ഒരു സിബിയു യൂണിറ്റായി രാജ്യത്ത് എത്തുകയും ചില ആഡംബര സവിശേഷതകളോടെ അത്യാധുനിക സാങ്കേതികവിദ്യ വാഗ്ദാനം ചെയ്യുകയും ചെയ്യുന്നു.

ഷാഹിദ് കപൂറിന്റെ ഗാരേജിലെ ഏറ്റവും പുതിയ കൂട്ടിച്ചേര്‍ക്കല്‍ പുതിയ മെയ്ബാക്ക് GLS 600 നൈറ്റ് സീരീസ് ആണ്. ഈ മോഡലിന്റെ ഇന്ത്യയിലെ ആദ്യത്തെ ഉടമയാണ് നടന്‍ എന്നാണ് റിപ്പോര്‍ട്ടുകള്‍. ഈ ലിമിറ്റഡ് എഡിഷന്‍ മോഡലിന് 4.4 കോടി രൂപയാണ് വില. ബ്ലാക്ക്ഡ്-ഔട്ട് ട്രിമ്മുകളും ആക്സന്റുകളുമായാണ് വാഹനം വരുന്നത്. ഫ്രണ്ട് ഗ്രില്ലില്‍ കൂടുതല്‍ റോസ് ഗോള്‍ഡ് ഇന്‍സെര്‍ട്ടുകളുള്ള ഇതിന് 22 ഇഞ്ച് അലോയ് വീലുകള്‍ ലഭിക്കുന്നു. കാറിന്റെ ഇന്റീരിയറും കറുപ്പിലാണ് പൂര്‍ത്തിയാക്കിയിരിക്കുന്നത്.

എസ്‌യുവിയുടെ ഡിജിറ്റല്‍ ഇന്‍സ്ട്രുമെന്റ് ക്ലസ്റ്ററിന് എക്‌സ്‌ക്ലൂസീവ് നൈറ്റ് സീരീസ് ആനിമേഷനും ലഭിക്കുന്നു. 12.3 ഇഞ്ച് ടച്ച്സ്‌ക്രീന്‍ ഇന്‍ഫോടെയ്ന്‍മെന്റ് യൂണിറ്റ്, 27-സ്പീക്കര്‍ സൗണ്ട് സിസ്റ്റം, 64-കളര്‍ ആംബിയന്റ് ലൈറ്റിംഗ് തുടങ്ങിയ ഫീച്ചറുകളുള്ള മെയ്ബാക്ക് GLS 600 നൈറ്റ് സീരീസില്‍ മെക്കാനിക്കല്‍ മാറ്റങ്ങളൊന്നുമില്ല. സ്റ്റാന്‍ഡേര്‍ഡ് വേരിയന്റുകളില്‍ കാണുന്ന അതേ 4.0 ലിറ്റര്‍ ട്വിന്‍-ടര്‍ബോ V8 പെട്രോള്‍ എഞ്ചിന്‍ തന്നെയാണ് ഇതിന്റെയും ഹൃദയം.