ബൈക്ക് ആക്സിലറേറ്റര്‍ എന്തുകൊണ്ടാണ് വലതുവശത്ത് വെച്ചിരിക്കുന്നതെന്ന് അറിയാമോ? സംഗതി സിംപിളാണ്

കോടിക്കണക്കിന് ജനങ്ങളുള്ള ഒരു വലിയ രാജ്യമാണ് നമ്മുടെ സ്വന്തം ഇന്ത്യ. ഇന്ന് നമ്മുടെ രാജ്യത്തെ മിക്ക വീടുകളിലും ചുരുങ്ങിയത് ഒരു വാഹനമെങ്കിലും ഉണ്ടാവാം. അത് ഒരുപക്ഷേ ഇരുചക്ര വാഹനമോ അല്ലെങ്കില്‍ സൈക്കിളോ ഒക്കെ ആവാം അത്. വികസ്വര രാജ്യമായ ഇന്ത്യയിലെ വാഹന ഉടമകളില്‍ ഭൂരിഭാഗവും ഇരുചക്രവാഹന ഉടമകളായിരിക്കും.

ഇന്ത്യന്‍ കുടുംബങ്ങളിലെ വാഹനങ്ങളുടെ കണക്ക് നോക്കിയാല്‍ 7.50 ശതമാനം മാത്രമേ കാര്‍ ഉടമസ്ഥരുള്ളൂ. എന്നാല്‍ ജനസംഖ്യയുടെ 55 ശതമാനത്തിലധികം ആളുകള്‍ക്ക് സൈക്കിളോ സ്‌കൂട്ടറോ മോട്ടോര്‍സൈക്കിളോ ഉണ്ട് എന്നതാണ് വാസ്തവം. ഇന്ന് ഇന്ത്യയില്‍ ഇരുചക്ര വാഹനങ്ങളില്ലാത്ത വീടുകളില്ല എന്ന അവസ്ഥയിലേക്കാണ് കാര്യങ്ങള്‍ എത്തിയിരിക്കുന്നത്. ഗ്രാമത്തിലായാലും നഗരത്തിലായാലും ഓരോ വീട്ടിലും കുറഞ്ഞത് ഒരു ഇരുചക്ര വാഹനമെങ്കിലും ഉണ്ട്. ഏതാനും വീടുകളില്‍ ഓരോ കുടുംബാംഗത്തിനും ഇരുചക്ര വാഹനമുണ്ട്.

5G സ്പീഡില്‍ പായുന്ന ഇന്നത്തെ ലോകത്ത് ഏറ്റവും ഉപകാരപ്രദവും ചെലവ് കുറഞ്ഞതുമായ ഗതാഗത മാര്‍ഗമായതിനാലാണ് അധികവും സാധാരണക്കാരായ ഇന്ത്യയില്‍ അതിന്റെ എണ്ണം ഇന്നും ഉയര്‍ന്ന് നില്‍ക്കുന്നത്. അതുകൊണ്ടുതന്നെ മിക്കവാറും എല്ലാവര്‍ക്കും ഇരുചക്രവാഹനമുണ്ട്. ഈ ഇരുചക്രവാഹനങ്ങള്‍ക്കെല്ലാം പൊതുവായ ഒരു കാര്യമുണ്ട്. ടൂ വീലറിന്റെ വേഗത കൂട്ടാനും കുറക്കാനും നിയന്ത്രിക്കാനും നമ്മള്‍ കൈകൊണ്ട് പ്രവര്‍ത്തിപ്പിക്കുന്ന ഭാഗമായ ആക്‌സിലറേറ്റര്‍ വലതുവശത്താണ് സ്ഥിതി ചെയ്യുന്നത് എന്നതാണ് ആ പൊതുവായ കാര്യം.

ഏത് തരത്തിലുള്ള ഇരുചക്രവാഹനവും അത് സ്‌കൂട്ടറോ ബൈക്കോ ആകട്ടെ, നിര്‍മ്മാണം പരിഗണിക്കാതെ തന്നെ, ആക്‌സിലറേറ്റര്‍ വലതുവശത്താണ്. എന്തുകൊണ്ടാണ് എല്ലാ ഇരുചക്രവാഹനങ്ങളിലും പൊതുവെ വലതുവശത്ത് മാത്രം ആക്സിലറേറ്റര്‍ നല്‍കുന്നത്?. എന്തുകൊണ്ടാണ് ഇത് ഇടതുവശത്ത് നല്‍കാത്തത്?. ഇക്കാര്യം നിങ്ങള്‍ എപ്പോഴെങ്കിലും ചിന്തിച്ചിട്ടുണ്ടോ?. ഈ ചോദ്യങ്ങള്‍ക്ക് നിങ്ങള്‍ ഉത്തരം തേടുന്നുണ്ടെങ്കില്‍, തുടര്‍ന്ന് വായിക്കുക. ഇരുചക്രവാഹനങ്ങളില്‍ വലതുവശത്ത് ആക്‌സിലറേറ്റര്‍ നല്‍കുന്നതിന് പ്രധാനമായും രണ്ട് കാരണങ്ങളുണ്ട്. ലോകജനസംഖ്യയില്‍ ഭൂരിഭാഗവും വലംകൈയ്യന്മാരാണ് എന്നതാണ് ഇതിന്റെ പ്രാഥമിക കാരണം.

നിങ്ങള്‍ക്ക് അറിയാവുന്ന 100 പേരെ കുറിച്ച് ചിന്തിക്കുക. ഇവരില്‍ 90 ശതമാനത്തിലധികം പേരും വലംകൈയ്യന്‍മാരായിരിക്കും. ഇടംകൈയ്യന്‍മാരെ കണ്ടെത്തുക വളരെ വിരളമായി മാത്രമേ നമുക്ക് കാണാനാകൂ. അതിനാല്‍ അവരുടെ സൗകര്യാര്‍ത്ഥം ആക്‌സിലറേറ്റര്‍ വലതുവശത്ത് നല്‍കിയിരിക്കുന്നു. ലോകത്ത് ഏത് ഉല്‍പ്പന്നം നിര്‍മ്മിച്ചാലും അത് ഭൂരിപക്ഷം ആളുകള്‍ക്കും ഉപയോഗിക്കാന്‍ എളുപ്പമാകുന്ന തരത്തിലായിരിക്കാനാണ് നിര്‍മാതാക്കള്‍ ശ്രദ്ധിക്കുക. ഇരുചക്ര വാഹനങ്ങളുടെ കാര്യത്തിലും ഇക്കാര്യം തന്നെ പിന്തുടരുന്നു. വലംകൈയ്യന്‍മാരാണ് ഈ ലോകത്ത് ഭൂരിപക്ഷം.

ഇടതുകൈയേക്കാള്‍ മികച്ച നിയന്ത്രണവും ശക്തിയും വലതുകൈയിലുണ്ട്. അതുകൊണ്ടാണ് എല്ലാ ഇരുചക്രവാഹന നിര്‍മ്മാതാക്കളും വലതുവശത്ത് ആക്‌സിലറേറ്റര്‍ നല്‍കുന്നത്. ഉദാഹരണത്തിന് ഇരുചക്രവാഹനങ്ങളില്‍ ആക്‌സിലറേറ്റര്‍ വലതുവശത്താണ്, അതിനാല്‍ മിക്ക ആളുകള്‍ക്കും മറ്റ് വാഹനമോടിക്കുന്നവര്‍ക്ക് ഇടതു കൈകൊണ്ട് സിഗ്‌നല്‍ നല്‍കാന്‍ കഴിയും. വലംകൈയ്യന്‍മാരായ ആളുകള്‍ക്ക് അവരുടെ വലതു കൈകൊണ്ടാണ് ഏറ്റവും പ്രധാനപ്പെട്ട ജോലി ചെയ്യാന്‍ സാധിക്കുന്നത്. ഇടതുകൈ കൊണ്ട് ആക്‌സിലറേറ്റര്‍ പ്രവര്‍ത്തിപ്പിച്ചാല്‍ അവര്‍ക്ക് വലതു കൈകൊണ്ട് സിഗ്‌നല്‍ നല്‍കാന്‍ കഴിയില്ല.

ഹാന്‍ഡ് സിഗ്‌നലുകള്‍ നല്‍കുന്നത് ഒരു ഉദാഹരണം മാത്രം. ഭൂരിഭാഗം ആളുകളും എല്ലാ വശങ്ങളിലും സുഖപ്രദമായിരിക്കണമെന്ന് മനസ്സില്‍ വെച്ചുകൊണ്ട്, വലതുവശത്ത് ആക്‌സിലറേറ്റര്‍ നല്‍കിയിരിക്കുന്നു. എല്ലാ ഇരുചക്രവാഹനങ്ങള്‍ക്കും വലതുവശത്ത് ആക്സിലറേറ്റര്‍ ഉള്ളതിന്റെ മറ്റൊരു കാരണം സുരക്ഷയാണ്. അതെ ഇരുചക്രവാഹനങ്ങളുടെ ഇത്തരത്തിലുള്ള രൂപകല്‍പ്പനയ്ക്ക് പിന്നില്‍ വാഹനം ഓടിക്കുന്നവരുടെയും പിന്നിലിരിക്കുന്നവരുടെയുമെല്ലാം സുരക്ഷിതത്വവും കൂടി പരിഗണിക്കുന്നുണ്ട്. ഒരു കൈ ഇടതുവശത്തെ ഹാന്‍ഡില്‍ ബാറിലും ഒരു കൈ പിന്‍ ഭാഗത്ത് പിടിച്ചും പിന്നിലേക്ക് വലിച്ചാണ് നമ്മള്‍ ടൂ വീലര്‍ സെന്റര്‍ സ്റ്റാന്‍ഡില്‍ ഇടുന്നത്.

അങ്ങനെയിരിക്കുമ്പോള്‍ ഇടതുവശത്ത് ആക്‌സിലറേറ്റര്‍ കൊടുത്താല്‍ അബദ്ധത്തില്‍ റെയ്‌സ് ആകാന്‍ സാധ്യതയുണ്ട്. ഒരുപക്ഷേ എഞ്ചിന്‍ 'ഓണ്‍' ആണെങ്കില്‍ വണ്ടി സെന്റര്‍ സ്റ്റാന്‍ഡില്‍ ഇടുമ്പോള്‍ നമ്മള്‍ അറിയാതെ ആക്‌സിലറേറ്റര്‍ പ്രവര്‍ത്തിപ്പിച്ചു പോയേക്കാം. ഇത് അബദ്ധത്തില്‍ സംഭവിച്ചാല്‍ അപകടങ്ങള്‍ സംഭവിക്കാന്‍ സാധ്യതയുണ്ട്. ഇരുചക്രവാഹനം പെട്ടെന്ന് മുന്നോട്ട് നീങ്ങി മറ്റുള്ള ആളുകളുമായും മറ്റ് വാഹനങ്ങളുമായും കൂട്ടിയിടിച്ചേക്കാം. ഈ കാരണം കണക്കിലെടുത്താണ് ഇരുചക്രവാഹനങ്ങള്‍ക്ക് ഇടതുവശത്ത് പകരം വലതുവശത്ത് ആക്‌സിലറേറ്റര്‍ നല്‍കിയിരിക്കുന്നത്. എന്തുകൊണ്ടാണ് എല്ലാ ഇരുചക്രവാഹനങ്ങളിലും ആക്‌സിലറേറ്റര്‍ വലതുവശത്ത് നല്‍കിയിരിക്കുന്നത് എന്ന നിങ്ങളുടെ സംശയങ്ങള്‍ക്ക് ഇപ്പോള്‍ ഉത്തരം ലഭിച്ചുവെന്നാണ് ഞങ്ങളുടെ പ്രതീക്ഷ.