Click it and Unblock the Notifications
ബുക്കും പേപ്പറും മാത്രം പോര! വണ്ടി വില്ക്കുമ്പോള് ഉണ്ടായിരിക്കേണ്ട സുപ്രധാന രേഖകള് ഇതൊക്കെയാണ്...
നിങ്ങള് ഒരു കാര് ഉടമയാണെങ്കില് ചിലപ്പോള് അത് വില്ക്കേണ്ട സാഹചര്യം വന്നേക്കാം. ചിലപ്പോള് കാര് അപ്ഗ്രേഡ് ചെയ്യുന്നതിനോ മറ്റ് വല്ല കാരണങ്ങള് കൊണ്ടോ സ്വന്തം ഉടമസ്ഥതയില് ഉള്ള വാഹനം വില്ക്കേണ്ടി വരാം. വാഹനം ഉപയോഗിക്കുമ്പോള് കൈയ്യില് കരുതുന്നത് പോലെ തന്നെ വണ്ടി വില്ക്കുമ്പോഴും നമ്മുടെ പക്കല് ചില സുപ്രധാന രേഖകള് ഉണ്ടായിരിക്കേണ്ടതുണ്ട്. ഇന്ത്യയില് യൂസ്ഡ് വാഹനം വില്ക്കുകയോ വാങ്ങുകയോ ചെയ്യുമ്പോള് ഇടപാട് സുഗമവും നിയമപരവുമാണെന്ന് ഉറപ്പാക്കുന്നതിന് നിരവധി രേഖകള് ആവശ്യമാണ്. ഇന്ത്യയില് ഒരു കാര് വില്ക്കുന്നതിന് ആവശ്യമായ രേഖകളെ കുറിച്ച് ചുവടെ വിശദമായി വിവരിക്കാം.
നാടന് ഭാഷയില് നമ്മള് പറയുന്ന ബുക്കും പേപ്പറും തന്നെയാണ് ഒരു വാഹനം വാങ്ങുകയോ അല്ലെങ്കില് വില്ക്കുകയോ ചെയ്യുമ്പോള് പ്രധാനമായും ശരിയാണോ എന്ന് പരിശോധിക്കേണ്ടത്. വാഹനത്തിന്റെ ഉടമസ്ഥതയും രജിസ്ട്രേഷനും തെളിയിക്കുന്ന രജിസ്ട്രേഷന് സര്ട്ടിഫിക്കറ്റ് അല്ലെങ്കില് ആര്സിയാണ് പ്രധാനം. ഈ രേഖയില്ലാതെ വാഹനം നിയമപരമായി വില്പ്പന നടത്താന് കഴിയില്ല. രണ്ടാമതായി വേണ്ടത് ഉടമസ്ഥാവകാശം കൈമാറ്റം ചെയ്യുന്നതിനുള്ള ഫോം അഥവാ ഫോം 29 ആണ്.
വില്പ്പനക്കാരനില് നിന്ന് വാങ്ങുന്നയാള്ക്ക് ഉടമസ്ഥാവകാശം കൈമാറാന് വേണ്ടിയാണ് ഇത് ഉപയോഗിക്കുന്നത്. പുതിയ ഉടമയ്ക്ക് വാഹനം കൈമാറ്റം ചെയ്യാന് ഈ ഫോം കൃത്യമായി പൂരിപ്പിക്കണം. മൂന്നാമത്തെ രേഖയാണ് നോ ഒബ്ജക്ഷന് സര്ട്ടിഫിക്കറ്റ് അഥവാ എന്ഒസി. വാഹനം ഫിനാന്സ് ഇട്ട് അല്ലെങ്കില് ലോണില് വാങ്ങിയതാണെങ്കില് ബാങ്കില് നിന്നോ അല്ലെങ്കില് ബന്ധപ്പെട്ട ധനകാര്യ സ്ഥാപനത്തില് നിന്നോ എന്ഒസി ഉണ്ടായിരിക്കേണ്ടത് വാഹനം വില്ക്കുന്നതിന് അത്യന്താപേക്ഷികമാണ്. വാഹനത്തിന് കുടിശ്ശികയൊന്നും ഇല്ലെന്ന് ഈ രേഖ സ്ഥിരീകരിക്കുന്നു.
മാത്രമല്ല വാഹനം എമിഷന് മാനദണ്ഡങ്ങള് പാലിക്കുന്നുണ്ടെന്ന് കാണിക്കാന് സാധുവായ പൊല്യൂഷന് അണ്ടര് കണ്ട്രോള് (പിയുസി) സര്ട്ടിഫിക്കറ്റ് ആവശ്യമാണ്. വില്പ്പനയുമായി മുന്നോട്ട് പോകുന്നതിന് മുമ്പ് ഈ സര്ട്ടിഫിക്കറ്റ് കാലികമാണെന്ന് ഉറപ്പാക്കുക. മറ്റൊരു പ്രധാനപ്പെട്ട രേഖയാണ് ഇന്ഷൂറന്സ് സര്ട്ടിഫിക്കറ്റ്. വാഹനത്തിന് സാധുതയുള്ള ഇന്ഷുറന്സ് പരിരക്ഷയുണ്ടെന്ന് തെളിയിക്കാന് ഈ രേഖ ആവശ്യമാണ്. വണ്ടി വില്ക്കുമ്പോള് ഇത് പുതിയ ഉടമയ്ക്ക് കൈമാറണം.
വാഹനവുമായി ബന്ധപ്പെട്ട എല്ലാ നികുതികളും തീര്പ്പാക്കിയെന്ന് സ്ഥിരീകരിക്കാന് റോഡ് നികുതി അടച്ചതിന്റെ തെളിവ് ആവശ്യമാണ്. ഈ രസീത് ഡോക്യുമെന്റേഷന് പാക്കേജില് ഉള്പ്പെടുത്തണം. വാഹനം വില്ക്കുമ്പോള് ഉടമ തങ്ങളുടെ മേല്വിലാസം തെളിയിക്കാന് ആധാര് കാര്ഡ് അല്ലെങ്കില് പാസ്പോര്ട്ട് പോലുള്ള രേഖകള് ഹാജരാക്കണം. മാത്രമല്ല വാഹനം വില്ക്കുന്നയാളുടെ പാന് കാര്ഡ് അല്ലെങ്കില് ഡ്രൈവിംഗ് ലൈസന്സ് പോലുള്ള ഒരു ഐഡന്റിറ്റി പ്രൂഫ് ആവശ്യമാണ്. ഇത് വാഹനം വില്ക്കുന്ന വ്യക്തി യഥാര്ത്ഥത്തില് അതിന്റെ ഉടമയാണെന്ന് ഉറപ്പാക്കുന്നു.
വില്പന നിയമപരമായി പൂര്ത്തിയാക്കുന്നതിനുള്ള ഒരു നിര്ണായക ഘട്ടമായി ഫോം 30 ആവശ്യമാണ്. ഉടമസ്ഥാവകാശം കൈമാറ്റം ചെയ്യുന്നതിനെക്കുറിച്ച് ഫോം 30 റീജിയണല് ട്രാന്സ്പോര്ട്ട് ഓഫീസിനെ (ആര്ടിഒ) നോട്ടിഫൈ ചെയ്യുന്നു. വാഹനത്തിന്റെ കണ്ടീഷനും നിലവിലുള്ള വായ്പകളും വ്യക്തമാക്കുന്ന സത്യവാങ്മൂലം വില്പ്പനക്കാരന് നല്കണം. കാറിന് എന്തെങ്കിലും തരത്തിലുള്ള സാമ്പത്തിക ബാധ്യതകള് ഉണ്ടെങ്കില് അതിനെ കുറിച്ചുള്ള സുതാര്യത വരുത്തുന്നതിനാണ് ഇത്.
വിശദമായ സെയില്സ് ഇന്വോയ്സാണ് അവസാന ഘട്ടത്തില് പെടുന്ന ഒന്ന്. ഇതില് വാഹനത്തെ കുറിച്ചുള്ള വിശദാംശങ്ങള്, വില്ക്കുന്ന വില, പേയ്മെന്റ് നിബന്ധനകള് എന്നിവ ഉള്പ്പെടുത്തണം. വാങ്ങുന്നയാളും വില്ക്കുന്നയാളും തമ്മിലുള്ള ഇടപാടിന്റെ ഔപചാരിക രേഖയായി ഇത് നിലകൊള്ളുന്നു. ഉടമസ്ഥാവകാശം ഔദ്യോഗികമായി കൈമാറ്റം ചെയ്യുന്ന പ്രക്രിയ പൂര്ത്തിയാക്കാന് ആര്സി, ഫോം 29 എന്നിവയില് ആര്ടിഒയില് നിന്നുള്ള അംഗീകാരം ആവശ്യമാണ്. ഈ അംഗീകാരങ്ങള് ഉടനടി ലഭിക്കുന്നുണ്ടെന്ന് ഉറപ്പാക്കാന് ശ്രദ്ധിക്കുക.
നിങ്ങള് വാഹനം വില്ക്കാന് ഉദ്ദേശിക്കുന്ന വ്യക്തിയാണെങ്കില് അതിന് മുമ്പേ തന്നെ വാഹനവുമായി ബന്ധപ്പെട്ട നികുതികളും പിഴകളും പോലുള്ള എല്ലാ കുടിശ്ശികകളും തീര്പ്പാക്കാന് ശ്രമിക്കുക. ഭാവിയില് ഉണ്ടായേക്കാവുന്ന പ്രശ്നങ്ങള് ഒഴിവാക്കാന് ഉടമസ്ഥാവകാശം കൈമാറുന്നതിനെക്കുറിച്ച് ഇന്ഷുറന്സ് കമ്പനിയെ അറിയിക്കുക. മാത്രമല്ല വണ്ടിയുടെ എല്ലാ താക്കോലുകളും ഓണേഴ്സ് മാനുവല് അടക്കമുള്ള കാര്യങ്ങളും പുതിയ ഉടമയ്ക്ക് നല്കണം. മുകളില് പറഞ്ഞ രേഖകള് എല്ലാം ശരിയാക്കി വെച്ചാല് തടസങ്ങള് ഇല്ലാതെ എളുപ്പത്തില് വാഹനം വില്ക്കാന് നിങ്ങള്ക്ക് സാധിക്കും.
Continue with Google