സൂക്ഷിച്ചോ; പണി ഫാസ്ടാഗിൻ്റെ രൂപത്തിലും കിട്ടാം

തന്റെ ഡിജിറ്റൽ വാലറ്റ് ഫാസ്ടാഗുമായി ബന്ധിപ്പിച്ചതിനെ തുടർന്ന് 60,000 രൂപ നഷ്ടപ്പെട്ടതായി 81 കാരിയായ സ്ത്രീയുടെ പരാതി. ബെൻസൺ ടൗണിൽ താമസിക്കുന്ന ഡോ.മേരി ജോണിന്റെ പേടിഎം അക്കൗണ്ടിൽ നിന്നാണ് അജ്ഞാത വാഹനത്തിന്റെ ഫാസ്ടാഗ് റീചാർജ് ചെയ്തതുവെന്ന സന്ദേശം വന്നതും പണം നഷ്ടപ്പെട്ടതും.

സ്ഥാപനത്തിന്റെ കസ്റ്റമർ കെയർ എന്ന് കരുതുന്ന ഒരു നമ്പർ ഡയൽ ചെയ്തപ്പോഴാണ് സൈബർ തട്ടിപ്പുകാർ ബാങ്ക് അക്കൗണ്ടിൽ നിന്ന് 60,000 രൂപ തട്ടിയെടുത്തു. ഡിസംബർ 12 ന്, ഒരു അജ്ഞാത വാഹനത്തിന് ടോൾ ചാർജ് നൽകാൻ തന്റെ ഫാസ്‌ടാഗ് ബാലൻസ് ഉപയോഗിക്കുന്നതായി ഡോ. മേരിക്ക് ഒരു സന്ദേശം ലഭിച്ചു. പേടിഎം കസ്റ്റമർ കെയറിനായി ഓൺലൈനിൽ തിരഞ്ഞപ്പോൾ, സൈബർ തട്ടിപ്പുകാർ പ്രവർത്തിപ്പിക്കുന്ന 01204456456 നമ്പർ കണ്ടെത്തി.

അത് ഡയൽ ചെയ്തപ്പോൾ, വരിയുടെ മറ്റേ അറ്റത്തുള്ള ആൾ അവളുടെ പരാതി കേട്ട് അത് പരിഹരിക്കാമെന്ന് വാഗ്ദാനം ചെയ്തു. അയാൾ പേടിഎം അക്കൗണ്ട് ഐഡിയും ബാങ്ക് അക്കൗണ്ട് വിവരങ്ങളും ആവശ്യപ്പെട്ടു. അടുത്ത ദിവസം, ഡോ. മേരിക്ക് ഒന്നിലധികം ഫോൺ കോളുകൾ വന്നു, വന്ന കോളുകളെല്ലം സ്പാം കോളുകളായിരുന്നു. ഉച്ചയ്ക്ക് 12.20 ഓടെ അക്കൗണ്ടിൽ നിന്ന് 39,999 രൂപ ഡെബിറ്റ് ചെയ്തതായി സന്ദേശം ലഭിച്ചു.

ഇതിന് പിന്നാലെ 2000 രൂപ വീതം അഞ്ച് ഡെബിറ്റ് കൂടി. ഉച്ചയ്ക്ക് 1.20 ഓടെ മൂന്ന് ഇടപാടുകൾ കൂടി നടന്നു (5,000 രൂപ, 3,000 രൂപ, 1,999 രൂപ). എന്താണ് സംഭവിച്ചതെന്ന് മനസിലാക്കാൻ കഴിയാതെ മേരി ഇടപാടുകളെ കുറിച്ച് അന്വേഷിക്കാൻ ബാങ്കിലേക്ക് ചെന്നു. തഹാമിദ് അൻസാരി, പുരുഷോത്തമ ബി യു എന്നിവരുടെ പേരിലുള്ള യുപിഐ അക്കൗണ്ടുകളിലേക്കാണ് തുക ട്രാൻസ്ഫർ ചെയ്തതെന്ന് ബാങ്ക് ജീവനക്കാർ പറഞ്ഞു. ഉടൻ തന്നെ മേരി ജെ.സി നഗർ പോലീസ് സ്റ്റേഷനിൽ പരാതി നൽകി.

മേരിയുടെ പരാതിയിൽ സൈബർ കുറ്റവാളികളെന്ന് സംശയിക്കുന്ന അൻസാരിക്കും പുരുഷോത്തമനുമെതിരെ പോലീസ് കേസെടുത്തു. മേരിയുടെ ഡിജിറ്റൽ വാലറ്റിൽ നിന്ന് മറ്റൊരു വാഹനത്തിന്റെ ഫാസ്ടാഗ് എങ്ങനെ റീചാർജ് ചെയ്തുവെന്ന് അന്വേഷിക്കുന്നുണ്ടെന്നും ഒരു മുതിർന്ന ഉദ്യോഗസ്ഥൻ പറഞ്ഞു. ബിനാമി ബാങ്ക് അക്കൗണ്ടുകൾ ഉപയോഗിച്ചാണ് ഈ തട്ടിപ്പുകൾ നടത്തുന്നതെന്നും അക്കൗണ്ട് ഉടമകൾക്ക് കമ്മീഷൻ നൽകാറുണ്ടെന്നും പോലീസ് പറയുന്നു.

പണം അപഹരിക്കാൻ സൈബർ കുറ്റവാളികൾ ഡിജിറ്റൽ വാലറ്റും ബാങ്ക് അക്കൗണ്ട് വിവരങ്ങളും ശേഖരിക്കുന്നുണ്ടെന്ന് ഒരു പോലീസ് ഉദ്യോഗസ്ഥൻ പറഞ്ഞു. വ്യക്തിവിവരങ്ങളും ബാങ്ക് അക്കൗണ്ട് വിശദാംശങ്ങളും ഫോണിലൂടെ ആരുമായും പങ്കിടരുതെന്ന് തങ്ങൾ ജനങ്ങൾക്കിടയിൽ അവബോധം സൃഷ്ടിക്കുന്നുണ്ട്, എന്നാൽ സൈബർ ഹാക്കർമാരും കുറ്റവാളികളും ഇപ്പോഴും ജനങ്ങളെ പറ്റിക്കുന്നു. ആളുകൾ ഉടൻ തന്നെ ബാങ്ക് സന്ദർശിക്കുകയോ 112 എന്ന നമ്പറിൽ വിളിക്കുകയോ ചെയ്യണമെന്നും അങ്ങനെ ചെയ്താൽ തട്ടിപ്പുകാരന്റെ ബാങ്ക് അക്കൗണ്ട് ഉടൻ മരവിപ്പിക്കാമെന്നും പോലീസ് പറയുന്നു.

ടോൾ പ്ലാസകളിലെ ഗതാഗതക്കുരുക്കും നീണ്ട ക്യൂവും ഒഴിവാക്കാൻ ലക്ഷ്യമിട്ടാണ് കേന്ദ്ര സർക്കാർ നേരത്തെ ഫാസ്ടാഗ് സംവിധാനം കൊണ്ട് വന്നത്. FASTag നിർബന്ധമാക്കിയിട്ടും ഇല്ലാത്തവർക്ക് വൻതുക ഫൈൻ ഏർപ്പെടുത്തിയിട്ടും ഗതാഗതക്കുരുക്കിന് മാത്രം പരിഹാരം ഉണ്ടായിട്ടില്ലെന്നതാണ് വാസ്തവം. ദേശീയ പാതകളിലും മറ്റ് ടോൾ റോഡുകളിലുമെല്ലാം ടോൾ പ്ലാസകൾ സൃഷ്ടിക്കുന്ന ഗതാഗതക്കുരുക്ക് നിർബാധം തുടരുന്നു. ഇതിനെല്ലാം ഒടുവിൽ ടോൾ പ്ലാസകൾ തന്നെയാണ് പ്രശ്നം എന്ന തിരിച്ചറിവിലേക്ക് സർക്കാർ എത്തിയിരിക്കുകയാണ്.

ടോൾ പ്ലാസകൾക്കും ഫാസ്ടാഗിനും പകരമായി പുതിയ ടോൾ പിരിവ് സംവിധാനം ഏർപ്പെടുത്താൻ തയ്യാറെടുക്കുകയാണ് റോഡ് ഗതാഗത, ഹൈവേ മന്ത്രാലയം. പൂർണമായും ഓട്ടോമേറ്റഡ് ആയി വരുന്ന പുതിയ ടോൾ പിരിവിന് ടോൾ പ്ലാസകളും ഫാസ്ടാഗും ആവശ്യമില്ല. ഓട്ടോമാറ്റിക് നമ്പർ പ്ലേറ്റ് റീഡർ (ANPR) എന്നാണ് ഈ പുതിയ സംവിധാനത്തിന്റെ പേര്. എഎൻപിആർ ക്യാമറകൾ വഴി വാഹനങ്ങളുടെ നമ്പർ പ്ലേറ്റ് സ്കാൻ ചെയ്താണ് ടോൾ ഈടാക്കുന്നത്.

സ്കാൻ ചെയ്യുന്ന നമ്പർ പ്ലേറ്റുകൾ രജിസ്റ്റർ ചെയ്തിരിക്കുന്ന ആളിന്റെ ബാങ്ക് അക്കൌണ്ടിൽ നിന്നും നേരിട്ടാണ് ടോൾ തുക ഈടാക്കുന്നത്. ഇതോടെ ടോൾ പ്ലാസകളിലെ നീണ്ട ക്യൂ ഇല്ലാതാകുമെന്നാണ് സർക്കാർ കരുതുന്നത്. ഇതിനായി വാഹനങ്ങളുടെ നമ്പർ പ്ലേറ്റുകളിലും മാറ്റങ്ങൾ വരുത്തും. രാജ്യത്തുടനീളമുള്ള എല്ലാ ടോൾ പ്ലാസകളിലും പുതിയ സംവിധാനം കൊണ്ട് വരാനാണ് സർക്കാർ ലക്ഷ്യമിടുന്നത്.