ഫോര്‍ഡ് ഫ്രീസ്റ്റൈല്‍ ഓഫ്‌റോഡിംഗിന് ഇറങ്ങിയാല്‍ — വീഡിയോ

കാഴ്ചയില്‍ പരുക്കനാണ് ഫ്രീസ്റ്റൈല്‍. ബോഡിയ്ക്ക് അടിവരയിടുന്ന പ്ലാസ്റ്റിക് ക്ലാഡിംഗും 15 ഇഞ്ച് അലോയ് വീലുകളും റൂഫ് റെയിലുകളും മാത്രം മതി ഒറ്റനോട്ടത്തില്‍ കാര്‍ പരുക്കനാണെന്നു അനുഭവപ്പെടാന്‍. ഇതൊക്കെയാണെങ്കിലും ഓഫ്‌റോഡിംഗിന് ഫോര്‍ഡ് ഫ്രീസ്റ്റൈലിനെ കൂടെക്കൂട്ടാമോ? കാര്‍ പ്രേമികള്‍ക്ക് ഈ സംശയമുണ്ട്.

ബി സെഗ്മന്റ് ഹാച്ച്ബാക്കായതു കൊണ്ടു ഓഫ്‌റോഡിംഗിന് ഇറങ്ങിയാല്‍ ഫ്രീസ്റ്റൈല്‍ വഴിക്കാവുമെന്ന് പലരും കരുതുന്നു. എന്നാല്‍ ഓഫ്‌റോഡ് സാഹസത്തിന് ഇറങ്ങിയ ഫോര്‍ഡ് ഫ്രീസ്റ്റൈല്‍ ഈ മുന്‍വിധികളെല്ലാം തെറ്റിക്കും.

എന്‍ഡവറിന്റെയും ഫ്രീസ്റ്റൈലിന്റെയും കരുത്തുകാട്ടാന്‍ ഫോര്‍ഡ് ഡീലര്‍ഷിപ്പ് സംഘടിപ്പിച്ച പരിപാടിയില്‍ നിന്നാണ് ദൃശ്യങ്ങള്‍. അമിതവേഗത്തിലും നിയന്ത്രണം നഷ്ടപ്പെടാതെ കുതിക്കുന്ന ഫ്രീസ്റ്റൈലില്‍ നിന്നു തുടങ്ങും ദൃശ്യങ്ങള്‍.

പ്രത്യേക ആക്ടിവ് റോള്‍ഓവര്‍ പ്രൊട്ടക്ഷന്‍ (ARP) ഫ്രീസ്റ്റൈലില്‍ കമ്പനി നല്‍കുന്നുണ്ട്. ഇക്കാരണത്താല്‍ എത്രവേഗത്തില്‍ വന്നു വളച്ചാലും കാര്‍ മറിയുകയില്ല. കാലുകള്‍ നിലത്തുറച്ച് നില്‍ക്കും. വീഡിയോയിലും ഇതു കാണാം.

കുഴികള്‍ താണ്ടുമ്പോഴും കോണിപ്പടികള്‍ കയറിയിറങ്ങുമ്പോഴും ഫ്രീസ്റ്റൈല്‍ എവിടെയും കിതക്കുന്നില്ല. ഉയര്‍ന്ന 190 mm ഗ്രൗണ്ട് ക്ലിയറന്‍സ് പ്രായണങ്ങളിലെല്ലാം ഫ്രീസ്റ്റൈലിനെ തുണച്ചു. 1.2 ലിറ്റര്‍ പെട്രോള്‍, 1.5 ലിറ്റര്‍ ഡീസല്‍ എഞ്ചിന്‍ പതിപ്പുകളാണ് ഫ്രീസ്റ്റൈലിലുള്ളത്.

പ്രതിബന്ധങ്ങള്‍ കീഴടക്കാനുള്ള കരുത്ത് ഫ്രീസ്റ്റൈല്‍ എഞ്ചിനുകള്‍ക്കുണ്ടെന്ന കാര്യം ദൃശ്യങ്ങളില്‍ വ്യക്തം. വെല്ലുവിളിയേകുന്ന പ്രതലങ്ങളില്‍ ആവശ്യമായ ഗ്രിപ്പ് നേടാന്‍ വീതിയേറിയ 15 ഇഞ്ച് വീലുകള്‍ക്ക് കഴിയുന്നുണ്ടെന്നതും ഇവിടെ എടുത്തുപറയണം.

അഭ്യാസങ്ങള്‍ക്കെല്ലാം ഒടുവില്‍ വെള്ളക്കെട്ട് മുറിച്ചു കടക്കുന്ന ഫ്രീസ്റ്റൈല്‍, തനിക്ക് ഓഫ്‌റോഡിംഗ് പ്രാപ്യമാണെന്നു പറഞ്ഞുവെയ്ക്കുന്നു.

95 bhp കരുത്തും 120 Nm torque ഉം സൃഷ്ടിക്കാന്‍ ഫ്രീസ്റ്റൈലിലുള്ള 1.2 ലിറ്റര്‍ ഡ്രാഗണ്‍ സീരീസ് പെട്രോള്‍ എഞ്ചിന് കഴിയും. 1.5 ലിറ്റര്‍ ഡീസല്‍ എഞ്ചിന്‍ 100 bhp കരുത്തും 250 Nm torque -മാണ് പരമാവധിയേകുക.

ഇരു എഞ്ചിന്‍ പതിപ്പുകളിലും അഞ്ചു സ്പീഡാണ് മാനുവല്‍ ഗിയര്‍ബോക്‌സ്. എഞ്ചിന്‍ സ്റ്റാര്‍ട്ട്/സ്റ്റോപ് ബട്ടണ്‍, ഓട്ടോമാറ്റിക് ക്ലൈമറ്റ് കണ്‍ട്രോള്‍, വൈദ്യുത പിന്തുണയാല്‍ മടങ്ങുന്ന മിററുകള്‍, മഴ തിരിച്ചറിയുന്ന വൈപ്പറുകള്‍, ഓട്ടോമാറ്റിക് ഹെഡ്‌ലാമ്പുകള്‍ എന്നിവ ഫ്രീസ്‌റ്റൈലിലെ ഫീച്ചറുകളാണ്.

സുരക്ഷയുടെ കാര്യത്തിലും ഫ്രീസ്റ്റൈല്‍ ഒട്ടും പിന്നിലല്ല. മുന്നില്‍ ഇരട്ട എയര്‍ബാഗുകള്‍, ആന്റി-ലോക്ക് ബ്രേക്കിംഗ് സംവിധാനം, ഇലക്ട്രോണിക് ബ്രേക്ക്ഫോഴ്സ് ഡിസ്ട്രിബ്യൂഷന്‍, റിവേഴ്സ് പാര്‍ക്കിംഗ് സെന്‍സറുകള്‍, എഞ്ചിന്‍ ഇമൊബിലൈസര്‍, സീറ്റ് ബെല്‍റ്റ് റിമൈന്‍ഡര്‍, കീലെസ് എന്‍ട്രി എന്നിങ്ങനെ നീളും ഫ്രീസ്‌റ്റൈലിലെ സുരക്ഷാ സജ്ജീകരണങ്ങള്‍.

ഏറ്റവും ഉയര്‍ന്ന ഫ്രീസ്‌റ്റൈല്‍ പതിപ്പുകള്‍ക്ക് സൈഡ് - കര്‍ട്ടന്‍ എയര്‍ബാഗുകള്‍, എമര്‍ജന്‍സി അസിസ്റ്റന്‍സ് ഫീച്ചറുകളുമുണ്ട്. 5.09 ലക്ഷം രൂപ മുതലാണ് ഫ്രീസ്റ്റൈലിന് വിപണിയില്‍ വില. മാരുതി സുസുക്കി ഇഗ്നിസ്, ടൊയോട്ട എത്തിയോസ് ക്രോസ്, ഫിയറ്റ് അവഞ്ചൂറ, ഹ്യുണ്ടായി ആക്ടിവ് i20 എന്നിവരാണ് ഫോര്‍ഡ് ഫ്രീസ്റ്റൈലിന്റെ എതിരാളികള്‍.

Source: YouTube