ഡോർ തുറന്നിട്ട് വാഹനമോടിച്ച് ക്രെറ്റ ഡ്രൈവർക്ക് കിട്ടിയ പണി ഇങ്ങനെ; വൈറൽ വീഡിയോ കാണാം

സോഷ്യൽ മീഡിയയിൽ ശ്രദ്ധ പിടിച്ചു പറ്റാൻ പല വാഹനമുടമകളും പല തരത്തിലുളള കോപ്രായങ്ങൾ കാണിക്കുന്നത് നിങ്ങൾ കാണാറുണ്ട്. അത്തരത്തിലൊരു അഭ്യാസമാണ് ഹ്യുണ്ടായി ക്രെറ്റയിൽ സഞ്ചരിച്ച രണ്ട് പേർ കാണിച്ചു കൂട്ടിയത്. എല്ലാ സോഷ്യൽ മീഡിയയിലും വീഡിയോ വൈറലായിരിക്കുകയാണ്. ഹ്യൂണ്ടായ് ക്രെറ്റ എസ്‌യുവിയുടെ മുൻവശത്തെ രണ്ട് ഡോറുകളും തുറന്ന് ഓടിക്കുന്നത് വൈറലായതോടെ ഹരിയാനയിൽ നിന്നുള്ള ഡ്രൈവർക്ക് പോലീസ് 3,500 രൂപ പിഴ ചുമത്തിയിരിക്കുകയാണ്.

ഇത്തരം സാഹസങ്ങൾ കാണിക്കുന്നത് അദ്ദേഹത്തിന് മാത്രമല്ല റോഡിലൂടെ പോകുന്ന മറ്റ് യാത്രക്കാർക്കും വാഹനങ്ങൾക്കും അപകടമുണ്ടാക്കിയേക്കാം.വീഡിയോയിൽ ഡ്രൈവർ ഡോർ തുറന്നിരിക്കുന്നതും സഹ യാത്രക്കാരൻ ഡോറിൽ അപകടകരമായി തൂങ്ങിക്കിടക്കുന്നതും കാണാം. വാഹനം ഓടിക്കൊണ്ടിരിക്കുമ്പോഴാണ് ഇത് ചെയ്തിരിക്കുന്നത്. മണാലിയിൽ വച്ചാണ് ഈ പ്രവർത്തി കാണിച്ചത്.

വീഡിയോ വൈറലായത് പ്രാദേശിക പോലീസ് ഉദ്യോഗസ്ഥരുടെ ശ്രദ്ധയിൽപ്പെട്ടതോടെ ആണ് ഡ്രൈവർക്ക് പിഴ ചുമത്തിയത്. എന്നാൽ സോഷ്യൽ മീഡിയയിൽ പലരും ഇത് വളരെ കുറവാണെന്നും പിഴ തുകയുടെ അവസാനം മറ്റൊരു പൂജ്യം കൂടി ചേർക്കണമായിരുന്നു എന്നു കമൻ്റ് ചെയ്തവർ ഉണ്ട്. ഇത്തരം സ്റ്റണ്ടുകൾ ചെയ്യാതിരിക്കാൻ മറ്റുളളവർക്ക് പാഠമാകാൻ കാർ പിടിച്ചെടുക്കുകയും ഡ്രൈവറെ താൽക്കാലികമായി കസ്റ്റഡിയിൽ വയ്ക്കുകയും ചെയ്യേണ്ടതായിരുന്നു എന്നു കമൻ്റുകളുണ്ട്.

ഹിമാചൽ പ്രദേശിലെ മലനിരകളിലേക്ക് തണുപ്പുകാലം ആയത് കൊണ്ട് ആയിരക്കണക്കിന് വിനോദസഞ്ചാരികളാണ് വന്നതെന്ന് റിപ്പോർട്ടുകൾ സൂചിപ്പിക്കുന്നു. മണാലിയും ഷിംലയും ഉൾപ്പെടെ ഇവിടുത്തെ പ്രധാന വിനോദസഞ്ചാര കേന്ദ്രങ്ങളിലും പരിസരങ്ങളിലും വൻ ഗതാഗതക്കുരുക്കിനും കുരുക്കിനും ഇത് കാരണമായിട്ടുണ്ട്. ഗതാഗതക്കുരുക്ക് മൂലം വാഹനമോടിക്കുന്നവർക്ക് മണിക്കൂറുകളോളം കാത്തുനിൽക്കേണ്ടി വരുന്നതായി റിപ്പോർട്ടുകൾ വന്നിരുന്നു.റോഡ് നിയമങ്ങൾ ലംഘിക്കുന്ന വാഹനമോടിക്കുന്നവർക്കെതിരെ വേഗത്തിലും കർശനമായും നടപടിയെടുക്കുമെന്ന് ഹിമാചൽ പ്രദേശ് പോലീസ് കർശനമായി നിർദേശം നൽകിയിട്ടുണ്ട്.

മുഖംമിനുക്കിയെത്തുന്ന ക്രെറ്റ എസ്‌യുവി അടുത്ത മാസം അവതരിപ്പിക്കാനുള്ള ഒരുക്കത്തിലാണ് ഹ്യുണ്ടായി. 2024 ജനുവരി 16-ന് ക്രെറ്റ ഫെയ്‌സ്‌ലിഫ്റ്റിന്റെ അരങ്ങേറ്റമുണ്ടാകും. ഏറ്റവും പുതിയ സ്പൈ ഇമേജുകള്‍ എസ്‌യുവിയുടെ പിന്‍ഭാഗത്തെ ഹൈലൈറ്റ് ചെയ്തിട്ടുള്ളതാണ്. ട്രെന്‍ഡ് ഫോളോ ചെയ്ത് ഹ്യുണ്ടായി കാറിന് റിവേഴ്‌സ്ഡ് 'L' ആകൃതിയിലുള്ള യൂണിറ്റുകളടങ്ങുന്ന കണക്റ്റഡ് എല്‍ഇഡി ടെയില്‍ലൈറ്റുകള്‍ നല്‍കുമെന്നാണ് സ്പൈ ചിത്രങ്ങളിൽ നിന്ന് മനസിലാകുന്നത്.

റിയര്‍ സ്പോയിലറുമായി സംയോജിപ്പിച്ചിരിക്കുന്ന ഹൈ മൗണ്ടഡ് ബ്രേക്ക് ലാമ്പും ടെയില്‍ഗേറ്റ് മൗണ്ടഡ് രജിസ്ട്രേഷന്‍ പ്ലേറ്റും ആണ് ക്രെറ്റ ഫെയ്‌സ്‌ലിഫ്റ്റിന്റെ പിന്‍വശത്തെ ശ്രദ്ധേയമായ മറ്റ് രണ്ട് ഹൈലൈറ്റുകള്‍. തല്‍ഫലമായി കമ്പനി ലോഗോയുടെ സ്ഥാനം ചെറുതായി മാറും. ഇവ കൂടാതെ എസ്‌യുവിയുടെ മുന്നിലും പിന്നിലും ബമ്പറുകള്‍ പൊളിച്ചുപണിയും. പുനര്‍രൂപകല്‍പ്പന ചെയ്ത ഗ്രില്ലും എല്‍ഇഡി ഹെഡ്ലാമ്പുകളും ഉപയോഗിച്ച് മുന്‍വശം പൂര്‍ണമായും നവീകരിക്കും. പുതിയ 5-സ്‌പോക്ക് ഡ്യുവല്‍-ടോണ്‍ അലോയ് വീലുകളാണ് മറ്റൊരു പ്രധാന മാറ്റം.

ക്രെറ്റ ഫെയ്‌സ്‌ലിഫ്റ്റില്‍ 1.5 ലിറ്റര്‍ നാച്ചുറലി ആസ്പിരേറ്റഡ് പെട്രോള്‍ എഞ്ചിനും 1.5 ലിറ്റര്‍ CRDi ഡീസല്‍ എഞ്ചിനും ഹ്യുണ്ടായി നിലനിര്‍ത്താനാണ് സാധ്യത. 1.2 ലിറ്റര്‍ NA പെട്രോള്‍ എഞ്ചിന്‍ 114 bhp പവറും 144 Nm പീക്ക് ടോര്‍ക്കും പുറപ്പെടുവിക്കുന്നു. അതേസമയം ഡീസല്‍ എഞ്ചിന്‍ 114 bhp പവറും 250 Nm ടോര്‍ക്കും നല്‍കുന്ന തരത്തിലാണ് ട്യൂണ്‍ ചെയ്തിരിക്കുന്നത്.

ഈ വര്‍ഷം ആദ്യം നിര്‍ത്തലാക്കിയ 1.4 ലിറ്റര്‍ ടര്‍ബോചാര്‍ജ്ഡ് പെട്രോള്‍ എഞ്ചിന് പകരം പുതിയ 1.5 ലിറ്റര്‍ ടര്‍ബോചാര്‍ജ്ഡ് പെട്രോള്‍ യൂണിറ്റ് ഹ്യുണ്ടായി പവര്‍ട്രെയിന്‍ ഓപ്ഷനില്‍ ഉള്‍പ്പെടുത്താന്‍ സാധ്യതയുണ്ട്. ഹ്യുണ്ടായി വെര്‍ണയിലും കിയ സെറ്റോസിലും സേവനമനുഷ്ഠിക്കുന്ന ഈ മോട്ടോര്‍ 158 bhp കരുത്തില്‍ 253 Nm ടോര്‍ക്ക് വരെ ഉത്പാദിപ്പിക്കുന്നു.

6 സ്പീഡ് മാനുവല്‍, 6 സ്പീഡ് ഓട്ടോമാറ്റിക്, ഒരു സിവിടി ഓട്ടോമാറ്റിക്, 7 സ്പീഡ് ഡ്യുവല്‍ ക്ലച്ച് ഓട്ടോമാറ്റിക്, 6 സ്പീഡ് ക്ലച്ച്‌ലെസ് മാനുവല്‍ എന്നിവയായിരിക്കും ട്രാന്‍സ്മിഷന്‍ ഓപ്ഷനില്‍ വരിക. ഗണ്യമായ സൗന്ദര്യവര്‍ദ്ധക മെച്ചപ്പെടുത്തലുകള്‍ക്കും ഫീച്ചറുകള്‍ അപ്ഗ്രേഡുകള്‍ക്കും വിധേയമാകും, ഫെയ്‌സ്‌ലിഫ്റ്റ് പതിപ്പിലും കമ്പനി കൂടുതല്‍ ഫീച്ചറുകള്‍ ചേര്‍ക്കും.