Click it and Unblock the Notifications
ഉടമയ്ക്ക് മാത്രമല്ല വർക്ഷോപ്പിനും കിട്ടും പണി; എംവിഡിയുടെ കിടിലൻ പണി
വാഹനങ്ങളില് മോഡിഫിക്കേഷൻ ചെയ്ത് രൂപമാറ്റം നടത്തുന്നവര്ക്കെതിരേ മോട്ടോർവാഹന വകുപ്പിൻ്റെ കർശന നടപടി ആരംഭിച്ചിരിക്കുകയാണ്. ഒരു തവണ പിടികൂടി പിഴയടച്ച വാഹനങ്ങള് അതേ നിയമലംഘനങ്ങളുമായി വെഹിക്കിള് ഇന്സ്പെക്ടര്മാര് വീണ്ടും പിടികൂടിയിരിക്കുകയാണ്. ഒരുവട്ടം നടപടിയെടുത്തിട്ടും തെറ്റ് ആവര്ത്തിച്ചതോടെ മോഡിഫിക്കേഷൻ നടത്തിയവർക്ക് നല്ല ചിമിട്ടൻ പണിയുമായിട്ടാണ് മോട്ടോർ വാഹനവകുപ്പ് ഇത്തവണ ഇറങ്ങാൻ പോകുന്നത്.
2019-ൽ പുതുക്കിയ ദേശീയ റോഡ് നിയമങ്ങളുടെ അടിസ്ഥാനത്തിൽ വാഹനങ്ങളിലെ രൂപമാറ്റം വരുത്തുന്ന വര്ക്ക് ഷോപ്പുകള്, ഡീലര്മാരുടെ സര്വീസ് സെന്റര് തുടങ്ങിയ സ്ഥാപനങ്ങള്ക്കെതിരേയെല്ലാം നടപടിയെടുക്കും. ഒരു വാഹനത്തിന് മാത്രം രൂപമാറ്റം വരുത്തിയാൽ പിഴ എന്ന് പറയുന്നത് ഒരു ലക്ഷം രൂപയാണ്. ഗുരുതരമായ കുറ്റകൃത്യമാണെങ്കില് ഒരുവര്ഷത്തെ തടവും ലഭിക്കാവുന്ന കുറ്റം ചുമത്തുമെന്നുമാണ് അധികൃതര് പറഞ്ഞിരിക്കുന്നത്.
ഏത് സ്ഥാപനമാണ് മോഡിഫിക്കേഷൻ ചെയ്തതെന്ന് പിടികൂടിയ വാഹന ഉടമകളോട് ചോദിച്ചതിന് ശേഷം തുടര് നടപടിയുമായി ഇവരെ സമീപിക്കുകയും ചെയ്യും. നമ്പര്പ്ലേറ്റ് മടക്കിയും മറച്ചുവെച്ചുമുള്ള വാഹനങ്ങളുപയോഗിച്ച് പല കുറ്റകൃത്യങ്ങളും വര്ധിച്ചതോടെയാണ് ഉദ്യോഗസ്ഥര് വര്ക്ക്ഷോപ്പുകാര്ക്കെതിരേ പണി തുടങ്ങിയിരിക്കുന്നത്. വാഹനങ്ങളിലെ ഓരോ രൂപമാറ്റത്തിനും 5,000 രൂപയാണ് പിഴയായി വാഹന ഉടമ അടയ്ക്കേണ്ടതെന്ന് അധികൃതർ അറിയിച്ചു.
അനധികൃത രൂപമാറ്റം വരുത്തിയ വാഹന ഉടമകളെയും സ്ഥാപനങ്ങളെയും പിടികൂടാനുള്ള മോട്ടോര്വാഹന വകുപ്പിൻ്റെ പ്രത്യേക ദൗത്യത്തിലുളള ആദ്യഘട്ടം പിടികൂടിയത് 20 ഇരുചക്രവാഹനങ്ങളാണ്. വാഹനങ്ങളുടെ ഉടമകളോട് അധികൃതര്ക്കു മുന്നില് ഹാജരാവാന് ആവശ്യപ്പെട്ട് നോട്ടീസ് നല്കിയിട്ടുണ്ട്. സൈലന്സറുകള് മാറ്റിവെച്ച വാഹനങ്ങളാണ് പിടികൂടിയ വാഹനങ്ങളെല്ലാം. ബുധനാഴ്ച കൊച്ചി നഗരത്തിലെയും സമീപ പ്രദേശങ്ങളിലെയും റെയില്വേ സ്റ്റേഷനുകള്, മെട്രോ സ്റ്റേഷനുള്പ്പെടെയുള്ള പാര്ക്കിങ് കേന്ദ്രങ്ങള്, വര്ക്ക്ഷോപ്പുകള്, വാഹനഡീലര്മാരുടെ സര്വീസ് സെന്ററുകള് എന്നിവിടങ്ങളിലാണ് ഉദ്യോഗസ്ഥര് പരിശോധന നടത്തിയത്.
തെളിച്ചമുള്ള ഹെഡ്ലാമ്പുകള് അല്ലെങ്കില് ഓക്സിലറി ലാമ്പുകള്, ഉച്ചത്തിലുള്ള ഹോണുകള്, മാര്ക്കറ്റില് ലഭിക്കുന്ന ഉച്ചത്തിലുള്ള സൈലന്സറുകള് എന്നിവയുടെ ഉപയോഗം ഇപ്പോഴും നിയമവിരുദ്ധമാണ്. എന്നിരുന്നാലും, ഡീലര്ഷിപ്പ് തലത്തില് നിര്മ്മാതാവ് വാഗ്ദാനം ചെയ്യുന്ന പരിഷ്കാരങ്ങളോ അനുബന്ധ ഉപകരണങ്ങളോ ഉടമയ്ക്ക് വാഹനത്തില് ഉള്ക്കൊള്ളിക്കാം.
പെട്രോള് അല്ലെങ്കില് ഡീസല് കാറുകള് ഉപയോഗിക്കുന്ന ആളുകള്ക്കും അവരുടെ വാഹനങ്ങള് സിഎന്ജി അല്ലെങ്കില് ഇലക്ട്രിക് വാഹനങ്ങളാക്കി മാറ്റാനുള്ള ഓപ്ഷന് ലഭിക്കും. അംഗീകൃത കിറ്റുകള് ഉപയോഗിച്ച് വാഹനം നിയമപരമായി സിഎന്ജിയിലേക്കോ ഇലക്ട്രിക്കിലേക്കോ മാറ്റാം. ഈ വാഹനങ്ങളുടെ രജിസ്ട്രേഷന് സര്ട്ടിഫിക്കറ്റ് മാറ്റുന്നതിന് ഉടമ അംഗീകൃത ബോഡികളില് നിന്നുള്ള ശരിയായ രേഖകള് ഹാജരാക്കണം.
വാഹന ഉടമകള്ക്ക് അവരുടെ വാഹനം കാരവാനാക്കി മാറ്റാന് അനുവദിക്കുന്ന മാര്ഗ്ഗനിര്ദ്ദേശങ്ങളും കേരള എംവിഡി പുറത്തിറക്കി. മൂന്ന് വര്ഷത്തിലധികം പഴക്കമുള്ള വാഹനങ്ങള്ക്ക് മാത്രമേ ഇത് ബാധകമാകൂ. മൂന്ന് വര്ഷത്തിലധികം പഴക്കമുള്ള വാഹനം നിയമപരമായി കാരവാനാക്കി മാറ്റാം. സംസ്ഥാനം ഈയിടെയായി കാരവന് ടൂറിസത്തെ പ്രോത്സാഹിപ്പിക്കുന്നുണ്ട്. ഈ പുതിയ മാര്ഗ്ഗനിര്ദ്ദേശങ്ങള് സംസ്ഥാന സര്ക്കാരിന്റെ ഈ നീക്കത്തിന് പ്രോത്സാഹനമാകും.
കാരവാനുകളായി മാറ്റാന് അര്ഹതയുള്ള വാഹനങ്ങളെ ബോഡി കോഡില് നിന്ന് ഒഴിവാക്കിയിരിക്കുന്നു. ബോഡി വര്ക്ക് ഷോപ്പുകളും വാഹനത്തിന്റെ രൂപകല്പ്പനയില് ആവശ്യമായ മാറ്റങ്ങള് വരുത്തുമ്പോഴും പിന്തുടരുന്ന ഒരു കൂട്ടം നിയമമാണിത്. ഈ വാഹനങ്ങളെ ബോഡി കോഡില് നിന്ന് ഒഴിവാക്കിയിട്ടുണ്ടെങ്കിലും വാഹന ഉടമകള്ക്ക് ഏത് ഡിസൈനും തിരഞ്ഞെടുക്കാം എന്ന് അതിന് അര്ഥമില്ല. എംവിഡി നിയമങ്ങള് അനുസരിച്ചും സൗണ്ട് എഞ്ചിനീയറിംഗ് പ്രാക്ടീസ് അനുസരിച്ചുമാണ് നിര്മ്മാണം നടത്തേണ്ടത്.
യഥാര്ത്ഥ ഷാസി, സസ്പെന്ഷന്, ബ്രേക്കുകള് തുടങ്ങി വാഹനത്തിന്റെ ഇന്ധന സംവിധാനത്തില് പോലും മാറ്റം വരുത്തരുത്. മറ്റ് സംസ്ഥാനങ്ങളെ അപേക്ഷിച്ച് കേരളത്തില് രൂപമാറ്റം വരുത്തിയ വാഹനങ്ങളുടെ എണ്ണം കൂടുതലാണ്. ഇതേത്തുടര്ന്ന് വിധി വന്നതിന് ശേഷം രൂപമാറ്റം വരുത്തിയ കാറുകള് കണ്ടെത്തുന്നതിനും പിഴ ഈടാക്കുന്നതിനുമായി പൊലീസും എംവിഡിയും സംസ്ഥാനത്ത് വ്യാപകമായ പരിശോധനകള് നടത്തിയിരുന്നു.
പല കാരണങ്ങള് കൊണ്ട് കേരളത്തിലെ മോട്ടോര് വാഹന വകുപ്പ് അധികൃതരെ വണ്ടിപ്രാന്തന്മാര്ക്ക് അധികം താല്പര്യമില്ല. മോഡിഫൈ ചെയ്ത വാഹനങ്ങള്ക്കെതിരെ മോട്ടോര് വാഹന വകുപ്പ് ഉദ്യോഗസ്ഥര് നടപടിയെടുക്കുന്നതും ട്രാഫിക് നിയമങ്ങള് ലംഘിക്കുന്ന വാഹനങ്ങള്ക്ക് പിഴ ചുമത്തുന്നതും അതിനുള്ള കാരണങ്ങളില് ചിലതാണ് മുകളിൽ പറഞ്ഞതൊക്കെ.
Continue with Google