508 കിലോമീറ്റർ പോകാൻ 2.5 മണിക്കൂർ! ജപ്പാനിൽ മാത്രമല്ല ഇന്ത്യയിലും എത്തും ബുള്ളറ്റ് ട്രെയിൻ

ഇന്ത്യയുടെ സ്വപ്ന പദ്ധതികളിലൊന്നായ ആദ്യത്തെ ബുള്ളറ്റ് ട്രെയിൻ സർവീസിൻ്റെ ഉദ്ഘാടന തീയതി ഔദ്യോഗികമായി പ്രഖ്യാപിച്ചിരിക്കുകയാണ്. മണിക്കൂറിൽ 320 കിലോമീറ്റർ വേഗതയിലുള്ള ഈ ട്രെയിൻ അടുത്ത വർഷം ഓഗസ്റ്റ് 15-ന് ആരംഭിക്കുമെന്നാണ് കേന്ദ്ര റെയിൽവേ മന്ത്രി അശ്വിനി വൈഷ്ണവ് അറിയിച്ചത്. നിലവിൽ, പദ്ധതിയുടെ നിർമ്മാണ പ്രവർത്തനങ്ങൾ അതിവേഗം പുരോഗമിക്കുന്നുണ്ട്. യാത്രകൾക്ക് ട്രെയിനിനെ ആശ്രയിക്കുന്നവരുടെ എണ്ണം വളരെ കൂടുതലാണ്. വാണിജ്യം, സാങ്കേതികവിദ്യ, നഗരവൽക്കരണം എന്നിവ അതിവേഗം വികസിക്കുമ്പോൾ, അതിവേഗ യാത്രാ സൗകര്യങ്ങൾ അനിവാര്യമായി വരും. ഇതനുസരിച്ചാണ് ഇന്ത്യൻ റെയിൽവേ ബുള്ളറ്റ് ട്രെയിൻ പദ്ധതി നടപ്പാക്കുന്നത്.

ഈ പദ്ധതി പ്രകാരം, ആദ്യത്തെ ബുള്ളറ്റ് ട്രെയിൻ മുംബൈയ്ക്കും അഹമ്മദാബാദിനും ഇടയിൽ 508 കിലോമീറ്റർ റൂട്ടിൽ സർവീസ് നടത്തും. ഇതിനായുള്ള അടിസ്ഥാന സൗകര്യ വികസന പ്രവർത്തനങ്ങൾ പൂർണ്ണ തോതിൽ നടന്നുവരികയാണ്. രാജ്യത്തെ ജനങ്ങൾ ആകാംഷയോടെയാണ് ഈ പദ്ധതിയുടെ ഉദ്ഘാടനം കാത്തിരിക്കുന്നത്. കേന്ദ്രമന്ത്രിയുടെ അറിയിപ്പ് പ്രകാരം, അടുത്ത വർഷം ഓഗസ്റ്റ് 15-ന് സ്വാതന്ത്ര്യ ദിനത്തിൽ ആദ്യ ബുള്ളറ്റ് ട്രെയിൻ സർവീസ് ആരംഭിക്കും.

പ്രാരംഭ ഘട്ടത്തിൽ ഗുജറാത്തിലെ സൂറത്ത്-ബിലിമോറ റൂട്ടിലായിരിക്കും ഇത്. തുടർന്ന്, സൂറത്ത്-വാപി, വാപി-അഹമ്മദാബാദ് റൂട്ടുകളിലേക്ക് ഘട്ടംഘട്ടമായി സേവനം വ്യാപിപ്പിക്കും. മണിക്കൂറിൽ 320 കിലോമീറ്റർ വേഗതയിൽ ഓടുന്ന ബുള്ളറ്റ് ട്രെയിനുകൾ മുംബൈ-അഹമ്മദാബാദ് യാത്രാസമയം ഗണ്യമായി കുറയ്ക്കും. പദ്ധതി പൂർത്തിയാകുമ്പോൾ, ഈ യാത്ര ഏകദേശം 2.5 മണിക്കൂറിനുള്ളിൽ പൂർത്തിയാക്കുമെന്നാണ് പ്രതീക്ഷ.

ഈ പദ്ധതി വിജയകരമായാൽ ഹൈ-സ്പീഡ് റെയിൽ ഗതാഗതത്തിന് ഇന്ത്യയിൽ പുതിയ വഴി തുറക്കും. രാജ്യത്തുടനീളം ബുള്ളറ്റ് ട്രെയിൻ സേവനങ്ങൾ ഘട്ടംഘട്ടമായി വികസിപ്പിക്കാനാണ് റെയിൽവേ ലക്ഷ്യം. ദക്ഷിണേന്ത്യയിൽ ചെന്നൈ-ബംഗളൂരു-മൈസൂരു റൂട്ടിൽ സാധ്യതകൾ പഠിക്കുന്നു. ഇത് യാഥാർത്ഥ്യമായാൽ യാത്രാസമയം 2 മണിക്കൂറിൽ താഴെയാകും. മുംബൈ-അഹമ്മദാബാദ് പാതയുടെ നിർമ്മാണം അതിവേഗം മുന്നേറുന്നു.

ഇതിനിടെ, ട്രെയിൻ ഡ്രൈവർമാർക്ക് ജപ്പാനിൽ പരിശീലനം നൽകി വരുന്നുണ്ട്. തിരഞ്ഞെടുക്കപ്പെട്ട ഇന്ത്യൻ റെയിൽവേ ജീവനക്കാർ നിലവിൽ ജപ്പാനിൽ നേരിട്ട് ബുള്ളറ്റ് ട്രെയിനുകൾ ഓടിച്ച് പരിശീലനം നേടുന്നത് റെയിൽവേയെ സംബന്ധിച്ച് വളരെ വലിയ കാര്യം തന്നെയാണ്. രാജ്യത്തിന്റെ ആദ്യ സമർപ്പിത ഹൈ-സ്പീഡ് റെയിൽ പരീക്ഷണ ട്രാക്ക് 2026 മാർച്ചോടെ പൂർണ്ണമായും സജ്ജമാകുമെന്ന് ഇന്ത്യൻ റെയിൽവേ സ്ഥിരീകരിച്ചതോടെ, ഇന്ത്യയുടെ റെയിൽവേ ചരിത്രത്തിൽ പുതിയ അധ്യായമാണ് തുറക്കാൻ പോകുന്നത്.

967 കോടി രൂപയുടെ നിക്ഷേപത്തിൽ RDSO വികസിപ്പിക്കുന്ന 64 കിലോമീറ്റർ നീളമുള്ള ഈ ട്രാക്ക്, വെറും ഒരു പരീക്ഷണ പാത മാത്രമല്ല. അന്താരാഷ്ട്ര നിലവാരത്തിലുള്ള അതിവേഗ ട്രെയിനുകൾ പരിശോധിക്കാൻ കഴിയുന്ന ആഗോള കേന്ദ്രമായി ഇന്ത്യയെ മാറ്റുന്ന ഒരു അടിസ്ഥാന സൗകര്യം കൂടിയാണ് എന്നതാണ് പ്രത്യേകത.

ജോധ്‌പൂർ ഡിവിഷനിൽ, ജയ്പൂരിൽ നിന്ന് ഏകദേശം 70 കിലോമീറ്റർ അകലെയുള്ള ഗുഡയ്ക്കും താതാന മിത്തറിയ്ക്കും ഇടയിൽ രണ്ട് ഘട്ടങ്ങളായാണ് ഈ അതിവേഗ ട്രാക്ക് നിർമ്മിക്കുന്നത്. 58 കിലോമീറ്റർ ട്രാക്ക് ഇതിനകം സ്ഥാപിച്ചുകഴിഞ്ഞു ബാക്കി ഭാഗം 2026 ഏപ്രിലിന് മുമ്പ് പൂർത്തിയാക്കും. നിർമ്മാണം പൂർത്തിയാകുന്നതോടെ, UIC-518 / EN-14363 പോലുള്ള അന്താരാഷ്ട്ര നിലവാരങ്ങൾ പാലിക്കുന്ന അതിവേഗ റോളിംഗ് സ്റ്റോക്കുകൾക്ക് സമഗ്രമായ പരിശോധനാ സൗകര്യങ്ങൾ ഒരുക്കുന്ന ആദ്യ രാജ്യമായി ഇന്ത്യ മാറും.

ഡ്രൈവ്സ്പാർക്ക് മലയാളം വെബ്‌സൈറ്റ് വാഹന സംബന്ധിയായ വാർത്തകൾ തത്സമയം നിങ്ങളുടെ വിരൽത്തുമ്പിൽ ലഭ്യമാക്കുന്നു. സോഷ്യൽ മീഡിയയിലൂടെ ഞങ്ങൾ വാർത്തകൾ വായനക്കാരുമായി തൽക്ഷണം പങ്കിടുന്നു.ഏറ്റവും പുതിയ കാർ, ബൈക്ക് വാർത്തകൾ, ടെസ്റ്റ് ഡ്രൈവ് റിപ്പോർട്ടുകൾ, വീഡിയോകൾ എന്നിവ ലഭിക്കാൻ ഡ്രൈവ്സ്പാർക്ക് മലയാളത്തിന്റെ ഫെയ്‌സ്ബുക്ക്, ഇൻസ്റ്റഗ്രാം, ടെലിഗ്രാം, യൂട്യൂബ് ചാനൽ എന്നിവ മറക്കാതെ ഫോളോ ചെയ്യാം. ഞങ്ങളുടെ ഏതെങ്കിലും വാർത്ത ഇഷ്ടപ്പെട്ടാൽ ലൈക്ക് ചെയ്യാനും കമൻ്റ് ചെയ്യാനും മറക്കല്ലേ.