നേപ്പാളിന് 200 വാഹനങ്ങള്‍ സമ്മാനിച്ച് ഇന്ത്യ; സംഭവം ഇരുക്ക്

നവംബര്‍ 20നാണ് നേപ്പാളില്‍ പൊതുതെരഞ്ഞെടുപ്പ് നടക്കുന്നത്. അതിനാല്‍, അവിടെ തിരഞ്ഞെടുപ്പ് സുഗമമായി നടത്താന്‍ സഹായിക്കുന്നതിന് ഇന്ത്യ ഇപ്പോള്‍ 200 വാഹനങ്ങള്‍ നേപ്പാളിന് സമ്മാനിച്ചു. നേപ്പാളിലെ ഇന്ത്യന്‍ അംബാസഡര്‍ നവീന്‍ ശ്രീവാസ്തവ 200 വാഹനങ്ങള്‍ നേപ്പാള്‍ ധനമന്ത്രി ജനാര്‍ധന്‍ ശര്‍മ്മയ്ക്ക് കൈമാറി.

ഇതില്‍ 120 വാഹനങ്ങള്‍ നേപ്പാള്‍ പ്രതിരോധ സേന ഉപയോഗിക്കും. ബാക്കിയുള്ള 80 വാഹനങ്ങള്‍ നേപ്പാളിലെ തിരഞ്ഞെടുപ്പ് കമ്മീഷന്‍ ഉപയോഗിക്കും. നേപ്പാള്‍ സര്‍ക്കാരിന്റെ തിരഞ്ഞെടുപ്പ് പരിപാടികള്‍ ക്രമീകരിക്കുന്നതിന് ഈ വാഹനങ്ങള്‍ സഹായകമാകുമെന്ന് താന്‍ പ്രതീക്ഷിക്കുന്നതായി വാഹനങ്ങളുടെ താക്കോല്‍ മന്ത്രിക്ക് കൈമാറിക്കൊണ്ട് അംബാസഡര്‍ നവീന്‍ ശ്രീവാസ്തവ പറഞ്ഞു.

തിരഞ്ഞെടുപ്പിന്റെ സുഗമമായ നടത്തിപ്പിനായി 200 വാഹനങ്ങള്‍ നല്‍കിയതിനും തുടര്‍ന്നും പിന്തുണയ്ക്കുന്ന ഇന്ത്യന്‍ സര്‍ക്കാരിനും ഇന്ത്യന്‍ ജനതയ്ക്കും നേപ്പാള്‍ ധനമന്ത്രി ജനാര്‍ത്ഥന്‍ ശര്‍മ്മ നന്ദി പറഞ്ഞു. എന്നാല്‍ ഇതാദ്യമായല്ല ഇന്ത്യ വാഹനങ്ങള്‍ നല്‍കി നേപ്പാളിനെ സഹായിക്കുന്നത്. നേപ്പാളിന് തെരഞ്ഞെടുപ്പ് വേളയില്‍ മുമ്പും ഇന്ത്യ വാഹനങ്ങള്‍ നല്‍കിയിരുന്നു. റിപ്പോര്‍ട്ടുകള്‍ പ്രകാരം ഇന്ത്യ ഇതുവരെ 2,400 വാഹനങ്ങള്‍ നേപ്പാളിന് നല്‍കിയിട്ടുണ്ട്.

നേപ്പാള്‍ പൊലീസ് ഡിപ്പാര്‍ട്ട്മെന്റ്, സൈന്യം, തിരഞ്ഞെടുപ്പ് കമ്മീഷന്‍ തുടങ്ങിയവക്ക് വേണ്ടിയാണ് ഇന്ത്യ വാഹനങ്ങള്‍ സമ്മാനമായി നല്‍കിയത്. വാഹനങ്ങള്‍ നല്‍കുന്നതിന് പുറമെ മറ്റ് പല വഴികളിലും ഇന്ത്യ നേപ്പാളിന് സഹായഹസ്തം നീട്ടിയിട്ടുണ്ട്.

ഒരു രാജ്യത്ത് പൊതുതെരഞ്ഞെടുപ്പ് നടത്തുന്നത് പൊതുവെ എളുപ്പമുള്ള കാര്യമല്ല. തെരഞ്ഞെടുപ്പില്‍ ഉപയോഗിക്കുന്ന സാമഗ്രികള്‍ കൊണ്ടുപോകുന്നതിനും തിരഞ്ഞെടുപ്പ് ഉദ്യോഗസ്ഥരുടെയും സുരക്ഷാ സേനയുടെയും യാത്ര ആവശ്യങ്ങള്‍ക്കും കൂടുതല്‍ വാഹനങ്ങള്‍ വേണ്ടിവരും. അതുകൊണ്ടാണ് നേപ്പാളിലെ തിരഞ്ഞെടുപ്പ് സമയത്ത് ഇന്ത്യ വാഹനങ്ങള്‍ സമ്മാനമായി നല്‍കുന്നത്.

എന്നാല്‍ ചൈന നേപ്പാളില്‍ സ്വാധീനമുറപ്പിക്കാന്‍ ശ്രമിക്കുന്നത് തടയാനാണ് ഇന്ത്യയുടെ ഭാഗത്ത് നിന്ന് ഇത്തരമൊരു നീക്കമുണ്ടായതെന്നും സംസാരമുണ്ട്. നേപ്പാള്‍ പോലുള്ള വികസ്വര രാജ്യങ്ങള്‍ക്ക് ഇന്ത്യ നല്‍കിയ ഈ വാഹനങ്ങള്‍ വലിയ സഹായമാകുമെന്നതില്‍ സംശയമില്ല.

ഇന്ത്യയും നേപ്പാളും ബഹുമുഖവും ബഹുമുഖ വികസന പങ്കാളിത്തവും ആസ്വദിക്കുന്നു. അത് ഇരു രാജ്യങ്ങളിലെയും ജനങ്ങളുടെ അടുപ്പത്തെ പ്രതിഫലിപ്പിക്കുന്നു. ഇത്തരം പ്രവര്‍ത്തികളിലൂടെ ജനങ്ങളുമായുള്ള ബന്ധം വികസിക്കാന്‍ സംഭാവന ചെയ്യുന്നതിനുള്ള ഭാരത സര്‍ക്കാരിന്റെ തുടര്‍ച്ചയായ പിന്തുണയെ പ്രതിഫലിപ്പിക്കുന്നതായി ഇന്ത്യന്‍ എംബസി പത്രക്കുറിപ്പില്‍ പറഞ്ഞു.

മഹീന്ദ്ര ബൊലേറോ പോലുള്ള വാഹനങ്ങളാണ് ഇന്ത്യ നേപ്പാളിന് സമ്മാനിച്ചത്. വാഹനം കൈമാറുന്ന ചടങ്ങിനിടെ എടുത്ത ചിത്രങ്ങളിലൂടെയാണ് ഇക്കാര്യം മനസ്സിലാകുന്നത്.

ഇന്ത്യയിലെ ഏറ്റവും ജനപ്രിയമായ മഹീന്ദ്ര വാഹനങ്ങളിലൊന്നാണ് ബൊലേറോ. ഇന്ത്യയില്‍ ഏറ്റവും കൂടുതല്‍ വിറ്റഴിക്കപ്പെടുന്ന മഹീന്ദ്ര കാറുകളിലൊന്ന് കൂടിയാണ് ബൊലേറോ. ഇതുകൂടാതെ, XUV300, XUV700, ഥാര്‍ തുടങ്ങിയ മറ്റ് മഹീന്ദ്ര കാറുകളുടെ വില്‍പ്പനയും മികച്ചതാണ്.

കഴിഞ്ഞ മാസം കാര്‍ വില്‍പ്പനയില്‍ 9.60% വിപണി വിഹിതവുമായി മഹീന്ദ്ര നാലാമതെത്തി. കഴിഞ്ഞ വര്‍ഷം ഒക്ടോബറിലെ 20,130 യൂണിറ്റുകളെ അപേക്ഷിച്ച് ഒക്ടോബറില്‍ മൊത്തം 32,298 യൂണിറ്റുകള്‍ വിറ്റു. കഴിഞ്ഞ വര്‍ഷത്തെ അപേക്ഷിച്ച് വളര്‍ച്ച 60.45% ആണ്. 2022 സെപ്റ്റംബറില്‍ വിറ്റ 34,508 യൂണിറ്റുകളെ അപേക്ഷിച്ച് -6.40% ഇടിവാണ്.

വിപണി വിഹിതത്തില്‍ ഏറ്റവും ഉയര്‍ന്ന നേട്ടം മഹീന്ദ്ര രേഖപ്പെടുത്തി - 1.87%. പോയ മാസം 1,40,337 യൂണിറ്റുകള്‍ വിറ്റ് മാരുതിയാണ് പട്ടികയില്‍ ഒന്നാമത്. 48001 യൂണിറ്റ് വില്‍പ്പനയുമായി ഹ്യുണ്ടായി രണ്ടാമതും 45,217 യൂണിറ്റുകളുമായി ടാറ്റ മോട്ടോര്‍സ് മൂന്നാമതും നില്‍ക്കുന്നു.