Click it and Unblock the Notifications
ടാറ്റ ലക്ഷങ്ങള് മുടക്കി ചെയ്ത പരസ്യത്തിന്റെ വില കളഞ്ഞല്ലോ! മലമുകളില് 2WD കാറുകള് കയറ്റി മലയാളി പയ്യന്മാര്
ദൈവത്തിന്റെ സ്വന്തം നാടായ കേരളം വണ്ടിപ്രാന്തന്മാരുടേത് കൂടിയാണ്. അസാധ്യമായ മോഡിഫിക്കേഷനുകളും അപൂര്വമായ വാഹനങ്ങള് കൊണ്ടും മലയാളികള് എന്നും മറ്റ് സംസ്ഥാനക്കാരെ ഞെട്ടിക്കാറുണ്ട്. അടുത്തിടെ ടാറ്റ മോട്ടോര്സ് പുതിയ ഹാരിയര് ഇവിയുടെ ഓഫ്റോഡിംഗ് ശേഷി തെളിയിക്കുന്ന വീഡിയോ പുറത്തുവിട്ടപ്പോള് വളയം പിടിക്കാനായി നിയോഗിച്ചതും ഒരു മലയാളിയെ ആയിരുന്നു. പ്രഫഷനല് ഓഫ്റോഡറും ആര്എഫ്സി ചാമ്പ്യനുമായ ഡോ. മുഹമ്മദ് ഫഹദ് ആനപ്പാറയിലൂടെ ഹാരിയര് ഇവി ഓടിച്ച് കയറ്റുന്ന വീഡിയോ ദേശീയ ശ്രദ്ധയാകര്ഷിച്ചിരുന്നു. ഇപ്പോള് സമാനമായ രീതിയില് ഇരുവശത്തും മാരകമായ കൊക്കകളുള്ള മലമുകളില് മൂന്ന് കാറുകള് ഓടിച്ച് കയറിയ മലയാളി യുവാക്കളാണ് സോഷ്യല് മീഡിയയില് തരംഗം സൃഷ്ടിക്കുന്നത്.
ഈ വീഡിയോയില് ഒരു ടൊയോട്ട ഇന്നോവക്കും മഹീന്ദ്ര XUV300 എസ്യുവിയുടെയും കൂടെ മാരുതി 800 കൂടെയുണ്ടായിരുന്നുവെന്നതാണ് രസകരം. വീഡിയോ വൈറല് ആയതോടെ ഹാരിയര് ഇവി കയറിയ മല അത്ര ബുദ്ധിമുട്ടുള്ളതായിരുന്നോ എന്നാണ് സോഷ്യല് മീഡിയയില് ചോദ്യം ഉയരുന്നത്. എസ്യുവികളുടെ കഴിവുകള് തെളിയിക്കുന്ന തരത്തില് വെല്ലുവിളി നിറഞ്ഞ സാഹചര്യത്തെ കൈകാര്യം ചെയ്യുന്ന ലാന്ഡ് റോവര് പരസ്യങ്ങളില് നിന്നാണ് ടാറ്റ ഹാരിയര് ഇവി പരസ്യം പ്രചോദനം ഉള്ക്കൊണ്ടിരിക്കുന്നത്.
ഇതേ പാത പിന്തുടര്ന്ന് വാഗമണിലെ ആനപ്പാറ കയറിയ ഹാരിയര് ഇവിയുടെ പരസ്യം മികച്ചതാണെന്നതില് സംശയമില്ല. പക്ഷേ മലയാളി പയ്യന്മാര് ടൊയോട്ട ഇന്നോവ ക്രിസ്റ്റ, മഹീന്ദ്ര XUV300, മാരുതി 800 എന്നീ കാറുകളിലായി കയറിയത് അതേ മല തന്നെയാണോ എന്ന കാര്യം സംശയമുണ്ട്. വീഡിയോ സൂക്ഷ്മമായി പരിശോധിക്കുമ്പോള് ഈ വീഡിയോ തൊടുപുഴക്കടുത്തുള്ള ഉരവപ്പാറയാണെന്ന് തോന്നുന്നു. മലമുകളില് സ്ഥിതി ചെയ്യുന്ന അമ്പലത്തിലേക്ക് ഒരു വഴിയുണ്ട് ഇവിടെ.
ഏതായാലും 'തുടരും' സിനിമയിലെ പാട്ടിന്റെ അകമ്പടിയോടെ ഹാരിയറിന്റെ പരസ്യത്തിലെ ഡയലോഗുകള് ചേര്ത്ത് നല്ല വെടിപ്പായാണ് ഈ വീഡിയോ ചെയ്തിരിക്കുന്നത്. ഈ മൂന്ന് കാറുകളും ഒരു കൊല്ലം മുമ്പാണ് മലകയറ്റിയതെന്നാണ് തോന്നുന്നത്. കാരണം abhi_jith3421 എന്ന ഇന്സ്റ്റഗ്രാം യൂസര് ഇതിന്റെ മറ്റൊരു വീഡിയോ 2024 ജൂലൈയില് ഇന്സ്റ്റഗ്രാമില് പങ്കുവെച്ചിട്ടുണ്ട്. ഹാരിയറിന്റെ പരസ്യം വൈറലായതോടെ വീഡിയോ എഡിറ്റ് ചെയ്ത് വീണ്ടും പങ്കുവെച്ചതായിരിക്കും.
ഇന്സ്റ്റാഗ്രാം റീലിലുള്ള മൂന്ന് വാഹനങ്ങളും ടു-വീല് ഡ്രൈവ് മോഡലുകളാണെങ്കിലും ടാറ്റ ഹാരിയര് ഇവിയില് AWD വേരിയന്റ് വാഗ്ദാനം ചെയ്യുന്നു. ഹെക്സ, സഫാരി സ്റ്റോം എന്നിവയ്ക്ക് ശേഷം RWD, QWD (ക്വാഡ് വീല് ഡ്രൈവ്) ഓപ്ഷനുകളുമായി വരുന്ന ആദ്യ ടാറ്റ കാറാണ് ഇത്. ഉയര്ന്ന ട്രിമ്മുകള്ക്കായി ഓരോ ആക്സിലിലും ഒരു മോട്ടോര് ഉള്ക്കൊള്ളുന്ന ഡ്യുവല്-മോട്ടോര് വേരിയന്റുകളെ QWD (ക്വാഡ് വീല് ഡ്രൈവ്) എന്ന് വിളിക്കുന്നു.
ഓഫ്-റോഡ് സാഹസികതകള്ക്കായി, നവീകരിച്ച ടെറൈന് മോഡുകള് ഇവിയില് ലഭ്യമാണ്. നോര്മല്, സാന്ഡ്, മഡ് റട്ട്സ്, സ്നോ/ഗ്രാസ്, റോക്ക് ക്രാള്, കസ്റ്റം മോഡുകള് പരുക്കന് ഭൂപ്രദേശങ്ങളില് അതിന്റെ കഴിവ് വര്ധിപ്പിക്കാന് സഹായിക്കുന്നു. ഓഫ്-റോഡ് നാവിഗേഷനെ സഹായിക്കുന്ന അണ്ടര്ബോഡി ഏരിയകളുടെ പോലും വീഡിയോ ഫീഡ് ട്രാന്സ്പരന്റ് മോഡ് നല്കുന്നു.
65 kWh, 75 kWh എന്നിങ്ങനെ രണ്ട് ബാറ്ററി പായ്ക്ക് ഓപ്ഷനിലാണ് ടാറ്റ ഹാരിയര് ഇവി വരുന്നത്. 75 kWh ബാറ്ററി പായ്ക്ക് ഫുള് ചാര്ജില് 627 കിലോമീറ്റര് വരെ റേഞ്ച് അവകാശപ്പെടുന്നു. RWD വേരിയന്റ് 238PS പീക്ക് പവര് നല്കുന്നു. ഡ്യുവല്-മോട്ടോര് കോണ്ഫിഗറേഷന് 504 Nm സംയോജിത ടോര്ക്കിനായി മുന്വശത്ത് 158PS മോട്ടോര് ചേര്ക്കുന്നു.
വയര്ലെസ് ആന്ഡ്രോയിഡ് ഓട്ടോ, ആപ്പിള് കാര്പ്ലേ, സ്ട്രീമിംഗ് ആപ്പുകള്, ഗെയിമുകള് എന്നിവയുള്ള സാംസംഗില് നിന്നുള്ള 14.53 ഇഞ്ച് ക്യുഎല്ഇഡി ഇന്ഫോടെയ്ന്മെന്റ് സ്ക്രീന്, ഡ്യുവല്-സോണ് ക്ലൈമറ്റ് കണ്ട്രോള്, വെന്റിലേറ്റഡ് സീറ്റുകള്, ഡ്രൈവര് സീറ്റിന് മെമ്മറി ഫംഗ്ഷനോടുകൂടിയ പവര്ഡ് ഫ്രണ്ട് സീറ്റുകള് എന്നിവ ഇലക്ട്രിക് എസ്യുവിയില് നല്കിയിട്ടുണ്ട്. ലെവല്-2 ADAS സ്യൂട്ടില് ഓട്ടോ-എമര്ജന്സി ബ്രേക്കിംഗ്, അഡാപ്റ്റീവ് ക്രൂയിസ് കണ്ട്രോള് തുടങ്ങിയ 22 സവിശേഷതകള് ഉള്പ്പെടുന്നു.
ആറ് എയര്ബാഗുകള്, ഇഎസ്പി, എബിഎസ്, 360-ഡിഗ്രി ക്യാമറകള്, ബ്ലൈന്ഡ്സ്പോട്ട് മോണിറ്ററിംഗ് തുടങ്ങിയവയാണ് മറ്റ് സ്റ്റാന്ഡേര്ഡ് സേഫ്റ്റി ഫീച്ചറുകള്. ഹാരിയര് ഇവി അഡ്വഞ്ചര്, ഫിയര്ലെസ്, എംപവേര്ഡ് എന്നിങ്ങനെ മൂന്ന് വ്യത്യസ്ത വേരിയന്റുകളിലാണ് അവതരിപ്പിച്ചിരിക്കുന്നത്. പ്രാരംഭ എക്സ്-ഷോറൂം വില 21.49 ലക്ഷം രൂപയാണ്. നിങ്ങള് കൊച്ചിയില് നിന്ന് ബേസ് മോഡല് വാങ്ങുകയാണെങ്കില് ഓണ്-റോഡ് വില ഏകദേശം 23.65 ലക്ഷം രൂപയായിരിക്കും.
Continue with Google