ഇവിയുടെ മൈലേജ് കണക്കുകൂട്ടാൻ ചെയ്യേണ്ടത് ഇങ്ങനെ; ലാഭം മാത്രം നോ നഷ്ടം

ഇലക്ട്രിക് വാഹനം സ്വന്തമായി ഉളളവർക്കുളള ഒരു സംശയമായിരിക്കും വാഹനത്തിന് എന്ത് മൈലേജ് കിട്ടുമെന്ന്. അതേ ഇലക്ട്രിക് വാഹനത്തിൻ്റ മൈലേജ് എങ്ങനെ അറിയാം എന്ന് നോക്കിയാലോ. ഒരു ഇലക്ട്രിക് കാറിന്റെ ഇന്ധനക്ഷമത അളക്കുന്നത് ഒരു kWh-ന് കിലോമീറ്ററിലാണ്. ഒരു ഇലക്ട്രിക് കാറിന്റെ ഇന്ധനക്ഷമത നിർണ്ണയിക്കുന്ന പ്രക്രിയ പരമ്പരാഗത ഐസിഇ എഞ്ചിൻ കാറിൽ നിന്ന് വ്യത്യസ്തമാണ്. കാരണം അത് ലിറ്റർ ഇന്ധനത്തിനോ കിലോഗ്രാം സിഎൻജിക്കോ പകരം കിലോവാട്ട്-മണിക്കൂറുകൾ (kWh) അളക്കുന്നതിനെ ആശ്രയിച്ചിരിക്കുന്നു.

നിങ്ങളുടെ ശരിയായ മൈലേജ് അറിയാനുള്ള പ്രക്രിയയുടെ ആദ്യപടിയെന്നത്, ഒരു യാത്രയ്ക്കിടെ നിങ്ങളുടെ ഇലക്ട്രിക് കാർ ഉപയോഗിക്കുന്ന വൈദ്യുതിയുടെ കിലോവാട്ട്-മണിക്കൂർ (kWh) നിർണ്ണയിക്കുക എന്നതാണ്. ഉദാഹരണത്തിന്, നിങ്ങൾക്ക് 40.5 kWh ബാറ്ററി പായ്ക്ക് ഉള്ള ഒരു വാഹനം ഉണ്ടെങ്കിൽ, നിങ്ങൾ 200 കിലോമീറ്റർ യാത്ര ആരംഭിക്കുകയാണെങ്കിൽ, നിങ്ങളുടെ ലക്ഷ്യസ്ഥാനത്ത് എത്തിച്ചേരുന്നത് ചാർജ്ജിന്റെ 50 ശതമാനം ശേഷിക്കുന്നുണ്ട് എങ്കിൽ നിങ്ങളുടെ യാത്രയ്ക്കിടെ 20.2 kWh വൈദ്യുതി ഉപയോഗിച്ചതായി മനസിലാക്കാം.

നിങ്ങളുടെ ഇലക്ട്രിക് കാറിന്റെ ഇന്ധനക്ഷമത അല്ലെങ്കിൽ മൈലേജ് നിർണ്ണയിക്കാൻ ഉപയോഗിക്കുന്ന ഫോർമുല ഇപ്രകാരമാണ്: കാര്യക്ഷമത (കിലോവാട്ട് മണിക്കൂറിന് കി.മീ.) = ദൂരം (കി.മീ.) / ഉപഭോഗം ചെയ്ത ഊർജ്ജം (കെ.ഡബ്ല്യു.എച്ച്). വ്യക്തമായി പറഞ്ഞാൽ യാത്രയിൽ ഏകദേശം 20.2 kWh ഊർജ്ജം ഉപയോഗിച്ചുകൊണ്ട് നിങ്ങൾ 200 കി.മി യാത്ര ചെയ്താൽ. ആ യാത്രയിൽ നിങ്ങളുടെ കാര്യക്ഷമത ഏകദേശം 9.9 km/kWh (200 km/ 20.2 kWh)

നമ്മുടെ നാട്ടിൽ ഒരു യൂണിറ്റ് കറണ്ടിന് എത്ര രൂപയാണെന്ന് നോക്കുക, അതിന് ശേഷം അതിനെ 200 കൊണ്ടോ അല്ലൊങ്കിൽ എത്ര കിലോമീറ്റർ ഓടി എന്നത് വച്ച ഗുണിക്കുക, അപ്പോൾ കിട്ടുന്ന തുക മതി നിങ്ങൾക്ക് ഇത്ര ദൂരം പോകാനായിട്ട് എന്ന് മനസിലാക്കാം.

നിങ്ങളുടെ ഇലക്ട്രിക് വാഹനവുമായി ഒരു നീണ്ട യാത്ര പോവുകയാണെങ്കിൽ കാർ ചാർജ് ചെയ്യാനാവുന്ന സ്ഥലങ്ങൾ മുൻകൂട്ടി കണ്ടെത്തുകയും അതിനനുസരിച്ച് യാത്ര പ്ലാൻ ചെയ്യേണ്ടതും അത്യാവശ്യമാണ്. ചാർജിംഗ് സ്‌റ്റേഷനുകളുടെ ലഭ്യത അന്വേഷിക്കുകയും അതിനനുസരിച്ച് നിങ്ങളുടെ റൂട്ട് മാപ്പ് തയാറാക്കുകയുമാണ് ആദ്യം ചെയ്യേണ്ടത്. ചാർജ് തീർന്ന് വഴിയിലാവാതിരിക്കാൻ ഇത് നിങ്ങളെ സഹായിക്കും.

സാധാരണ ചാർജിംഗ് പോയിന്റുകളെ അപേക്ഷിച്ച് ഫാസ്റ്റ് ചാർജിംഗ് സ്റ്റേഷനുകൾക്ക് നിങ്ങളുടെ ഇലക്ട്രിക് വാഹനം ചാർജ് ചെയ്യാനുള്ള സമയം ഗണ്യമായി കുറയ്ക്കാൻ കഴിയും. ഈ സ്റ്റേഷനുകൾ ഉയർന്ന വോൾട്ടേജ് ലെവലുകൾ ഉപയോഗിക്കുന്നതിനാൽ, വേഗത്തിൽ ബാറ്ററി റീചാർജ് ചെയ്യാൻ സാധിക്കും. ദീർഘദൂര യാത്രകളിൽ പെട്ടെന്നുള്ള ടോപ്പ്-അപ്പുകൾക്കായി നിങ്ങളുടെ ലക്ഷ്യസ്ഥാനത്തിനടുത്തോ പ്രധാന ഹൈവേകളിലോ ഫാസ്റ്റ് ചാർജിംഗ് സ്റ്റേഷനുകൾ നോക്കുന്നതാവും ഉചിതം.

സമയത്തെ ആശ്രയിച്ച് വൈദ്യുതി നിരക്ക് പലപ്പോഴും വ്യത്യാസപ്പെടുമെന്ന കാര്യം പലർക്കും അറിവില്ലാത്ത ഒന്നാണ്. നിങ്ങളുടെ ഇവി ചാർജ് ചെയ്യുന്നതിനായുള്ള പണം ലാഭിക്കാൻ, വൈദ്യുതി നിരക്ക് സാധാരണയിലും കുറവുള്ളതും തിരക്കില്ലാത്തതുമായ സമയം പ്രയോജനപ്പെടുത്തുന്നത് പരിഗണിക്കാം. പല കമ്പനികളും ഈ സമയങ്ങളിൽ പ്രത്യേക താരിഫുകളോ കിഴിവുകളോ വാഗ്ദാനം ചെയ്യുന്നുണ്ട്. ഇത് ഇലക്ട്രിക് വാഹന ഉടമകൾക്ക് തങ്ങളുടെ ചെലവ് കുറയ്ക്കാൻ സഹായിക്കും.

ഒരു ഹോം ചാർജിംഗ് സ്റ്റേഷൻ സ്ഥാപിക്കുന്നത് ഇലക്ട്രിക് വാഹന ഉടമകൾക്ക് സൗകര്യപ്രദവും ചെലവ് കുറഞ്ഞതുമായ പ്രക്രിയയാണ്. വീട്ടിൽ ഒരു പ്രത്യേക ചാർജിംഗ് പോയിന്റ് സ്ഥാപിക്കുന്നതു വഴി നിങ്ങൾക്ക് ഒറ്റരാത്രികൊണ്ട് വാഹനം എളുപ്പത്തിൽ ചാർജ് ചെയ്യാനാവും. എല്ലാ ദിവസവും രാവിലെ ഫുൾ-ചാർജിൽ വാഹനം എടുക്കാനും ഇതിലൂടെ സാധിക്കും. പബ്ലിക് ചാർജിംഗ് ഒഴിവാക്കുവാനും അതിലൂടെ നിങ്ങൾക്ക് സമയ ലാഭവും ഹോം ചാർജിംഗ് നേടിത്തരുന്നു.

പരമ്പരാഗത പെട്രോൾ, ഡീസൽ എഞ്ചിൻ ഉപയോഗിച്ച് പ്രവർത്തിക്കുന്ന വാഹനങ്ങളെ അപേക്ഷിച്ച് വളരെ കുറച്ച് ചലിക്കുന്ന ഭാഗങ്ങൾ കൊണ്ട് സജ്ജീകരിച്ചിരിക്കുന്നുവെന്നതിനാൽ ഇലക്ട്രിക് വാഹനങ്ങൾക്ക് കുറച്ച് ശ്രദ്ധയൊക്കെ കൊടുക്കണമെന്ന കാര്യവും മറക്കേണ്ട. സുരക്ഷിതമായ അന്തരീക്ഷത്തിൽ ഇലക്ട്രിക് വാഹനം ചാർജ് ചെയ്യുന്നത് ഡ്രൈവറുടെ സുരക്ഷയ്ക്കും വാഹനത്തിന്റെ ബാറ്ററി പായ്ക്ക് ഹെൽത്തിനും അത്യന്താപേക്ഷിതമാണ് എന്നതും മറക്കേണ്ട.