ആ സന്തോഷമൊന്ന് കാണണം; മകന്റെ പുത്തന്‍ XUV 700 ഓടിച്ച് 'പൂതി' തീർക്കുന്ന അമ്മ

ഒരു മാതാവിനോടുള്ള സ്‌നേഹം അവരുടെ ആഗ്രഹം സഫലീകരിച്ചുകൊണ്ട് പ്രകടിപ്പിക്കുന്ന ഒരു മകനാണ് ഇവിടെ ഹീറോ. മാതാപിതാക്കള്‍ തങ്ങളുടെ കുട്ടികള്‍ക്ക് നല്ലൊരു ജീവിതം ലഭിക്കാനായി ആഗ്രഹിക്കുന്നു. വളര്‍ന്നു വലുതായി മാതാപിതാക്കളുടെ മുഖത്ത് പുഞ്ചിരി വിരിയിക്കുന്നവരാകാന്‍ മക്കളും ആഗ്രഹിക്കുന്നു. അതിനായി എത്ര കഠിനാധ്വാനം ചെയ്യാനും മക്കള്‍ തയാറാകും

താന്‍ പുതുതായി വാങ്ങിയ കാര്‍ അമ്മക്ക് ഓടിക്കാന്‍ കൊടുത്ത് ഇത്തരത്തില്‍ അവരെ സന്തോഷിപ്പിക്കുകയാണ് സായികിരണ്‍ കോര്‍ എന്ന യുവാവ്. അമ്മയുടെ സന്തോഷം വീണ്ടും വീണ്ടും കാണാനായി അയാള്‍ ആ സുന്ദര നിമിഷങ്ങള്‍ വീഡിയോയില്‍ പകര്‍ത്തി. ഇന്‍സ്റ്റഗ്രാമില്‍ പങ്കുവെച്ച ആ വീഡിയോ ആണ് ഇപ്പോള്‍ സാമൂഹിക മാധ്യമങ്ങള്‍ ഏറ്റെടുത്തിരിക്കുന്നത്.

അമ്മയുടെ സന്തോഷം കണ്ട് ഏവരും മകന് കൈയ്യടിക്കുകയാണ്. അമ്മയുടെ ആഗ്രഹപ്രകാരം മകന്‍ പുതുപുത്തന്‍ മഹീന്ദ്ര XUV 700 കാര്‍ ഓടിക്കാന്‍ നല്‍കുന്നതാണ് ഈ വീഡിയോയില്‍ കാണാന്‍ സാധിക്കുക. വീഡിയോയില്‍ യുവാവിന്റെ അമ്മ ഡ്രൈവിംഗ് സീറ്റില്‍ ഇരുന്നു കാര്‍ ഓടിക്കുന്നത് കാണാം.

ഈ സമയത്ത് അവരുടെ മുഖത്തെ പുഞ്ചിരിയാണ് എവരേയും ആകര്‍ഷിക്കുന്നത്. നിറഞ്ഞ സന്തോഷത്തിലാണ് അവര്‍ വാഹനം ഓടിക്കുമ്പോള്‍ മകനോട് സംസാരിക്കുന്നത്. ദുല്‍ഖര്‍ സല്‍മാന്റെ ഏറ്റവും പുതിയ ഹിറ്റ് ചിത്രമായ സീതാരാമത്തിലെ ഒരു ഗാനം പിന്നണിയില്‍ കേള്‍ക്കാന്‍ സാധിക്കും.

സാരി ഉടുത്താണ് സായികിരണിന്റെ അമ്മ കാര്‍ ഓടിക്കുന്നത്. ഡ്രൈവിങ്ങിനിടെ പൊട്ടിച്ചിരിച്ചുകൊണ്ട് അവര്‍ ഇരുവരും സംസാരിക്കുന്നുമുണ്ട്. റോഡിലൂടെ വാഹനമോടിക്കുമ്പോള്‍ അവളുടെ അരികിലൂടെ നിരവധി വാഹനങ്ങള്‍ കടന്നുപോകുന്നത് നിങ്ങള്‍ക്ക് കാണാം. എന്നിരുന്നാലും അവര്‍ കൂളായിട്ടാണ് കാര്‍ ഓടിക്കുന്നത്. ഇതുകാണുമ്പോള്‍ അവര്‍ക്ക് ഡ്രൈവിംഗില്‍ വര്‍ഷങ്ങളുടെ പരിചയമുണ്ടെന്ന് തോന്നാം.

'എന്റെ അമ്മ എന്റെ XUV 700 കാര്‍ ഓടിക്കുന്നു' എന്ന അടിക്കുറിപ്പോടെയാണ് വീഡിയോ സായി കരണ്‍ സോഷ്യല്‍ മീഡിയയില്‍ പോസ്റ്റ് ചെയ്തത്. വീഡിയോയ്ക്ക് ഇതുവരെ 18 ലക്ഷത്തിലധികം ലൈക്കുകളും ദശലക്ഷക്കണക്കിന് കാഴ്ചക്കാരെയും ലഭിച്ചു.

സമീപകാലത്ത് ഏറ്റവും ഹിറ്റായ മഹീന്ദ്രയുടെ എസ്‌യുവികളില്‍ ഒന്നാണ് XUV 700. 2021 ഓഗസ്റ്റില്‍ ആഗോളതലത്തില്‍ അരങ്ങേറ്റം കുറിച്ചതിന് ശേഷം കഴിഞ്ഞ വര്‍ഷം അവസാനമാണ് മോഡല്‍ ആഭ്യന്തര വിപണിയിലെത്തിയത്. XUV500 മോഡലിന് പകരമായാണ് XUV700 എസ്‌യുവിയെ മഹീന്ദ്ര ആന്‍ഡ് മഹീന്ദ്ര അവതരിപ്പിക്കുന്നത്.

പുറത്തിറക്കിയതിന് ശേഷം ഇതുവരെ 1.50 ലക്ഷം ബുക്കിംഗുകളില്‍ 40,000 യൂണിറ്റുകള്‍ മാത്രമാണ് കമ്പനി വിതരണം ചെയ്തത്. രണ്ടു വര്‍ഷത്തിലധികമാണ് ഈ മോഡലിന്റെ ചില വേരിയന്റുകളുടെ കാത്തിരിപ്പ് കാലാവധി. എസിഐ റിപ്പോര്‍ട്ട് അനുസരിച്ച് XUV700 ടോപ് സ്പെക് വേരിയന്റുകളായ AX7 L പെട്രോള്‍, AX7 L ഡീസല്‍ എന്നിവക്കാണ് ഏറ്റവും ഉയര്‍ന്ന കാത്തിരിപ്പ് കാലയളവ്.

ഈ വണ്ടി കൈയ്യില്‍ കിട്ടാന്‍ 16 മാസം വരെ കാത്തിരിക്കണം. ഇത് ഏകദേശം 3 മാസം കുറഞ്ഞു. ഇത് കഴിഞ്ഞാല്‍ പിന്നീട് അടുത്ത ഡിമാന്‍ഡ് കൂടിയ വേരിയന്റുകളായ AX7 പെട്രോളിനും AX7 ഡീസലിനും 15 മാസമാണ് കാത്തിരിപ്പ് കാലയളവ്. കാത്തിരുന്ന് ഉപയോക്താക്കള്‍ കൊഴിഞ്ഞ് പോകുന്നത് തടയാന്‍ ഉല്‍പ്പാദനം വര്‍ധിപ്പിക്കാന്‍ ഒരുങ്ങുകയാണ് കമ്പനി. നിലവിലെ 4,500 യൂണിറ്റ് ഉല്‍പ്പാദനം 6,000 യൂണിറ്റായി ഉയര്‍ത്തുകയാണ്.

പുതിയ XUV700 2.0 ലിറ്റര്‍ ടര്‍ബോ പെട്രോള്‍, 2.2 ലിറ്റര്‍ ടര്‍ബോ ഡീസല്‍ എഞ്ചിന്‍ ഓപ്ഷനുകളോടെ, കസ്റ്റമര്‍ ഡിമാന്‍ഡ് അനുസരിച്ച് പെട്രോള്‍, ഡീസല്‍ എഞ്ചിന്‍ ഓപ്ഷനുകളുള്ള 5-സീറ്റര്‍, 7-സീറ്റര്‍ വേരിയന്റുകളില്‍ ലഭ്യമാണ്. 2.0 ലിറ്റര്‍ പെട്രോള്‍ മോഡല്‍ 198 bhpയും 300 nm ടോര്‍ക്കും ഉല്‍പ്പാദിപ്പിക്കുമ്പോള്‍ 2.2 ലിറ്റര്‍ ഡീസല്‍ മോഡല്‍ 183 bhpയും 420 nm ടോര്‍ക്കും (6-സ്പീഡ് എംടി), 450 nm ടോര്‍ക്കും (6-സ്പീഡ് എടി) ഉത്പാദിപ്പിക്കുന്നു.

പെട്രോള്‍ എഞ്ചിനുമായി (15 കിലോമീറ്റര്‍ വരെ) താരതമ്യപ്പെടുത്തുമ്പോള്‍ മികച്ച ഇന്ധനക്ഷമത നല്‍കുന്നുവെന്ന കാരണം കൊണ്ട് ഡീസല്‍ എഞ്ചിനാണ് (17 കിലോമീറ്റര്‍ വരെ) ഡിമാന്‍ഡ് കൂടുതല്‍. കൂടാതെ ഡീസല്‍ എഞ്ചിന്‍ ഉത്പാദിപ്പിക്കുന്ന അധിക ടോര്‍ക്ക് XUV700 എസ്‌യുവിയെ മികച്ച പെര്‍ഫോമന്‍സ് പുറത്തെടുക്കാനും സഹായിക്കുന്നു. വാഹനത്തിന്റെ മിക്ക വേരിയന്റുകളിലും ഫ്രണ്ട് വീല്‍ ഡ്രൈവാണ്. ടോപ്പ്-എന്‍ഡ് ഡീസല്‍ പതിപ്പുകള്‍ക്ക് മാത്രമാണ് മഹീന്ദ്ര ഓള്‍ വീല്‍ ഡ്രൈവ് ഓപ്ഷന്‍ അവതരിപ്പിച്ചിരിക്കുന്നത്.

ആകര്‍ഷകമായ ഫീച്ചറുകളും കരുത്തുറ്റ എഞ്ചിന്‍ ഓപ്ഷനുകളുമുള്ള MX, AX3, AX5, AX7, AX7 ലക്ഷ്വറി വേരിയന്റുകളില്‍ XUV700 ലഭ്യമാണ്. ഇതോടൊപ്പം, സുരക്ഷയുടെ കാര്യത്തില്‍ 'സേഫര്‍ ചോയ്സ്' അവാര്‍ഡ് ലഭിക്കുന്ന ഇന്ത്യയിലെ ആദ്യത്തെ കാര്‍ മോഡലാണിത്. പുതിയ കാറിലെ അഡ്വാന്‍സ്ഡ് ഡ്രൈവിംഗ് അസിസ്റ്റന്‍സ് സിസ്റ്റം ഫീച്ചറുകള്‍ പ്രത്യേകം പരീക്ഷിച്ച ഗ്ലോബല്‍ എന്‍സിഎപി, ഇലക്ട്രോണിക് സ്റ്റെബിലിറ്റി കണ്‍ട്രോള്‍, പെഡസ്ട്രിയന്‍ പ്രൊട്ടക്ഷന്‍ ഫീച്ചറുകള്‍ക്ക് 'സേഫര്‍ ചോയ്‌സ്' അവാര്‍ഡ് നല്‍കി.

യാത്രക്കാരുടെ സുരക്ഷയ്ക്കായി നിരവധി സ്റ്റാന്‍ഡേര്‍ഡ് ഫീച്ചറുകള്‍ പുതിയ കാറില്‍ ഉള്‍പെടുത്തിയിട്ടുണ്ട്.

ഗ്ലോബല്‍ NCAP ക്രാഷ് ടെസ്റ്റിംഗില്‍, XUV700 മോഡലിന് മുതിര്‍ന്ന യാത്രക്കാരുടെ സുരക്ഷയ്ക്കായി 17-ല്‍ 16.03 പോയിന്റും കുട്ടികളുടെ സുരക്ഷയ്ക്ക് 49-ല്‍ 41.66 പോയിന്റുമായി പരമാവധി 5 സ്റ്റാര്‍ റേറ്റിംഗും ലഭിച്ചു. 13.18 ലക്ഷം രൂപ മുതല്‍ 24.58 ലക്ഷം രൂപ വരെ വിലയിലാണ് മോഡല്‍ മഹീന്ദ്ര അവതരിപ്പിച്ചത്. എന്നാല്‍ അടുത്തിടെ എസ്‌യുവിയുടെ പെട്രോള്‍, ഡീസല്‍ പതിപ്പുകളുടെ വില കമ്പനി കുറച്ചിരുന്നു. എസ്‌യുവിയുടെ പെട്രോള്‍, ഡീസല്‍ വേരിയന്റുകള്‍ക്ക് 6,000 രൂപ വരെയാണ് കുറഞ്ഞത്.