മോളിവുഡിൽ 'ഹിറ്റ്മാല' തീർക്കുന്ന സംഗീതജ്ഞൻ ഇനി ലക്ഷ്വറി ലുക്കിൽ പറക്കും! BMW X5 സ്വന്തമാക്കി വിഷ്ണു വിജയ്

ഇന്ത്യന്‍ സിനിമക്ക് ഏറ്റവും മികച്ച ടെക്‌നീഷ്യന്‍മാരെ സമ്മാനിച്ച നാടാണ് കേരളം. സമീപകാലത്ത് മോളിവുഡിലെ പശ്ചാത്തല സംഗീത ശൈലി മാറ്റിമറിച്ച പ്രതിഭയാണ് വിഷ്ണു വിജയ്. 'ഗപ്പി' എന്ന ചിത്രത്തിലെ മനോഹരമായ ഗാനങ്ങളിലൂടെ സ്വതന്ത്ര സംഗീത സംവിധായകനായി മാറിയ അദ്ദേഹം, പിന്നീട് 'ഭീഷ്മപര്‍വ്വം', 'തല്ലുമാല', 'സുലൈഖ മന്‍സില്‍', 'പ്രേമലു' തുടങ്ങിയ ഒട്ടനവധി സൂപ്പര്‍ഹിറ്റ് സിനിമകള്‍ക്ക് സംഗീതം നല്‍കി. ഇന്ന് മലയാള സിനിമയിലെ തിരക്കേറിയ യുവ സംഗീത സംവിധായകരില്‍ ഒരാളായ വിഷ്ണു തന്റെ യാത്രകള്‍ കൂടുതല്‍ ആഡംബര പൂര്‍ണമാക്കാന്‍ പുത്തന്‍ ബിഎംഡബ്ല്യു കാര്‍ സ്വന്തമാക്കിയിരിക്കുകയാണ്.

ജര്‍മന്‍ ആഡംബര വാഹന നിര്‍മ്മാതാക്കളുടെ കരുത്തുറ്റ ലക്ഷ്വറി എസ്‌യുവി മോഡലായ പുത്തന്‍ ബിഎംഡബ്ല്യു X5 (BMW X5) ആണ് വിഷ്ണു ഗരാജിലെത്തിച്ചത്. കൊച്ചിയിലെ പ്രമുഖ ബിഎംഡബ്ല്യു ഡീലര്‍ഷിപ്പില്‍ നിന്നാണ് അദ്ദേഹം വാഹനം ഡെലിവറി സ്വീകരിച്ചത്. വിഷ്ണു വിജയ്‌യുടെ പുത്തന്‍ വാഹനത്തിന്റെ ഡെലിവറി വീഡിയോ ആരാധകര്‍ ഇതിനകം തന്നെ ഏറ്റെടുത്തു കഴിഞ്ഞു. ഡെലിവറി വീഡിയോയ്ക്ക് താഴെ നിരവധി സിനിമാ താരങ്ങളാണ് ആശംസകള്‍ നേരുന്നത്.

മികച്ച സംഗീത സംവിധായകന്‍ എന്നതിലുപരി വിഷ്ണു വിജയ് ഇന്ത്യയിലെ തന്നെ പ്രശസ്തനായ ഒരു ഫ്‌ലൂട്ടിസ്റ്റ് (Flautist) കൂടിയാണ്. സ്വതന്ത്ര സംവിധായകനാകുന്നതിന് മുമ്പ് പ്രശസ്ത സംഗീതജ്ഞന്‍ ദീപക് ദേവിന്റെ പ്രധാന അസിസ്റ്റന്റായും, ഓസ്‌കാര്‍ ജേതാവ് എആര്‍ റഹ്‌മാന്റെ വിവിധ പ്രോജക്റ്റുകളില്‍ പുല്ലാങ്കുഴല്‍ വിദഗ്ധനായും അദ്ദേഹം ദീര്‍ഘകാലം പ്രവര്‍ത്തിച്ചിട്ടുണ്ട്.

ശബ്ദങ്ങളുടെ സൂക്ഷ്മ തരംഗങ്ങള്‍ തിരിച്ചറിഞ്ഞ് ഡിജിറ്റല്‍ യുഗത്തിന് അനുയോജ്യമായ രീതിയില്‍ ഓര്‍ക്കസ്‌ട്രേഷന്‍ ചെയ്യുന്നതില്‍ പ്രത്യേക വൈഭവമുള്ള വിഷ്ണുവിന് ഏറ്റവും അനുയോജ്യമായ വാഹനമാണ് ബിഎംഡബ്ല്യു X5 എസ്‌യുവി. ആഡംബരവും മികച്ച റോഡ് പ്രസന്‍സും ഒരേപോലെ ഒത്തിണങ്ങിയ മോഡലാണ് ബിഎംഡബ്ല്യു X5. മനോഹരമായ സിഗ്‌നേച്ചര്‍ കിഡ്‌നി ഗ്രില്ലും, അഡാപ്റ്റീവ് എല്‍ഇഡി ഹെഡ്ലാമ്പുകളും, സ്‌പോര്‍ട്ടി ലുക്ക് നല്‍കുന്ന വലിയ അലോയ് വീലുകളും ഈ ലക്ഷ്വറി എസ്‌യുവിക്ക് വേറിട്ട പ്രൗഢിയും ഗാംഭീര്യവും സമ്മാനിക്കുന്നു.

അകത്തളത്തിലെ ഏറ്റവും പ്രധാന ആകര്‍ഷണങ്ങളില്‍ ഒന്ന് ബിഎംഡബ്ല്യു കര്‍വ്ഡ് ഡിസ്പ്ലേയാണ്. ഇതില്‍ ഡ്രൈവര്‍ക്കായി 12.3 ഇഞ്ച് ഡിജിറ്റല്‍ ഇന്‍സ്ട്രുമെന്റ് ക്ലസ്റ്ററും, ഒപ്പം വിനോദങ്ങള്‍ക്കായി വലിയ 14.9 ഇഞ്ച് ഇന്‍ഫോടെയ്ന്‍മെന്റ് ടച്ച്സ്‌ക്രീനും ക്രമീകരിച്ചിരിക്കുന്നു. ഒരു സംഗീതജ്ഞന് ഏറ്റവും അനുയോജ്യമായ രീതിയില്‍ ഉയര്‍ന്ന നിലവാരം പുലര്‍ത്തുന്ന ഹര്‍മന്‍ കാര്‍ഡന്‍ (Harman Kardon) സറൗണ്ട് സൗണ്ട് സിസ്റ്റമാണ് ഈ എസ്‌യുവിയുടെ ഉള്ളിലുള്ളത്.

കൂടാതെ പനോരമിക് സണ്‍റൂഫ്, ആംബിയന്റ് ലൈറ്റിംഗ്, ഫോര്‍-സോണ്‍ ഓട്ടോമാറ്റിക് ക്ലൈമറ്റ് കണ്‍ട്രോള്‍ തുടങ്ങിയ അത്യാധുനിക പ്രീമിയം ഫീച്ചറുകളും ഇതിലുണ്ട്. മെക്കാനിക്കല്‍ വശങ്ങള്‍ പരിശോധിച്ചാല്‍ പെട്രോള്‍, ഡീസല്‍ എഞ്ചിന്‍ ഓപ്ഷനുകളില്‍ ഈ ആഡംബര വാഹനം വിപണിയില്‍ ലഭ്യമാണ്. 3.0 ലിറ്റര്‍ ഇന്‍ലൈന്‍ 6 സിലിണ്ടര്‍ പെട്രോള്‍ എഞ്ചിനും, അത്രതന്നെ ശേഷിയുള്ള ഡീസല്‍ എഞ്ചിനുമാണ് ഇതിലുള്ളത്.

ഇവ യഥാക്രമം 375 bhp, 282 bhp കരുത്ത് ഉത്പാദിപ്പിക്കുന്നു. തടസമില്ലാത്ത ഗിയര്‍ ഷിഫ്റ്റിംഗിനായി രണ്ട് എഞ്ചിനുകളും 8 സ്പീഡ് സ്റ്റെപ്‌ട്രോണിക് സ്‌പോര്‍ട് ഓട്ടോമാറ്റിക് ഗിയര്‍ബോക്‌സുമായി ബന്ധിപ്പിച്ചിരിക്കുന്നു. ബിഎംഡബ്ല്യുവിന്റെ xഡ്രൈവ് (xDrive) ഓള്‍-വീല്‍ ഡ്രൈവ് സിസ്റ്റമുള്ള ഈ വാഹനം നിലവില്‍ 97 ലക്ഷം രൂപ പ്രാരംഭ എക്‌സ്‌ഷോറൂം വിലയിലാണ് ഇന്ത്യയില്‍ വില്‍ക്കുന്നത്.

ഡ്രൈവ്സ്പാർക്ക് മലയാളം വെബ്‌സൈറ്റ് വാഹന സംബന്ധിയായ വാർത്തകൾ തത്സമയം നിങ്ങളുടെ വിരൽത്തുമ്പിൽ ലഭ്യമാക്കുന്നു. സോഷ്യൽ മീഡിയയിലൂടെ ഞങ്ങൾ വാർത്തകൾ വായനക്കാരുമായി തൽക്ഷണം പങ്കിടുന്നു. ഏറ്റവും പുതിയ കാർ, ബൈക്ക് വാർത്തകൾ, ടെസ്റ്റ് ഡ്രൈവ് റിപ്പോർട്ടുകൾ, വീഡിയോകൾ എന്നിവ ലഭിക്കാൻ ഡ്രൈവ്സ്പാർക്ക് മലയാളത്തിന്റെ ഫെയ്‌സ്ബുക്ക്, ഇൻസ്റ്റഗ്രാം, ടെലഗ്രാം, യൂട്യൂബ് ചാനൽ എന്നിവ മറക്കാതെ ഫോളോ ചെയ്യാം. ഞങ്ങളുടെ ഏതെങ്കിലും വാർത്ത ഇഷ്ടപ്പെട്ടാൽ ലൈക്ക് ചെയ്യാനും കമൻറ് ചെയ്യാനും മറക്കല്ലേ.