'വെൽഡൺ ടാറ്റ വെൽഡൺ', ഫുൾ മാർക്കിന് ടാറ്റയെ പ്രശംസിച്ച് നിതിൻ ഗഡ്കരി പറഞ്ഞതിങ്ങനെ

വാഹനപ്രേമികളുടെ ഇടയിലെ ജനപ്രിയ രാഷ്ട്രീയക്കാരനും ഒരു തികഞ്ഞ വാഹനപ്രേമിയുമാണ് നിതിൻ ഗഡ്കരി. ഇന്ത്യയിലെ ഹൈവേകളെയും ഗതാഗത മേഖലയെയും പരിവർത്തനം ചെയ്യുന്നതിനുള്ള മികച്ച പദ്ധതികൾക്കും പ്രവർത്തനത്തിലും അദ്ദേഹം മുന്നിൽ തന്നെയുണ്ട്. വിദേശ രാജ്യങ്ങളുടെ നിലവാരവുമായി പൊരുത്തപ്പെടാൻ അദ്ദേഹം മുൻകാലങ്ങളിൽ നിരവധി സംരംഭങ്ങൾ നടത്തിയിട്ടുണ്ട്. നിതിൻ ഗഡ്കരി നിലവിൽ കേന്ദ്ര റോഡ് ഗതാഗത, ഹൈവേ മന്ത്രിയാണ്. ഭാരത് എൻസിഎപി ക്രാഷ് ടെസ്റ്റിൽ 5-സ്റ്റാർ റേറ്റിംഗ് നേടിയതിന് ടാറ്റ മോട്ടോഴ്സിനെ അഭിനന്ദിക്കുന്ന ഒരു ചിത്രം അദ്ദേഹം സമൂഹമാധ്യമങ്ങളിൽ പങ്കു വച്ചിരിക്കുന്നത് വൈറലായിരിക്കുകയാണ്.

ഇവികൾക്ക് ഭാരത് എൻസിഎപിയിൽ 5-സ്റ്റാർ റേറ്റിംഗ് നേടിയ രാജ്യത്തെ ആദ്യത്തെ നിർമ്മാതാവായി ടാറ്റ മോട്ടോഴ്‌സ് മാറിയിരിക്കുകയാണ്. "പഞ്ച് ഇവി, നെക്സോൺ ഇവി എന്നിവയ്‌ക്ക് 5-സ്റ്റാർ ഭാരത് NCAP റേറ്റിംഗ് നേടിയതിന് അഭിനന്ദനങ്ങൾ എന്നാണ് അദ്ദേഹം കുറിച്ചത്. ഈ പോസ്റ്റിന് കീഴിൽ, ആളുകൾ ടാറ്റ മോട്ടോഴ്‌സിനെ അഭിനന്ദിക്കുന്ന വൈവിധ്യമാർന്ന അഭിപ്രായങ്ങളും നിർമ്മാതാവ് വാഗ്ദാനം ചെയ്യുന്ന സേവനങ്ങളിൽ തൃപ്‌തിപ്പെടാത്ത ഉപഭോക്താക്കളെയും കാണാൻ കഴിയുന്നുണ്ട്.

ടാറ്റ നെക്‌സോണും പഞ്ച് ഇവിയും ഭാരത് എൻസിഎപിയിൽ പരീക്ഷിച്ച ആദ്യ ഇന്ത്യൻ ഇവികളാണ്, അവ രണ്ടും മികച്ച പ്രകടനമാണ് കാഴ്ചവച്ചിരിക്കുന്നത്. ക്രാഷ് ടെസ്റ്റിൽ ഇരുവരും 5-സ്റ്റാർ റേറ്റിംഗാണ് നേടിയിരിക്കുന്നത്.കഴിഞ്ഞ വർഷമാണ് ഇന്ത്യൻ സർക്കാർ ഭാരത് ന്യൂ കാർ അസസ്‌മെൻ്റ് പ്രോഗ്രാം അല്ലെങ്കിൽ ബി-എൻസിഎപി ആരംഭിച്ചത്. പുതിയ പദ്ധതി പ്രകാരം, കാർ നിർമ്മാതാക്കളും ഇറക്കുമതിക്കാരും സർക്കാർ നിയോഗിച്ച ഏജൻസിക്ക് ഫോം 70-എ അപേക്ഷ സമർപ്പിക്കണം.

ഫ്രണ്ട് ഇംപാക്ട്, സൈഡ് ഇംപാക്ട് ടെസ്റ്റ്, സൈഡ് ഇംപാക്ട് പോൾ ടെസ്റ്റ് എന്നിവയിലൂടെ അവർ കാറിൻ്റെ സുരക്ഷ പരിശോധിക്കും. തുടക്കത്തിൽ, ഇവികൾ ഉൾപ്പെടുത്തിയിരുന്നില്ല; എന്നിരുന്നാലും, അടുത്തിടെ നടത്തിയ പഞ്ച് ഇവി, നെക്‌സോൺ ഇവി ടെസ്റ്റുകൾ ഇപ്പോൾ ഇവികൾ ഉൾപ്പെടുത്തിയിട്ടുണ്ട് എന്ന് അറിയിച്ചിട്ടുണ്ട്. ക്രാഷ് ടെസ്റ്റിലെ പ്രകടനത്തെ ആശ്രയിച്ച്, കാറുകൾക്ക് സ്റ്റാർ റേറ്റിംഗ് നൽകും.

ടാറ്റയുടെ ആദ്യത്തെ ഇലക്ട്രിക് എസ്‌യുവിയാണ് നെക്‌സോൺ ഇവി. കഴിഞ്ഞ വർഷം ഇതിന് ഒരു അപ്ഡേറ്റ് നൽകിയിരുന്നു. അഡൾട്ട് ഒക്യുപൻ്റ് പ്രൊട്ടക്ഷൻ വിഭാഗത്തിൽ 32-ൽ 29.86 പോയിൻ്റും ചൈൽഡ് ഒക്യുപൻ്റ് പ്രൊട്ടക്ഷൻ വിഭാഗത്തിൽ 49-ൽ 44.95 പോയിൻ്റുമാണ് എസ്‌യുവി നേടിയത്. നെക്‌സോൺ ഇവിയിൽ മണിക്കൂറിൽ 64 കി.മീ വേഗതയിൽ ഫ്രണ്ടൽ ഇംപാക്ട് ടെസ്റ്റ് നടത്തിയിരുന്നു.

ചൈൽഡ് സേഫ്റ്റിയിൽ 18 മാസം പ്രായമുള്ള കുട്ടിയുടെ സംരക്ഷണത്തിന്റെ കാര്യത്തിൽ, നെക്സോൺ ഇവി 12 -ൽ 11.95 പോയിൻ്റ് നേടി. അതേസമയം മൂന്നു വയസ്സുള്ള ഒരു കുട്ടിക്ക്, ഇലക്ട്രിക് എസ്‌യുവിക്ക് 12 -ൽ 12 -ഉം എന്ന ഫുൾ സ്‌കോർ തന്നെ ലഭിച്ചു.

ആറ് എയർബാഗുകൾ, ഇലക്ട്രോണിക് സ്റ്റെബിലിറ്റി കൺട്രോൾ (ESC), ബ്രേക്ക് അസിസ്റ്റ്, റിയർ പാർക്കിംഗ് സെൻസറുകളുള്ള റിവേഴ്‌സിംഗ് ക്യാമറ എന്നിങ്ങനെയുള്ള സ്റ്റാൻഡേർഡ് സേപ്റ്റി ടെക്കോടെയാണ് ടാറ്റ പുതിയ ഫെയ്‌സ്‌ലിഫ്റ്റഡ് നെക്‌സോൺ ഇവി പായ്ക്ക് ചെയ്‌തിരിക്കുന്നത്. വാഹനത്തിൻ്റെ ടോപ്പ് സ്പെക്ക് വേരിയൻ്റുകൾക്ക് 360 -ഡിഗ്രി ക്യാമറ, റിയർ ഡിസ്ക് ബ്രേക്കുകൾ, ഫ്രണ്ട് പാർക്കിംഗ് സെൻസറുകൾ, ടയർ പ്രഷർ മോണിറ്ററിംഗ് സിസ്റ്റം (TPMS) എന്നിവയും ലഭിക്കും.

ഏറ്റവും പുതിയ നെക്സോണ്‍ ഇവിയില്‍ നിന്നും ഡിസൈന്‍ സൂചകങ്ങള്‍ കടമെടുത്ത് കൊണ്ട് ആരെയും ആകര്‍ഷിക്കുന്ന ലുക്കിലാണ് പഞ്ച് ഇവി എത്തുന്നത്. മുന്‍വശത്ത് ചാര്‍ജിംഗ് സോക്കറ്റ് ഉള്ള ആദ്യത്തെ ടാറ്റ ഇവി കൂടിയാണ് പഞ്ച്. പഞ്ച് ഇവി രണ്ട് ബാറ്ററി ഓപ്ഷനുകളിലാണ് വരുന്നത്. ചെറിയ 25kWh ബാറ്ററി പായ്ക്കുമായി വരുന്ന മീഡിയം റേഞ്ച് പതിപ്പ് ഒറ്റത്തവണ ചാര്‍ജ് ചെയ്താല്‍ 312 കിലോമീറ്റര്‍ സഞ്ചരിക്കുമെന്നാണ് പറയപ്പെടുന്നത്.

ലോംഗ് റേഞ്ച് പതിപ്പിന് 421 കിലോമീറ്റര്‍ വരെ റേഞ്ച് നല്‍കാന്‍ ശേഷിയുള്ള 35 kWh ബാറ്ററി പായ്ക്കാണുള്ളത്. ലോംഗ് റേഞ്ച് വേരിയന്റുകളില്‍ 122 bhp പവറും 190 Nm ടോര്‍ക്കും പുറപ്പെടുവിക്കുന്ന മോട്ടോര്‍ ആണ് തുടിപ്പേകുന്നത്. സാധാരണ വേരിയന്റുകളില്‍ 81 bhp പവറും 114 Nm പീക്ക് ടോര്‍ക്കും നല്‍കാന്‍ ശേഷിയുള്ള ഇലക്ട്രിക് മോട്ടോറാണ് ഫ്രണ്ട് വീലുകളിലേക്ക് പവര്‍ അയയ്ക്കുന്നത്.