1986-ലെ Royal Enfield Bullet ബില്‍ വൈറല്‍; വില കണ്ട് ഞെട്ടി നെറ്റിസണ്‍സ്

പതിറ്റാണ്ടുകളായി വിവിധ രാജ്യങ്ങളിലുള്ള ആളുകള്‍ റോയല്‍ എന്‍ഫീല്‍ഡ് ബുള്ളറ്റ് 350 വാങ്ങുന്നു. ഇത് ഇന്ന് രാജ്യത്തെ ഏറ്റവും ജനപ്രിയ ബൈക്കുകളിലൊന്നാണ്. ഏറെ കാലമായി നിരത്തില്‍ എത്തിക്കൊണ്ടിരിക്കുന്ന കമ്പനിയുടെ മോഡല്‍ കൂടിയാണിത്. ഐതിഹാസിക ബൈക്ക് എന്ന പേര് സ്വന്തമാക്കിയ മോട്ടോര്‍സൈക്കിളിനെ റോഡുകളില്‍ എളുപ്പത്തില്‍ തിരിച്ചറിയാനാകും എന്നതിനാല്‍ തന്നെ ഇതിന് ഒരു പ്രത്യേക ആരാധകവൃന്ദം ഇതിനുണ്ട്.

റോയല്‍ എന്‍ഫീല്‍ഡ് ക്ലാസിക് 350 വര്‍ഷങ്ങളായി കുറച്ച് സാങ്കേതിക മാറ്റങ്ങള്‍ക്ക് വിധേയമായെങ്കിലും അതിന്റെ രൂപവും ഭാവവും നിലനിര്‍ത്താന്‍ നിര്‍മാതാക്കള്‍ ശ്രമിച്ചു.ഇന്റര്‍നെറ്റില്‍ ഗൃഹാതുരത്വം ഉണര്‍ത്തുന്ന ചിത്രങ്ങള്‍ വൈറലാകാറുണ്ട്. അടുത്തിടെ അത്തരത്തില്‍ വൈറലായത് ഇന്ത്യയിലെ ഏറ്റവും ജനപ്രിയ ബൈക്കുകളിലൊന്നായ റോയല്‍ എന്‍ഫീല്‍ഡ് ബുളളറ്റിന്റെ വില്‍പ്പന ബില്ലിന്റെ ചിത്രമാണ്. 18,700 രൂപയ്ക്ക് വിറ്റ ഒരു എന്‍ഫീല്‍ഡ് ബുള്ളറ്റിന്റെ ഡീലര്‍ഷിപ്പില്‍ നിന്നുള്ള ഒരു ബില്ലാണ് സോഷ്യല്‍ മീഡിയ പ്ലാറ്റ്‌ഫോമായ ഇന്‍സ്റ്റഗ്രാമില്‍ വൈറലായത്.

royalenfield_4567k എന്ന ഹാന്‍ഡ്‌ലില്‍ നിന്നാണ് ചിത്രം സോഷ്യല്‍ മീഡിയ പ്ലാറ്റ്ഫോമില്‍ പങ്കിട്ടത്. 1986 ജനുവരി 23 നാണ് ബുള്ളറ്റ് വാങ്ങിയതെന്ന് ചിത്രം ശ്രദ്ധിച്ചാല്‍ മനസ്സിലാകും. അക്കാലത്ത് കമ്പനിയെ എന്‍ഫീല്‍ഡ് എന്ന് മാത്രമേ വിളിച്ചിരുന്നുള്ളൂ. ആര്‍എസ് എന്‍ജിനീയറിങ് ഇന്‍ഡസ്ട്രീസ് എന്ന പേരിലാണ് ബില്‍ നല്‍കിയത്. അക്കാലത്ത് വ്യാപകമായി ഉപയോഗിച്ചിരുന്ന നൊസ്റ്റാള്‍ജിക് നിറത്തിലാണ് കൈ കൊണ്ട് എഴുതിയ ബില്‍. ഏറ്റവും കൂടുതല്‍ കാലം നിലനിന്നിരുന്ന സ്റ്റാന്‍ഡേര്‍ഡ് ബുള്ളറ്റ് 350 സിസിയാണ് വിറ്റ മോഡല്‍.

ഝാര്‍ഖണ്ഡിലെ ബൊക്കാറോ സ്റ്റീല്‍ സിറ്റിയിലെ കോത്താരി മാര്‍ക്കറ്റില്‍ അക്കാലത്ത് പ്രവര്‍ത്തിച്ചിരുന്ന സന്ദീപ് ഓട്ടോ കമ്പനിയാണ് ഡീലര്‍ഷിപ്പെന്ന് ബില്ലില്‍ പറയുന്നു. ബില്ലിന് മുകളില്‍ ഒറിജിനല്‍ എന്‍ഫീല്‍ഡ് ലോഗോ ഉണ്ടായിരുന്നു. ബില്ലിലെ ഓണ്‍-റോഡ് തുക 18,800 രൂപയായി സൂചിപ്പിച്ചിരുന്നു. എന്നാല്‍ ഡിസ്‌കൗണ്ടോ മറ്റോ നല്‍കിയതിനാല്‍ 250 രൂപ കുറഞ്ഞു. 150 രൂപ കൂടി ചേര്‍ത്തതോടെ അവസാന തുക 18,700 രൂപയായി. നിലവില്‍ സ്റ്റാന്‍ഡേര്‍ഡ് ബുള്ളറ്റ് 350-ന്റെ ഓണ്‍റോഡ് വില ഏകദേശം 1.7 ലക്ഷം രൂപയാണെന്ന് ഓര്‍ക്കണം.

യഥാര്‍ത്ഥ ഇംഗ്ലീഷ് പൈതൃകം പേറുന്ന ചെന്നൈ ആസ്ഥാനമായുള്ള ബൈക്ക് നിര്‍മ്മാതാക്കളായ റോയല്‍ എന്‍ഫീല്‍ഡ് ഇന്നും ഉല്‍പ്പാദനം തുടരുന്ന ഏറ്റവും പഴയ ആഗോള മോട്ടോര്‍സൈക്കിള്‍ ബ്രാന്‍ഡാണ്. ദക്ഷിണേന്ത്യന്‍ നഗരമായ ചെന്നൈയിലാണ് കമ്പനിയുടെ നിര്‍മ്മാണ പ്ലാന്റുകള്‍. ചരിത്രത്തിലെ ഏറ്റവും ദൈര്‍ഘ്യമേറിയ മോട്ടോര്‍ബൈക്ക് ഡിസൈനായ റോയല്‍ എന്‍ഫീല്‍ഡ് ബുള്ളറ്റ് നിര്‍മ്മിച്ചത് ഇംഗ്ലണ്ടിലെ വോര്‍സെസ്റ്റര്‍ഷെയറിലെ റെഡ്ഡിച്ചിലെ എന്‍ഫീല്‍ഡ് സൈക്കിള്‍ കമ്പനിയാണ്. 1901-ല്‍ അവര്‍ ആദ്യത്തെ റോയല്‍ എന്‍ഫീല്‍ഡ് മോട്ടോര്‍സൈക്കിള്‍ നിര്‍മ്മിച്ചു.

ഐഷര്‍ മോട്ടോഴ്സ് ലിമിറ്റഡിന്റെ ഭാഗമായ മദ്രാസ് മോട്ടോര്‍സ് യഥാര്‍ത്ഥ ഇംഗ്ലീഷ് റോയല്‍ എന്‍ഫീല്‍ഡില്‍ നിന്നാണ് ലൈസന്‍സ് നേടിയത്. വൈറല്‍ ചിത്രത്തില്‍ നല്‍കിയിരിക്കുന്ന മോഡല്‍ അതിന്റെ സ്റ്റാന്‍ഡേര്‍ഡ് 350 സിസി ബൈക്കാണ്. ഈ മോട്ടോര്‍സൈക്കിള്‍ അതിന്റെ തുടക്കം മുതല്‍ കമ്പനിയുടെ നിരയില്‍ വളരെ പ്രധാനപ്പെട്ട ഒരു ബൈക്കാണ്. ബ്രിട്ടീഷുകാരില്‍ നിന്ന് ഇന്ത്യക്ക് സ്വാതന്ത്ര്യം ലഭിച്ച ശേഷം പുതിയ ഭരണാധികാരികള്‍ സൈന്യത്തിന് അതിര്‍ത്തിയില്‍ പട്രോളിംഗ് നടത്താന്‍ അനുയോജ്യമായ ഒരു മോട്ടോര്‍ ബൈക്ക് തേടി.

1952-ല്‍ റോയല്‍ എന്‍ഫീല്‍ഡ് ബുള്ളറ്റ് ഈ ദൗത്യത്തിന് ഏറ്റവും അനുയോജ്യമായ മികച്ച മോട്ടോര്‍സൈക്കിളായി നിര്‍ണയിക്കപ്പെട്ടു. 350 സിസി മോഡലുകളില്‍ 800 എണ്ണം സര്‍ക്കാര്‍ 1954-ല്‍ വാങ്ങി. റെഡ്ഡിച്ച് ബിസിനസ്സ് മദ്രാസ് മോട്ടോഴ്സുമായി ചേര്‍ന്ന് 1955-ല്‍ മദ്രാസില്‍ 'എന്‍ഫീല്‍ഡ് ഇന്ത്യ' സൃഷ്ടിച്ചു. ലൈസന്‍സിന് കീഴില്‍ 350 സിസി റോയല്‍ എന്‍ഫീല്‍ഡ് ബുള്ളറ്റ് മോട്ടോര്‍ബൈക്ക് നിര്‍മ്മിച്ചു. ഏഴ് പതിറ്റാണ്ടുകള്‍ക്ക് ശേഷം കമ്പനി ഇപ്പോള്‍ രാജ്യത്തെ ഏറ്റവും വിജയകരമായ ഇരുചക്ര വാഹന ബ്രാന്‍ഡുകളിലൊന്നായി മാറിയിരിക്കുന്നു.

നിലവില്‍ ഇതിന് ഒന്നിലധികം സെഗ്മെന്റുകളില്‍ ഉല്‍പ്പന്നങ്ങള്‍ വിപണിയില്‍ എത്തിക്കുന്നു. മാത്രമല്ല ഭാവിയില്‍ കൂടുതല്‍ മോഡലുകള്‍ വിപണിയില്‍ എത്തിക്കാനുള്ള അണിയറപ്രവര്‍ത്തനങ്ങളിലാണ് റോയല്‍ എന്‍ഫീല്‍ഡ്. ചരിത്രത്തിലാദ്യമായി ലിക്വിഡ് കൂളിംഗ് ഫീച്ചര്‍ ചെയ്യുന്ന പുതിയ 450 സിസി ഡ്യുവല്‍ ഓവര്‍ ഹെഡ് ക്യാംഷാഫ്റ്റ് (DOHC) എഞ്ചിനിലാണ് കമ്പനി ഇപ്പോള്‍ പ്രവര്‍ത്തിക്കുന്നതെന്ന് റിപ്പോര്‍ട്ടുണ്ട്. മിഡ്‌വെയിറ്റ് സെഗ്‌മെന്റ് പിടിച്ചടക്കാന്‍ പുതിയ ഒന്ന് രണ്ട് മാരക ഐറ്റങ്ങള്‍ റോയല്‍ എന്‍ഫീല്‍ഡ് തയാറാക്കുന്നുണ്ട്.