ഇന്ത്യയുടെ ലെവൽ മാറ്റിയ ഇൻഡിക്ക...! രത്തൻ ടാറ്റയുടെ കരിയറിലെ ബെസ്റ്റ് നീക്കങ്ങളിൽ ഒന്ന് ഇതുതന്നെ

ഇന്ത്യയുടെ വാഹന വ്യവസായത്തിലെ മാത്രമല്ല മൊത്തം ബിസിനസ്സ് രംഗത്തെ തന്നെ നവീകരണത്തിൻ്റെയും നേതൃത്വത്തിൻ്റെയും പര്യായമാണ് രത്തൻ ടാറ്റ എന്ന് നിസംശയം പറയാം. ടാറ്റ സൺസിൻ്റെ മുൻ ചെയർമാന് ഒരു മുഖവുരയുടെ ആവശ്യമില്ല, 1937 ഡിസംബർ 28 -ന് ജനിച്ച അദ്ദേഹം ടാറ്റ ഗ്രൂപ്പിനെ ഒരു ആഗോള ശക്തികേന്ദ്രമാക്കി മാറ്റുന്നതിൽ നിർണായക പങ്കുവഹിച്ചു. അദ്ദേഹത്തിൻ്റെ മികവുറ്റ വിജയങ്ങൾക്കും ഒട്ടനവധി നേട്ടങ്ങൾക്കുമിടയിൽ, ടാറ്റ ഇൻഡിക്കയുടെ വികസനം ഇന്ത്യൻ വാഹന ചരിത്രത്തിലെ ഒരു നാഴികക്കല്ലായി ഇന്നും നിലകൊള്ളുന്നു.

ഇനി അല്പം ചരിത്രം ആവാം...ടാറ്റ ഇൻഡിക്കയുടെ കഥ ആരംഭിക്കുന്നത് 1990 -കളുടെ തുടക്കത്തിലാണ്, ഇന്ത്യയിൽ ലിബറൈസേഷനും സാമ്പത്തിക പരിഷ്കരണവും അടയാളപ്പെടുത്തിയ കാലഘട്ടം കൂടെയാണിത് എന്നത് ശ്രദ്ധിക്കണം. കൂടുതൽ തുറന്ന വിപണിയിലേക്കുള്ള സർക്കാരിൻ്റെ മാറ്റവും നയങ്ങളും പുതിയ ആശയങ്ങൾക്കും നൂതനമായ പരിഷ്കരണങ്ങളും വേരോടാൻ വളക്കൂറുള്ള നല്ല ഫലഭൂയിഷ്ഠമായ മണ്ണ് നൽകി എന്നു വേണം പറയാൻ.

ഈ സമയത്ത്, ഇന്ത്യൻ മിഡിൽ ക്ലാസിൻ്റെ ആവശ്യങ്ങൾ നിറവേറ്റുന്ന അതോടൊപ്പം തന്നെ താങ്ങാനാവുന്ന വിലയിൽ വരുന്ന ഒരു കാർ സൃഷ്ടിക്കാനുള്ള അവസരം രത്തൻ ടാറ്റ കണ്ടു. രൂപകൽപനയിലും അടിമുടി നിർമ്മാണത്തിലും പ്രാദേശിക വിപണിക്ക് അനുയോജ്യമായതുമായ ഒരു കാർ വികസിപ്പിക്കുക എന്നതായിരുന്നു അദ്ദേഹത്തിൻ്റെ കാഴ്ചപ്പാടും പദ്ധതിയും.

സാധാരണക്കാരന് താങ്ങാനാവുന്ന വിലയ്ക്ക് ഗുണനിലവാരവും പെർഫോമെൻസും നൽകാൻ കഴിയുന്ന ഒരു പാസഞ്ചർ കാർ നിർമ്മിക്കുക എന്ന പ്ലാനോടെ, 1991 -ൽ രത്തൻ ടാറ്റ വ്യക്തമായ ഉത്തരവോടെ ഈ പദ്ധതി കമ്മീഷൻ ചെയ്തത്. രത്തൻ ടാറ്റയുടെ ഈ സ്വപ്നം സാക്ഷാത്കരിക്കാൻ രാവും പകലും ഇല്ലാതെ അക്ഷീണമായി പ്രയത്നിച്ച എൻജിനീയർമാരുടെയും ഡിസൈനർമാരുടെയും ഒരു സംഘമാണ് പദ്ധതിക്ക് ഈ നേതൃത്വം നൽകിയത്.

ഈ ഘട്ടത്തിൽ ടാറ്റ ഏറ്റെടുത്ത വെല്ലുവിളി വളരെ വലുതായിരുന്നു, ഇന്ന് ഒരുപക്ഷേ നമുക്ക് അത് മനസിലാവില്ല. ഇന്ത്യൻ വാഹന വിപണിയിൽ വളരെ സ്ഥാപിതമായ ഏതാനും കമ്പനികൾ തങ്ങളുടെ വ്യക്തമായ ആധിപത്യം മാർക്കറ്റിൽ അക്കാലത്ത് പുലർത്തിയിരുന്നു, കൂടാതെ ഒരു പ്രാദേശിക കാർ മോഡലിന് ആഗോള ബ്രാൻഡുകളുമായി മത്സരിക്കാൻ കഴിയുമോ എന്നതിൽ വലിയ സംശയമുണ്ടായിരുന്നു.

എന്നിരുന്നാലും, രത്തൻ ടാറ്റയും സംഘവും ഈ വെല്ലുവിളികൾക്കു മുമ്പിൽ തളർന്നില്ല. ഉപഭോക്താക്കളുടെ മുൻഗണനകൾ, ഡ്രൈവിംഗ് കണ്ടീഷനുകൾ, വിപണിയിൽ അക്കാലത്ത് ഉണ്ടായിരുന്ന വിടവുകൾ എന്നിവയെക്കുറിച്ചുള്ള റിപ്പോർട്ടുകളും പ്രതികരണങ്ങളും ശേഖരിച്ച് ഈ ഇൻഡിക്ക ടീം സമഗ്രമായ ഒരു ഗവേഷണ പ്രക്രിയ ആരംഭിച്ചു.

1998 -ൽ, വർഷങ്ങൾ നീണ്ട പരിശ്രമത്തിനൊടുവിൽ ഇൻഡിക്ക ഹാച്ച്ബാക്ക് ടാറ്റ ഔദ്യോഗികമായി പുറത്തിറക്കി. വളരെ വിശാലമായ ഇന്റീരിയറും മികച്ച മൈലേജും കൂടിച്ചേർന്ന് താങ്ങാനാവുന്ന ഒരു പായ്ക്കേജ് എന്ന തരത്തിലാണ് കാർ രൂപകൽപ്പന ചെയ്തിരിക്കുന്നത്, അന്ന് വിപണിയിൽ ഉണ്ടായിരുന്ന അതിൻ്റെ എതിരാളികളേക്കാൾ വളരെ കുറവാണ് വില എന്ന കാര്യവും ശ്രദ്ധിക്കേണ്ടതാണ്.

സാധാരണയിൽ നിന്ന് വ്യത്യസ്‌തമായ രൂപകല്പനയും സവിശേഷതകളും കൊണ്ട് ഇൻഡിക്ക വളരെ പെട്ടെന്ന് തന്നെ ഇന്ത്യൻ ജനയുടെ ശ്രദ്ധ പിടിച്ചുപറ്റുകയും ഹൃദയങ്ങൾ കീഴടക്കുകയും ചെയ്തു. ഇൻഡിക്ക എന്നത് ഒരു കാറിലും ഉപരിയായിരുന്നു; രത്തൻ ടാറ്റയുടെയും ടാറ്റ ഗ്രൂപ്പിൻ്റെയും ഒരു സ്റ്റേറ്റ്മെന്റ് ആയിരുന്നു അത് എന്ന് പറയാം.

ഇത് ഇന്ത്യൻ എഞ്ചിനീയറിംഗ്, അതോടൊപ്പം മാനുഫാക്ച്ചറിംഗ് കഴിവുകളുടെ സാധ്യതകൾ വളരെ വ്യക്തമായി പ്രദർശിപ്പിച്ചു. കാറിന് മികച്ച സ്വീകാര്യത ലഭിച്ചു, കൂടാതെ ഇൻഡിക്ക എന്ന ഈ മോഡലിന്റെ വിജയം ടാറ്റ മോട്ടോർസിന് വാഹന വിപണിയിൽ തങ്ങളുടെ കാൽപ്പാടുകൾ കൂടുതൽ എക്സ്റ്റെന്റ് ചെയ്യാൻ വഴിയൊരുക്കി. തുടർന്നുള്ള വർഷങ്ങളിൽ, കമ്പനി വിവിധ മോഡലുകൾ അവതരിപ്പിക്കുകയും, ആഭ്യന്തര / വിദേശ വിപണികളിൽ തങ്ങളുടെ പ്രശസ്തി കൂടുതൽ ഉറപ്പിച്ചു.

ബിൽഡ് ക്വാളിറ്റി പെർഫോമൻസ് എന്നിവയെ സംബന്ധിച്ച് പ്രാരംഭഘട്ടത്തിൽ ചില വിമർശനങ്ങൾ ഉയർന്നിരുന്നു എങ്കിലും, ടാറ്റ ഇൻഡിക്ക ഇന്ത്യയിലെ ഏറ്റവും കൂടുതൽ വിറ്റഴിക്കപ്പെടുന്ന കാറുകളിലൊന്നായി മാറി എന്നത് നമുക്ക് ഏവർക്കും അറിയാവുന്ന ചരിത്രമാണ്. ഇൻഡിക്കയുടെ വിജയം എന്നത് കേവലം വിൽപ്പന കണക്കുകൾ മാത്രമായിരുന്നില്ല, മറിച്ച് ഇന്ത്യക്കാർ തങ്ങളുടെ സ്വന്തം ഉൽപ്പന്നങ്ങളെ എങ്ങനെ കാണുന്നു എന്നതിലെ മാറ്റത്തെ പ്രതിനിധീകരിക്കുന്ന ഒന്നും കൂടെയായിരുന്നു.