തണുപ്പ് കൊണ്ട് വാഹനം സ്റ്റാർട്ടാകുന്നില്ലേ, ഡോണ്ട് വെറി പിന്നിലെ കാരണം അറിഞ്ഞുവച്ചാൽ ഗുണമുണ്ടേ

ഈ കൊടും ചൂടിൽ തണുപ്പ് കാലത്ത് വാഹനം സ്റ്റാർട്ട് ആകാത്തതിൻ്റെ കാരണം നിങ്ങളുമായി പങ്കു വയ്ക്കുന്നത് വലിയ വിരോധാഭാസം എന്ന് പറയാനേ സാധിക്കു. പക്ഷേ എന്ത് ചെയ്യാൻ വിദേശത്തുളള പ്രിയപ്പെട്ട വായനക്കാരേയും കൂടെ നമ്മൾ പരിഗണിക്കണമല്ലോ. തണുപ്പ് കൂടിയ പ്രദേശങ്ങളിൽ താമസിക്കുന്നവരാണ് ഇത്തരം ബുദ്ധിമുട്ടുകൾ കൂടുതലായി അനുഭവിക്കുന്നത്. രാവിലെ കാറിനടുത്തേക്ക് ചെല്ലുമ്പോൾ മഞ്ഞിൽ മൂടി കിടക്കുന്ന കാഴ്ച്ച സ്ഥിരമാണ്. എഞ്ചിൻ തണുത്ത് മരവിച്ച് കിടക്കുന്നതും, ബാറ്ററി ചാർജ് തീരുന്നതുമാണ് എല്ലാവരും പറയുന്ന പ്രധാന കാരണങ്ങൾ.വിശദമായി തന്നെ ഒന്ന് പരിശോധിക്കാം.

തണുപ്പ് കാലത്ത് നിങ്ങളുടെ ഇന്ധന സംവിധാനത്തിൽ ഈർപ്പം വർദ്ധിക്കും,ചൂട് കാലാവസ്ഥയിൽ നിങ്ങളുടെ ഇന്ധന ലൈനുകളിലോ ഇന്ധന പമ്പിലോ ഉളള വെള്ളം മരവിക്കുന്നത് നമ്മളുടെ ശ്രദ്ധയിൽപ്പെടില്ല. വാഹനം നിങ്ങളുടെ ഗരാജിലാണ് കിടക്കുന്നതെങ്കിൽ നിങ്ങൾക്ക് ഈ പ്രശ്നം നേരിടാനുളള സാഹചര്യം ഉണ്ടാവില്ല. നിങ്ങളുടെ ഇന്ധന ലൈനുകളിൽ തണുത്തുറഞ്ഞ വെള്ളത്തുള്ളികൾ ഉണ്ടാകുന്നത് തടയാൻ, ശീതകാല ഇന്ധനം ഉപയോഗിക്കുകയും, അത് പോലെ തന്നെ ടാങ്ക് നിറച്ച് സൂക്ഷിക്കാനും ശ്രദ്ധിക്കുന്നത് നല്ലതാണ്.

കാരണം ഇന്ധനം കുറവുളളപ്പോൾ ബാഷ്പീകരണം സംഭവിക്കുകയും, ഇന്ധനം ഉറഞ്ഞുപോകാനുളള സാധ്യതകളും വർധിക്കുന്നു. ചില സമയങ്ങളിൽ ആളുകൾ തണുത്ത കാലാവസ്ഥയിൽ അവരുടെ എഞ്ചിനുകളിലേക്ക് ഈതർ സ്പ്രേ ചെയ്യുന്നത് ശ്രദ്ധിച്ചിട്ടുണ്ടാവാം. സോഷ്യൽ മീഡിയയിൽ തണുപ്പുളള രാജ്യങ്ങളിൽ രാവിലെ എങ്ങനെ വാഹനം സ്റ്റാർട്ട് ചെയ്യാം എന്ന് വിശദീകരിക്കുന്ന വീഡിയോകൾ നിങ്ങൾ കണ്ടിട്ടുണ്ടല്ലോ.

അത് പോലെ തന്നെയാണ് ഓയിലിൻ്റെ അവസ്ഥയും. തണുത്ത കാലാവസ്ഥയിൽ എണ്ണയുടെ കട്ടി കൂടും. അത് കൊണ്ട് നിങ്ങൾ ഒരു തണുത്ത എഞ്ചിൻ സ്റ്റാർട്ട് ചെയ്യാൻ ശ്രമിക്കുമ്പോൾ, കാർ എഞ്ചിൻ തണുത്തതും കട്ടി കൂടിയതുമായ എണ്ണയ്ക്ക് ചുറ്റും കറങ്ങാൻ പാടുപെടും, ഇത് എഞ്ചിൻ കറങ്ങുന്നത് ബുദ്ധിമുട്ടാക്കുന്നത് കൊണ്ടാണ് വാഹനം സ്റ്റാർട്ട് ആവാൻ വളരെ പ്രയാസപ്പെടുന്നത്.

ഇത്തരം തണുത്ത സ്ഥലങ്ങളിൽ ആളുകൾ സിന്തറ്റിക് മോട്ടോർ ഓയിലുകൾ ആണ് കൂടുതലായി ഉപയോഗിക്കുന്നത് കാരണം ഈ എണ്ണകൾ തണുത്ത ഊഷ്മാവിൽ ദ്രാവകമായി തുടരാൻ സഹായിക്കും. അതുവഴി നിങ്ങളുടെ വാഹനങ്ങളിലെ ഓയിലിൻ്റെ ഫ്ലോ നിലയ്ക്കാതെ തുടരുകയും ചെയ്യും.ഇതിനോടൊപ്പം തന്നെ തണുത്ത കാലാവസ്ഥയിൽ കാർ ബാറ്ററികൾക്കും പ്രശ്നങ്ങളുണ്ട്. ഇലക്ട്രോണുകൾ ഉൽപ്പാദിപ്പിക്കുന്ന രാസവസ്തുക്കൾ നിറഞ്ഞ ഒരു ക്യാൻ ആണ് ബാറ്ററി.

കാർ ബാറ്ററി തണുത്തതായിരിക്കുമ്പോൾ ബാറ്ററികൾക്കുള്ളിലെ രാസപ്രവർത്തനങ്ങൾ വളരെ സാവധാനത്തിൽ മാത്രമേ നടക്കുകയുളളു, അതിനാൽ ബാറ്ററി കുറച്ച് ഇലക്ട്രോണുകൾ മാത്രം ഉത്പാദിപ്പിക്കുന്നു. അതിനാൽ എഞ്ചിൻ സ്റ്റാർട്ട് ചെയ്യാൻ ശ്രമിക്കുമ്പോൾ കാറിൻ്റെ സ്റ്റാർട്ടർ മോട്ടോറിന് പ്രവർത്തിക്കാനുള്ള ഊർജ്ജം കുറച്ച് മാത്രമേ ലഭിക്കു, ഇത് എഞ്ചിൻ സാവധാനത്തിൽ ക്രാങ്ക് ചെയ്യാൻ കാരണമാകുന്നു.

ചൂടായാലും തണുപ്പായാലും ആളുകൾക്ക് വേണ്ടത് മൈലേജാണ്. തണുപ്പുളള സമയത്തും, അല്ലെങ്കിൽ തണുപ്പ് കൂടുതലുളള രാജ്യത്താണ് നിങ്ങളെങ്കിൽ ശ്രദ്ധിക്കേണ്ട കാര്യങ്ങൾ കൂടി ഒന്ന് അറിഞ്ഞു വയ്ക്കുന്നത് നല്ലതാണ്. വാഹനത്തിൽ അനാവശ്യ ഭാരം വഹിക്കുന്നതും ഇന്ധന ഉപഭോഗം വർധിക്കുന്നതിന് കാരണമാകും. ആവശ്യമില്ലാത്ത കാര്യങ്ങളും ഭാരമുള്ളവ വണ്ടിയിൽ കയറ്റുന്നതുമെല്ലാം ഒഴിവാക്കുന്നതിലൂടെ മികച്ച മൈലേജ് കൈവരിക്കാനാവും.

പലപ്പോഴും അവഗണിക്കപ്പെടുന്നതും എന്നാൽ ഇന്ധനക്ഷമതയുടെ നിർണായകമായ ഒരു വശവുമാണ് ടയറിലെ മർദ്ദം കൃത്യമായ അളവിൽ സൂക്ഷിക്കുക എന്നത്. താപനില കുറയുമ്പോൾ ടയർ മർദ്ദവും കുറയുന്നുണ്ട്. ഇത് ഇന്ധനക്ഷമതയെ ബാധിക്കുന്നു. കമ്പനിയുടെ ശുപാർശകൾ അനുസരിച്ച് എയർ പതിവായി പരിശോധിക്കുകയും പരിപാലിക്കുകയും ചെയ്യുക.