രാമേശ്വരം-ധനുഷ്‌കോടി റൂട്ടിൽ വീണ്ടും ട്രെയിൻ ഇരംമ്പം; പാമ്പൻ പാലം പുനർ നിർമ്മിക്കാനൊരുങ്ങി റെയിൽവേ

നിരവധി സുപ്രധാന റെയിൽവേ പദ്ധതികൾ പൂർത്തിയാക്കി തമിഴ്‌നാട്ടിലെ രാമേശ്വരത്തെയും ധനുഷ്‌കോടിയെയും വീണ്ടും ഒരു ട്രെയിനിനാൽ ബന്ധിപ്പിക്കാൻ സതേൺ റെയിൽവേ ഒരുങ്ങുകയാണ്. മണിക്കൂറിൽ 80 കിലോമീറ്റർ വേഗതയിൽ ട്രെയിനുകൾ ഓടുന്ന ലിഫ്റ്റ് സംവിധാനം ഉപയോഗിച്ചാണ് പാമ്പൻ പാലം ട്രാക്ക് ചെയ്യാൻ റെയിൽവേ പദ്ധതിയിടുന്നത്.

രാമേശ്വരത്തെയും ധനുഷ്‌കോടിയെയും നേരത്തെ റെയിൽവേ ലൈനിലൂടെ ബന്ധിപ്പിച്ചിരുന്നുവെങ്കിലും 1964 -ലെ സുനാമിയിൽ ഈ പാത പൂർണമായി തകരുകയായിരുന്നു. പിന്നീട് ഇത്രയും വർഷമായി ലൈൻ പുനഃസ്ഥാപിക്കാനുള്ള ശ്രമങ്ങളൊന്നും ഇതുവരെ ഉണ്ടായിട്ടില്ല.

ഈ സ്റ്റേഷൻ പുനർവികസിപ്പിച്ച് പുതിയ ബ്രോഡ് ഗേജ്, ഇലക്ട്രിക് ലൈനുകൾ എന്നിവയുമായി ബന്ധിപ്പിക്കാൻ റെയിൽവേ പദ്ധതിയിടുന്നു എന്ന് മധുര ഡിവിഷൻ അസിസ്റ്റന്റ് എക്‌സിക്യൂട്ടീവ് എഞ്ചിനീയർ ആനന്ദ് മാധ്യമങ്ങളോട് പറഞ്ഞു.

രാമേശ്വരത്ത് നിന്ന് 18 കിലോമീറ്റർ ദൈർഘ്യമുള്ള ഈ പാതയിൽ മൂന്ന് ഹാൾട്ടുകളുണ്ടാകും. ഈ വികസനത്തിന് ശേഷം വിനോദസഞ്ചാരികളുടെ എണ്ണം വർധിക്കുമെന്നാണ് പ്രതീക്ഷിക്കുന്നത്. അതോടൊപ്പം തങ്ങൾ രാമേശ്വരം സ്റ്റേഷനും പുനർ വികസിപ്പിക്കാനൊരുങ്ങുകയാണ് എന്ന് അദ്ദേഹം കൂട്ടിച്ചേർത്തു.

പാമ്പൻ പാലം ലിഫ്റ്റ് സംവിധാനം ഉപയോഗിച്ചാണ് പുനർനിർമ്മിക്കുന്നത്, അതിനാൽ ഒരു കപ്പൽ വരുമ്പോൾ അത് ഓട്ടോമാറ്റിക്കായി ഉയരും. നേരത്തെ ഇവിടെ നിർമിച്ച പാലങ്ങൾക്ക് പ്രത്യേക ട്രാക്കുകളുണ്ടായിരുന്നു. കപ്പൽ പുറപ്പെട്ടതിന് ശേഷം, അവർ വീണ്ടും കണക്റ്റുചെയ്യുന്നത് പതിവായിരുന്നു, ഈ മുഴുവൻ പ്രക്രിയയ്ക്കും അരമണിക്കൂറോളം സമയം എടുക്കുമായിരുന്നു. എന്നാൽ വരാനിരിക്കുന്ന പുത്തൻ പ്രക്രിയയ്ക്ക് 10 മിനിറ്റ് മാത്രമേ എടുക്കൂ.

പാമ്പൻ ദ്വീപിന്റെ തെക്കുപടിഞ്ഞാറൻ അറ്റത്താണ് ധനുഷ്കോടി സ്ഥിതി ചെയ്യുന്നത്, പ്രധാന ഭൂപ്രദേശത്ത് നിന്ന് പാക്ക് കടലിടുക്ക് ഇതിനെ വേർതിരിക്കുന്നു. 1964 ഡിസംബർ വരെ തമിഴ്‌നാട്ടിലെ മണ്ഡപം സ്റ്റേഷനുമായി നേരിട്ട് ബന്ധിപ്പിച്ചിരുന്ന ഒരു പ്രമുഖ സ്റ്റേഷനായിരുന്നു ധനുഷ്‌കോടി.

ബോട്ട് മെയിൽ എന്ന പേരിൽ ഒരു ട്രെയിൻ ഈ ഭാഗത്ത് സർവീസ് നടത്തിയിരുന്ന ആ കാലത്ത് ശ്രീലങ്കയും ഇന്ത്യയും തമ്മിലുള്ള ബന്ധത്തിന്റെ ഒരു പ്രധാന പോയിന്റായിരുന്നു ധനുഷ്കോടി സ്റ്റേഷൻ. എന്നിരുന്നാലും, 1964 ഡിസംബറിലെ സുനാമി ഈ റെയിൽപാതയെ പൂർണ്ണമായും തകർത്തു.

700 കോടി രൂപ ചെലവിൽ ഈ പദ്ധതി പൂർത്തീകരിക്കുമെന്നും 18 കിലോമീറ്ററിൽ 13 കിലോമീറ്റർ റെയിൽവേ ട്രാക്ക് ഉയർത്തുമെന്നും ഇന്ത്യൻ റെയിൽവേ അറിയിച്ചു.

വരാനിരിക്കുന്ന പുതിയ പാമ്പൻ പാലത്തെക്കുറിച്ച് നിങ്ങൾ അറിയേണ്ടതെല്ലാം:

പുതിയ പാലത്തിന് 101 തൂണുകൾ ഉണ്ടായിരിക്കും, അതിൽ കപ്പലുകളും സ്റ്റീമറുകളും കടന്നുപോകാൻ അനുവദിക്കുന്നതിന് മധ്യഭാഗം തുറക്കാനും അടയ്ക്കാനും വെർട്ടിക്കൽ ലിഫ്റ്റ് സൗകര്യമുണ്ട്. ഇപ്പോൾ, നിലവിലുള്ള പാലത്തിലെ ഷെർസർ സ്പാൻ കപ്പലുകളെ കട്ടത്തി വിടുന്നതിനായി മാനുവലായി പ്രവർത്തിപ്പിക്കുന്നു, അതേസമയം പുതിയ പാലത്തിൽ ഇലക്ട്രോ-മെക്കാനിക്കൽ കൺട്രോൾ സംവിധാനങ്ങൾ ഉണ്ടായിരിക്കും, അവ ട്രെയിൻ കൺട്രോൾ സംവിധാനങ്ങളുമായി ബന്ധിപ്പിച്ചിരിക്കും.

പഴയ പാമ്പൻ പാലം സ്ഥിതി ചെയ്യുന്നത് ലോകത്തിലെ ഏറ്റവും അപകടകരമായ രണ്ടാമത്തെ കൊറോസ്സീവ് പ്രദേശത്താണ്, അതുകൊണ്ടാണ് പുതിയ പാലം രൂപകൽപ്പന ചെയ്യുമ്പോൾ തുരുമ്പെടുക്കൽ (കൊറോഷൻ) സംബന്ധമായ പ്രശ്നങ്ങളും അനുബന്ധമായ ഉയർന്ന റിപ്പയറിംഗും മെയിന്റനൻസും ചർച്ചാകേന്ദ്രമായത്. പുതിയ പാലത്തിന് ദീർഘായുസ്സ് ഉണ്ടെന്ന് ഉറപ്പുവരുത്തുന്നതിനായി, പുതിയ പാലത്തിന്റെ നാല് ഗർഡറുകൾ നിർമ്മിക്കുന്നതിന് ഡ്യൂപ്ലക്സ് സ്റ്റെയിൻലെസ് സ്റ്റീൽ ഉപയോഗിക്കാൻ റെയിൽവേ തീരുമാനിച്ചു.

പുതിയ പാലത്തിന് 63 മീറ്റർ നീളമുണ്ട്, അത് കപ്പലുകൾക്കും ചെറു വെസലുകൾക്കും അടിയിലൂടെ കടന്നുപോകാൻ അനുവദിക്കുന്നതിന് ഡെക്കിന് സമാന്തരമായി ഉയർത്തും. കപ്പലുകളുടെ ക്രോസ് നാവിഗേഷൻ അനുവദിക്കുന്നതിന് വെർട്ടിക്കൽ ലിഫ്റ്റ് സ്പാൻ സാങ്കേതികവിദ്യ ഇതിന് ഉണ്ടായിരിക്കും. പുതിയ സാങ്കേതികവിദ്യ പാലത്തിന് സമുദ്രനിരപ്പിൽ നിന്ന് 22 മീറ്റർ ഉയരത്തിൽ നാവിഗേഷൻ എയർ ക്ലിയറൻസ് നൽകാൻ അനുവദിക്കും.

പാമ്പൻ ദ്വീപിലെ രാമേശ്വരത്തിനും രാമസേതുവിന്റെ ആരംഭ പോയിന്റായി കണക്കാക്കുന്ന ധനുഷ്കോടിക്കും ഇടയിലുള്ള പുതിയ റെയിൽവേ ലിങ്കും പാലത്തിനൊപ്പം ആസൂത്രണം ചെയ്തിട്ടുണ്ട്. 1964 -ൽ ഒരു ചുഴലിക്കാറ്റ് രാമേശ്വരത്തിനും ധനുഷ്കോടിക്കും ഇടയിലുള്ള റെയിൽപാതയെ തകർത്തു. പതിറ്റാണ്ടുകൾക്ക് ശേഷം ആ ബന്ധം പുനഃസ്ഥാപിക്കാനുള്ള ആദ്യ ശ്രമമായിരിക്കും പുതിയ പാലം. പഴയ പാമ്പൻ റെയിൽ പാലത്തിന് സമാന്തരമായാണ് പുതിയ പാലം നിർമിക്കുന്നത്.

പാലത്തിന് ദീർഘായുസ്സ് ഉണ്ടെന്ന് ഉറപ്പാക്കാൻ നിരവധി പുതിയ സാങ്കേതികവിദ്യകൾ ഉപയോഗിക്കും. ഇതുവരെ, സ്റ്റെയിൻലെസ് സ്റ്റീൽ റീഇൻഫോഴ്സ്മെന്റ്, ലോംഗ്-ലൈഫ് പെയിന്റ്, കോമ്പോസിറ്റ് സ്ലീപ്പറുകൾ എന്നിവ പരിഗണിച്ചിട്ടുണ്ട്. 280 കോടി രൂപ ചെലവിലാണ് 2.07 കിലോമീറ്റർ നീളമുള്ള പുതിയ പാമ്പൻ പാലം നിർമിക്കുന്നത്.