കിടിലൻ മേക്ക് ഓവറുമായി TYPE 1 ഫോർച്ച്യൂണർ; മോഡിഫിക്കേഷൻ വീഡിയോ കാണാം

ഏതൊരു വണ്ടി പ്രേമിയുടേയും ഇഷ്ടവാഹനമാണ് ടൊയോട്ട ഫോർച്ച്യൂണർ. 2009 -ഷ രാജ്യത്ത് അവതരിപ്പിച്ചത് മുതൽ വിൽപ്പനയുടെ കാര്യത്തിൽ ഒരിക്കലും പിന്നിലേക്ക് പോയിട്ടില്ല എന്നതാണ് പ്രത്യേകത. ഇത്ര വർഷം കഴിഞ്ഞിട്ടും ആദ്യ മോഡലായ ടൈപ്പ് 1 -ന് ഇപ്പോഴും ആളുകളുണ്ട്. ഈ മോഡലുകൾ സ്വന്തമായിട്ടുളളവർ ആഫ്റ്റർ മാർക്കറ്റ് ബോഡി കിറ്റുകൾ ഉപയോഗിച്ച് പുത്തൻ മോഡൽ പോലെ ആക്കുന്നത് ഇപ്പോൾ ട്രെൻഡായി മാറിക്കൊണ്ടിരിക്കുകയാണ്.

അത്തരത്തിലുളള ഒരു വീഡിയോ ആണ് ഇപ്പോൾ സോഷ്യൽ മീഡിയയിലും ഇൻ്റർനെറ്റിലും വൈറലായിരിക്കുന്നത്. ടൈപ്പ് 1 ടൊയോട്ട ഫോർച്യൂണറിനെ 55 ലക്ഷം രൂപയുടെ ലെജൻഡറാക്കി മാറ്റുന്നതിന്റെ ഈ പ്രത്യേക വീഡിയോ രാജ്യത്തെ ഏറ്റവും ജനപ്രിയമായ ബോഡി ഷോപ്പുകളിലൊന്നാണ് ഓട്ടോറൗണ്ടേഴ്‌സ് ആണ് പങ്കിട്ടത്. ഇന്ത്യയിലെ ജനപ്രിയവും ആഡംബരപരവുമായ കാറുകൾക്കായുള്ള പരിവർത്തനങ്ങൾ, ഫുൾ ബോഡി റീപെയിന്റുകൾ, ഇന്റീരിയർ കസ്റ്റമൈസേഷൻ, മെക്കാനിക്കൽ ജോലികൾ എന്നിവയിൽ ഇവർ മുന്നിലാണ്.

ഈ വീഡിയോയിൽ, കടയുടെ ഉടമ ആദ്യം ടൈപ്പ് 1 ഫോർച്യൂണറിനെ അതിന്റെ മുമ്പത്തെ അവസ്ഥയിൽ കാണിക്കുന്നുണ്ട്. എസ്‌യുവിയുടെ ഈ മോഡലിന്, അവർ നിരവധി തരം മോഡിഫിക്കേഷൻ വാഗ്ദാനം ചെയ്യുന്നുവെന്ന് പറയുന്നുണ്ട്. ഉപഭോക്താക്കൾക്ക് ഒന്നുകിൽ റീഡിസൈൻ, ടൈപ്പ് 2 കൺവേർഷൻ, ലെക്സസ് കിറ്റ് കൺവേർഷൻ ഉള്ള ടൈപ്പ് 2, ലെജൻഡർ, അവരുടെ ഇൻ-ഹൗസ് സ്പാർട്ടൻ കിറ്റ് എന്നിവയും തെരഞ്ഞെടുക്കാം.

മുൻ ബമ്പർ, ബോണറ്റ്, ഹെഡ്‌ലൈറ്റുകൾ, ഫെൻഡറുകൾ, ഗ്രിൽ എന്നിവ മാറ്റിസ്ഥാപിക്കുന്നുണ്ട്. ഇതിനുപുറമെ, അവർ ഒരു പുതിയ റിയർ ഡെക്ക്ലിഡ്, ലെജൻഡർ ടെയിൽലൈറ്റുകൾ, കൂടാതെ പുറത്ത് മറ്റ് ചില മോഡിഫിക്കേഷൻ വരുത്തും. ഈ ഫോർച്യൂണർ ടൈപ്പ് 1 ന്റെ ഇന്റീരിയർ പൂർണ്ണമായും കസ്റ്റമൈസ് ചെയ്തിരിക്കുകയാണ്.

കാർ ഡിസ്അസംബ്ലിംഗ് ചെയ്യുന്നതും ബോഡി വർക്കിന് തയ്യാറെടുക്കുന്നതും കാണിക്കുന്നു. കാറിന്റെ സി-പില്ലർ മുഴുവൻ ഒരു ലെജൻഡർ ആണെന്ന് തോന്നിപ്പിക്കാൻ അവർ മാറ്റാത്തതിനാൽ ഈ മാറ്റം ഒരു ഹാഫ് ലെജൻഡർ ആണെന്നേ പറയാൻ സാധിക്കു എന്നാണ് വീഡിയോയിൽ പറയുന്നത്. പെട്രോൾ, ഡീസൽ എഞ്ചിൻ ഓപ്ഷനോടെയെത്തുന്ന ഈ ഫുൾ-സൈസ് എസ്‌യുവിക്ക് 32.99 ലക്ഷം രൂപ മുതൽ 50.74 ലക്ഷം രൂപ വരെയാണ് എക്സ്ഷോറൂം വില വരുന്നത്.

2021-ലാണ് ഇന്ത്യയിൽ ഫോർച്യൂണറിന്റെ ഏറ്റവും പുതിയ ആവർത്തനം പുറത്തിറങ്ങുന്നത്. ഇന്നും സെഗ്മെന്റിൽ ഏറ്റവും കൂടുതൽ വിറ്റഴിക്കുന്ന ഫുൾ-സൈസ് എസ്‌യുവിയാണ് ടൊയോട്ടയുടെ ഈ പുലിക്കുട്ടൻ. ഇന്നും കാലഹരണപ്പെട്ടിട്ടില്ലാത്ത ഡിസൈനിലാണുള്ളതെങ്കിലും അധികം വൈകാതെ വാഹനത്തിന് ഒരു പുതുതലമുറ മോഡൽ ലഭിക്കും.

ക്രോം ആക്സന്റുകളോട് കൂടിയ വേറിട്ട ഗ്രില്ലാണ് ഫോർച്യൂണറിന്റെ മുൻവശത്തെ അഴക്. സുഗമമായ എൽഇഡി ഹെഡ്‌ലൈറ്റുകളും ഫോഗ് ലൈറ്റുകളും മുൻവശത്തെ ഫാസിയയിലേക്ക് തടസമില്ലാതെ സമന്വയിപ്പിക്കുന്നതും ആകർഷകമാണ്. വശക്കാഴ്ച്ചയിലേക്ക് വന്നാൽ ഫോർച്യൂണറിന്റെ നീളമേറിയ പ്രൊഫൈൽ, സ്‌കൂപ്പിംഗ് റൂഫ്‌ലൈൻ എന്നിവ ഒരു എയറോഡൈനാമിക് രൂപം സൃഷ്ടിക്കുന്നു. ഇന്റർഗ്രേറ്റഡ് റൂഫ് റെയിലുകൾ എസ്‌യുവിയുടെ പ്രവർത്തനക്ഷമത ഉയർത്തുന്നുമുണ്ട്.

സ്റ്റൈലിഷായ 6 സ്‌പോക്ക് അലോയ് വീലും ബോഡിയിലേക്കും ഹാച്ച്‌ഡോറിലേക്കും നീളുന്ന എല്‍ഇഡി ടെയിൽലാമ്പും ഫോർച്യൂണറിന്റെ ഹൈലൈറ്റുകളാണ്. പിൻ സ്‌പോയിലറിന് ക്രോം ആക്‌സന്റുകൾ സമ്മാനിച്ചിരിക്കുന്നത് പ്രീമിയം ഫീൽ ഉയർത്തുന്ന കാര്യമാണ്. ഫുൾ-സൈസ് എസ്‌യുവിയായതിനാൽ തന്നെ മുടക്കുന്ന കാശിനുള്ള ഫീച്ചർ സംവിധാനങ്ങളെല്ലാം ടൊയോട്ട ഫോർച്യൂണറിൽ ഒരുക്കിയിട്ടുണ്ട്.

ടച്ച്‌സ്‌ക്രീൻ ഇൻഫോടെയ്ൻമെന്റ് ഡിസ്‌പ്ലേ, കീലെസ് എൻട്രി, പുഷ്-ബട്ടൺ സ്റ്റാർട്ട്, ഓട്ടോമാറ്റിക് ക്ലൈമറ്റ് കൺട്രോൾ, എൽഇഡി ലൈറ്റിംഗ്, പ്രീമിയം അപ്‌ഹോൾസ്റ്ററി, ആംബിയന്റ് ലൈറ്റിങ്ങ്, വയര്‍ലെസ് ചാര്‍ജിംഗ്, വെന്റിലേറ്റഡ് സീറ്റ്, മള്‍ട്ടി ഫങ്ഷന്‍ സ്റ്റിയറിങ്ങ് വീല്‍, 360 ഡിഗ്രി സറൗണ്ട് വ്യൂ ക്യാമറ, ഓട്ടോമാറ്റിക് ബൂട്ട് ഓപ്പണര്‍ തുടങ്ങിയ ആധുനിക ഫീച്ചറുകളും ഫോർച്യൂണറിന്റെ സവിശേഷതകളാണ്.

ഇനി എഞ്ചിൻ ഓപ്ഷനിലേക്ക് വന്നാൽ 2.7 ലീറ്റർ, 4 സിലിണ്ടർ പെട്രോൾ എഞ്ചിൻ അല്ലെങ്കിൽ 2.8 ലിറ്റർ, 4 സിലിണ്ടർ ഡീസൽ എഞ്ചിൻ എന്നിവയിലാണ് ടൊയോട്ട ഫോർച്യൂണർ വരുന്നത്. എസ്‌യുവിയുടെ പെട്രോൾ എഞ്ചിന് 163.6 bhp കരുത്തിൽ പരമാവധി 245 Nm torque വരെ ഉത്പാദിപ്പിക്കാനാവും. മറുവശത്ത് ഡീസലിന് 201.15 bhp പവറിൽ 420 Nm torque നൽകാനാവും.