KTM 390 അഡ്വഞ്ചറില്‍ ചുറ്റിയത് 46 രാജ്യങ്ങള്‍! തിരിച്ചെത്തി നേരെ പോയി വാങ്ങിയത് അതേ ബൈക്ക്

ലോകോത്തര മോട്ടോര്‍സൈക്കിള്‍ ബ്രാന്‍ഡ് ആയ കെടിഎമ്മിന്റെ ബൈക്കുകള്‍ക്ക് ഇന്ത്യയില്‍ നല്ല പ്രചാരമുണ്ട്. കമ്പനിയുടെ ഇന്ത്യയിലെ പ്രവര്‍ത്തനങ്ങള്‍ നിയന്ത്രിക്കുന്നത് ബജാജ് ഓട്ടോ ആയതിനാല്‍ തന്നെ ടീം ഓറഞ്ച് അതിവേഗം പടര്‍ന്ന് പന്തലിക്കുകയാണ്. കെടിഎമ്മിന്റെ ഏറ്റവും ജനപ്രിയമായ മോട്ടോര്‍സൈക്കിളുകളില്‍ ഒന്നാണ് കെടിഎം 390 അഡ്വഞ്ചര്‍. ഇപ്പോള്‍ ഒരു യുവാവ് രണ്ടാമതും കെടിഎം 390 അഡ്വഞ്ചര്‍ മോട്ടോര്‍സൈക്കിള്‍ വാങ്ങിയതാണ് സോഷ്യല്‍ മീഡിയയില്‍ ശ്രദ്ധിക്കപ്പെടുന്നത്. ഒരു ബൈക്ക് ഇഷ്ടപ്പെട്ടാല്‍ ചിലര്‍ അതേ മോഡല്‍ തന്നെ രണ്ടാമതും വാങ്ങും, അതില്‍ എന്താണ് ഇത്ര പുതുമ എന്ന് ചിന്തിക്കാന്‍ വരട്ടെ.

ഇവിടെ ബൈക്ക് വാങ്ങിയ കക്ഷി 390 അഡ്വഞ്ചറില്‍ 46 രാജ്യങ്ങളില്‍ ചുറ്റി സഞ്ചരിച്ചിട്ടുണ്ട്. ട്രാവല്‍ വേ്‌ലാഗറായ അങ്കിത് ലാംബയാണ് ഒരേ ബൈക്ക് തന്നെ രണ്ടാമതും വാങ്ങിയത്. ബൈക്ക് യാത്രകള്‍ ഇഷ്ടപ്പെടുകയും സോഷ്യല്‍ മീഡിയയില്‍ അവയെക്കുറിച്ച് പോസ്റ്റുകള്‍ ഇടുകയും ചെയ്യുന്ന അങ്കിത് ലാംബ തന്റെ കെടിഎം അഡ്വഞ്ചര്‍ ബൈക്കില്‍ ഇതിനോടകം 46 രാജ്യങ്ങള്‍ സന്ദര്‍ശിച്ചു. 1.17 ലക്ഷം കിലോമീറ്ററാണ് ഈ ബൈക്കില്‍ അദ്ദേഹം കവര്‍ ചെയ്തത്.

തന്റെ കെടിഎം 390 അഡ്വഞ്ചര്‍ ബൈക്കില്‍ ഈ അസാധ്യമായ ബൈക്ക് യാത്ര നടത്തിയ അങ്കിത് ഇപ്പോള്‍, ആ 390 അഡ്വഞ്ചര്‍ ബൈക്കിന് പകരമായി മറ്റൊരു പുതിയ കെടിഎം 390 അഡ്വഞ്ചര്‍ ബൈക്ക് വാങ്ങി. അമ്മയ്ക്കും അച്ഛനുമൊപ്പം കെടിഎം ഷോറൂമില്‍ പോയി പുതിയ 390 അഡ്വഞ്ചര്‍ ബൈക്ക് ഡെലിവറി ചെയ്യുന്നതിന്റെ ചിത്രങ്ങള്‍ അദ്ദേഹം തന്റെ ഇന്‍സ്റ്റാഗ്രാമില്‍ പോസ്റ്റ് ചെയ്തിട്ടുണ്ട്.

ഈ ചിത്രങ്ങളില്‍, പുതിയ കെടിഎം 390 അഡ്വഞ്ചര്‍ ബൈക്കിന്റെ ഡ്രൈവര്‍ സീറ്റില്‍ അച്ഛന്‍ ഇരിക്കുന്നതും പിന്നില്‍ അങ്കിത് ലാംബ ഇരിക്കുന്നതും കാണാം. പുതിയ 390 അഡ്വഞ്ചര്‍ ബൈക്ക് തനിക്ക് വളരെ അനുയോജ്യമാകുമെന്ന് പറയുന്ന അങ്കിത് ലാംബ, ഈ ബൈക്കിന് 30 കിലോമീറ്റര്‍ മൈലേജ് ഉണ്ടെന്നും വര്‍ഷങ്ങളോളം ഓടിക്കാന്‍ കഴിയുമെന്നും പറഞ്ഞു. തനിക്ക് ഏറെ പ്രിയപ്പെട്ട ബൈക്കിന് യാത്രകളില്‍ സൗകര്യപ്രദമായ ക്രൂയിസ് കണ്‍ട്രോള്‍ ഫീച്ചര്‍ ഉണ്ടെന്ന കാര്യവും അങ്കിത് ലാംബ എടുത്തുപറയുന്നു.

പഴയ കെടിഎം 390 അഡ്വഞ്ചര്‍ ബൈക്കില്‍ ക്രൂയിസ് കണ്‍ട്രോള്‍ നല്‍കിയിരുന്നില്ല എന്നത് ശ്രദ്ധേയമാണ്.ഷോറൂമില്‍ നിന്ന് ഡെലിവറിയെടുത്ത ശേഷം മാതാപിതാക്കള്‍ക്കൊപ്പം നേരെ ക്ഷേത്രത്തിലേക്കാണ് ബൈക്ക് കൊണ്ടുപോയത്. പഴയ 390 അഡ്വഞ്ചര്‍ ബൈക്കില്‍ നടത്തിയ യാത്രയുടെ അത്ര ദൈര്‍ഘ്യമേറിയതല്ലെങ്കിലും, പുതിയ 390 അഡ്വഞ്ചര്‍ ബൈക്കില്‍ ഇന്ത്യയിലുടനീളം 25,000 കിലോമീറ്റര്‍ സഞ്ചരിക്കുമെന്ന് വ്‌ലോഗര്‍ അങ്കിത് ലാംബ പറഞ്ഞു.

അങ്കിത് തന്റെ പഴയ ബൈക്കിന് 'ചാര്‍ലി' എന്നായിരുന്നു പേരിട്ടിരുന്നത്. പുതിയ 390 അഡ്വഞ്ചര്‍ ബൈക്കിന് 'ചേസര്‍' എന്നാണ് പേര് നല്‍കിയിരിക്കുന്നത്. ഈ വര്‍ഷം ഫെബ്രുവരിയിലാണ് കെടിഎം പുതിയ 390 അഡ്വഞ്ചര്‍ ബൈക്ക് പുറത്തിറക്കിയത്. 2025 കെടിഎം 390 അഡ്വഞ്ചര്‍ X, അഡ്വഞ്ചര്‍ എന്നീ രണ്ട് വേരിയന്റുകളിലാണ് എത്തുന്നത്. സ്റ്റാന്‍ഡേര്‍ഡ് വേരിയന്റിന് 3.68 ലക്ഷവും അഡ്വഞ്ചര്‍ X-ന് 3.03 ലക്ഷം രൂപയുമാണ് വില (എക്സ്-ഷോറൂം).

കൂടുതല്‍ ഹാര്‍ഡ്കോര്‍ അഡ്വഞ്ചര്‍ ടൂററായി മാറിയ പുതിയ 390 ADV മിക്കവാറും എല്ലാ മേഖലകളിലും അതിന്റെ മുന്‍ഗാമികളില്‍ നിന്ന് വ്യത്യസ്തമാണ്. പുതിയ സ്റ്റീല്‍-ട്രെല്ലിസ് ഫ്രെയിമും പുതിയ റിയര്‍ സബ്ഫ്രെയിമും ബൈക്കിന് ലഭിക്കുന്നു. മുന്‍വശത്ത് 43 mm WP അപെക്സ് യുഎസ്ഡി ഫോര്‍ക്കുകളും പിന്നില്‍ ഓഫ്സെറ്റ്-മൗണ്ടഡ് മോണോഷോക്കും സസ്പെന്‍ഷന്‍ ചുമതല നിര്‍വഹിക്കുന്നു. രണ്ടും പൂര്‍ണമായും ക്രമീകരിക്കാവുന്നതാണ്.

അപ്പോളോ ട്രാംപ്ലര്‍ ഡ്യുവല്‍-പര്‍പ്പസ് ടയറുകളില്‍ പൊതിഞ്ഞ 21 ഇഞ്ച് ഫ്രണ്ട്, 17 ഇഞ്ച് റിയര്‍ വയര്‍-സ്പോക്ക്ഡ് വീലുകളിലാണ് ബൈക്ക് ഓടുന്നത്. ടൂറിംഗിനായി ഉദ്ദേശിച്ചുള്ള 17 ഇഞ്ച് അലോയ് വീലുകളാണ് 390 അഡ്വഞ്ചര്‍ X-ന് ലഭിക്കുന്നത്. പഴയ മോഡലുമായി താരതമ്യപ്പെടുത്തുമ്പോള്‍ പുതിയ 390 ADV മെലിഞ്ഞെങ്കിലും ബോഡി വര്‍ക്ക് മികച്ചതാണ്.

കൂടാതെ ഉയരമുള്ള റൈഡര്‍മാര്‍ക്ക് ബൈക്ക് കൂടുതല്‍ അനുയോജ്യമാണ്. ഓഫ്-റോഡ് എബിഎസ്, റൈഡ്-ബൈ-വയര്‍ എന്നിവ 390 അഡ്വഞ്ചര്‍ X-ല്‍ വാഗ്ദാനം ചെയ്യുന്ന ഇലക്ട്രോണിക്‌സ് ലിസ്റ്റില്‍ ഉള്‍പ്പെടുന്നു. അതേസമയം 390 അഡ്വഞ്ചറില്‍, അഡ്വഞ്ചര്‍ എക്‌സിലെ സവിശേഷതകള്‍ക്ക് പുറമേ ക്രൂയിസ് കണ്‍ട്രോള്‍, കോര്‍ണറിംഗ് എബിഎസ്, മൂന്ന് റൈഡ് മോഡുകള്‍, കോര്‍ണറിംഗ് ട്രാക്ഷന്‍ കണ്‍ട്രോള്‍ എന്നിവ ലഭിക്കുന്നു.

മൂന്നാം തലമുറ 390 ഡ്യൂക്കില്‍ വരുന്ന അതേ 399 സിസി, ലിക്വിഡ്-കൂള്‍ഡ്, സിംഗിള്‍-സിലിണ്ടര്‍ മോട്ടോറാണ് പുതിയ കെടിഎം 390 അഡ്വഞ്ചറിന് കരുത്ത് പകരുന്നത് . 6-സ്പീഡ് ഗിയര്‍ബോക്സുമായി ജോടിയാക്കിയ ഈ എഞ്ചിന്‍ 45.3 bhp പവറും 39 Nm പീക്ക് ടോര്‍ക്കും നല്‍കും. സ്ലിപ്പര്‍ അസിസ്റ്റ് ക്ലച്ച്, ക്വിക്ക്ഷിഫ്റ്റര്‍ എന്നിവയും ബൈക്കിലുണ്ട്.