ഓയിൽ ബർണറുകൾക്ക് ഇന്നും ഡിമാൻഡ് ഏറെ; ഡീസൽ പവർട്രെയിനുമായി വരാനിരിക്കുന്ന മാരുതി കാറുകൾ

ഇതര ഫ്യുവൽ ഓപ്ഷനുകളായി സി‌എൻ‌ജി, ഹൈബ്രിഡ് എന്നിവയ്‌ക്കൊപ്പം പെട്രോൾ എഞ്ചിനുകളിലും ശ്രദ്ധ കേന്ദ്രീകരിക്കാനാണ് കമ്പനി ഉദ്ദേശിച്ചിരുന്നത്. എന്നിരുന്നാലും, ഭാവിയിൽ ആവശ്യം ഉയർന്നാൽ ആഭ്യന്തര നിർമാതാക്കൾ ഡീസൽ കാറുകൾ തിരികെ കൊണ്ടുവരുമെന്ന് പുതിയ മാധ്യമ റിപ്പോർട്ടുകൾ അവകാശപ്പെടുന്നു.

മാരുതി സുസുക്കി ബിഎസ് VI അവതാരത്തിൽ 1.5 ലിറ്റർ ഡീസൽ എഞ്ചിൻ വീണ്ടും അവതരിപ്പിക്കുമെന്ന് സമീപകാല റിപ്പോർട്ടുകൾ അവകാശപ്പെടുന്നു. ബിഎസ് IV പതിപ്പിൽ, ഈ എഞ്ചിൻ 94 bhp കരുത്തും 225 Nm torque ഉം ഉത്പാദിപ്പിച്ചിരുന്നു.

ഈ എഞ്ചിൻ ഉൾക്കൊള്ളുന്ന ആദ്യ മോഡൽ 2022 -ന്റെ ആദ്യ പാദത്തിൽ വിപണിയിലെത്തുമെന്ന് അഭ്യൂഹമുണ്ട്. വലിയ മോഡലുകൾക്ക് ഡീസൽ എഞ്ചിൻ നൽകാൻ MSIL പദ്ധതിയിടുന്നതായും ഹാച്ച്ബാക്കുകളും ചെറിയ സെഡാനുകളും ഉൾപ്പെടെയുള്ള ചെറിയ മോഡലുകൾ പെട്രോൾ എഞ്ചിനുകൾക്കൊപ്പം തുടർന്നും വാഗ്ദാനം ചെയ്യുമെന്നും റിപ്പോർട്ടുകൾ വ്യക്തമാക്കുന്നു.

പുതിയ മാരുതി വിറ്റാര ബ്രെസ

2022 -ന്റെ ആദ്യ പാദത്തിൽ വിപണിയിലെത്തുമെന്ന് പ്രതീക്ഷിക്കുന്ന മാരുതി സുസുക്കി അടുത്ത തലമുറ വിറ്റാര ബ്രെസ കോംപാക്ട് എസ്‌യുവിയിലേക്ക് ബി‌എസ്‌ VI കംപ്ലയിന്റ് 1.5 ലിറ്റർ ഡീസൽ എഞ്ചിൻ ചേർക്കാൻ സാധ്യതയുണ്ട്. 2022 ഓട്ടോ എക്‌സ്‌പോയിൽ ഇത് അവതരിപ്പിക്കുമെന്നാണ് അഭ്യൂഹം.

പുതിയ ബ്രെസ സുസുക്കിയുടെ HEARTECT പ്ലാറ്റ്‌ഫോമിലെ പരിഷ്‌ക്കരിച്ച പതിപ്പിനെ അടിസ്ഥാനമാക്കിയുള്ളതായിരിക്കും, ഇത് വിപുലമായ കണക്റ്റിവിറ്റി സവിശേഷതകളും ശക്തമായ ഹൈബ്രിഡ് സിസ്റ്റവും ചേർക്കാൻ MSIL -നെ അനുവദിക്കും.

മാരുതി XL6

മാരുതി സുസുക്കി XL6 ആറ് സീറ്റർ ക്രോസ്ഓവർ-എംപിവി ഡീസൽ എഞ്ചിനൊപ്പം ആദ്യമായി വാഗ്ദാനം ചെയ്യുന്ന ഉൽപ്പന്നമായിരിക്കും. ഹരിയാനയിലെ മനേസറിലെ പവർട്രെയിൻ ഫാക്ടറിയിൽ ഒരു വർഷത്തിലേറെയായി കമ്പനി ഈ എഞ്ചിനിൽ പ്രവർത്തിക്കുന്നുണ്ടെന്നാണ് റിപ്പോർട്ടുകൾ.

ഇത് വരാനിരിക്കുന്ന ഉൽപ്പന്നങ്ങളിലെ ഡീസൽ ഓപ്ഷനുകളുടെ അഭാവം നികത്തും. ഡീസലിൽ പ്രവർത്തിക്കുന്ന മാരുതി XL6 2022 ജനുവരിയിൽ വിപണിയിലെത്തും.

മാരുതി സുസുക്കി സിയാസ്

മാരുതി സുസുക്കി സിയാസിന് ഡീസൽ എഞ്ചിൻ ഓപ്ഷൻ ലഭിക്കാൻ സാധ്യതയുണ്ട്, കാരണം അതിന്റെ നേരിട്ടുള്ള എതിരാളികളായ ഹോണ്ട സിറ്റി, ഹ്യുണ്ടായി വെർണ എന്നിവ ഡീസൽ, പെട്രോൾ എഞ്ചിൻ ഓപ്ഷനുകളിൽ ലഭ്യമാണ്. നിലവിലെ മോഡലിൽ MSIL ഡീസൽ എഞ്ചിൻ ചേർക്കുമോ അതോ അടുത്ത തലമുറ സിയാസാണോ ഡീസൽ ഓപ്ഷനുമായി വരുന്നത് എന്ന് കണ്ടറിയണം.

മാരുതി എർട്ടിഗ

XL6 -ന് സമാനമായി മാരുതി സുസുക്കി എർട്ടിഗയ്ക്കും ബിഎസ് VI കംപ്ലയിന്റ് 1.5 ലിറ്റർ ഡീസൽ എഞ്ചിൻ ലഭിക്കാൻ സാധ്യതയുണ്ട്. എർട്ടിഗ ഡീസൽ ഫ്ലീറ്റ് ഓപ്പറേറ്റർമാർക്ക് വിൽക്കാനാണ് മാരുതി ലക്ഷ്യമിടുന്നത്. എർട്ടിഗ ഡീസൽ 2022 അവസാനത്തോടെ അവതരിപ്പിക്കാൻ സാധ്യതയുണ്ട്.

മാരുതി സുസുക്കി മിഡ്-സൈസ്ഡ് എസ്‌യുവി

മാരുതി സുസുക്കി ടൊയോട്ട കൂട്ടുകെട്ട് പുതിയ എസ്‌യുവി വികസിപ്പിക്കുന്നതിനുള്ള പ്രവർത്തനങ്ങളിലാണ്. മാരുതി സുസുക്കിയുടെ പതിപ്പിന് വ്യത്യസ്ത രൂപകൽപ്പനയും ഇന്റീരിയറും ഉണ്ടാകും; എന്നിരുന്നാലും, രണ്ട് എസ്‌യുവികളും എഞ്ചിനും പ്ലാറ്റ്‌ഫോമും പങ്കിടും.

റിപ്പോർട്ടുകൾ വിശ്വസിക്കാമെങ്കിൽ, ടൊയോട്ടയുടെ DNGA കുറഞ്ഞ ചെലവിലുള്ള മോഡുലാർ പ്ലാറ്റ്‌ഫോമിനെ അടിസ്ഥാനമാക്കിയായിരിക്കും പുതിയ എസ്‌യുവി ഒരുങ്ങുക. ഈ പ്ലാറ്റ്ഫോം നിലവിൽ ടൊയോട്ട റൈസിനും ഡൈഹത്‌സു റോക്കിക്കും അടിവരയിടുന്നു.

ഹ്യുണ്ടായി ക്രെറ്റ, കിയ സെൽറ്റോസ്, സ്കോഡ കുഷാഖ്, VW ടൈഗൂൺ എന്നിവയ്‌ക്കെതിരെയാണ് എസ്‌യുവി സ്ഥാനം പിടിക്കുക. പെട്രോൾ, ഡീസൽ എഞ്ചിൻ ഓപ്ഷനുകൾ ഉപയോഗിച്ചാവും ഇത് വാഗ്ദാനം ചെയ്യുന്നത്.