Click it and Unblock the Notifications
ഫാസ്ടാഗ് ഗ്ലാസില് ഒട്ടിച്ചിട്ടില്ലേ? കാത്തിരിക്കുന്നത് എട്ടിന്റെ പണി
മൂന്ന് വര്ഷം മുമ്പ് അവതരിപ്പിച്ച RFID അടിസ്ഥാനമാക്കിയുള്ള ടോള് പിരിവ് സംവിധാനമാണ് ഫാസ്ടാഗ്. ഇന്ത്യയിലെ ദേശീയ പാതകളിലെ ടോള് പ്ലാസകളിലൂടെ കടന്നുപോകാന് എല്ലാ വാഹനങ്ങള്ക്കും ഫാസ്ടാഗ് നിര്ബന്ധമാണ്. എന്നാല് ഇപ്പോള് നാഷണല് ഹൈവേ അതോറിറ്റി ഓഫ് ഇന്ത്യ (എന്എച്ച്എഐ) ടോള് പിരിവുമായി ബന്ധപ്പെട്ട് പുതിയ മാര്ഗനിര്ദേശങ്ങള് പുറപ്പെടുവിച്ചിട്ടുണ്ട്. ഇത് പ്രധാനമായും വിന്ഡ്സ്ക്രീനില് ഫാസ്ടാഗ് സ്റ്റിക്കര് ഒട്ടിക്കാത്ത വാഹനങ്ങളെയാണ് ഇത് ബാധിക്കുക. ടോള് പ്ലാസകളിലെ കാലതാമസവും തിരക്കും ലഘൂകരിക്കാന് ഇലക്ട്രോണിക് ടോള് പിരിവ് സംവിധാനം സഹായിക്കുന്നില്ലെന്ന പരാതികള്ക്കിടയിലാണ് വാഹനത്തിന്റെ വിന്ഡ്സ്ക്രീനില് ഫാസ്ടാഗ് സ്റ്റിക്കറുകള് പതിക്കാത്തവര്ക്കെതിരെ ഹൈവേ അതോറിറ്റി കര്ശന നടപടി സ്വീകരിക്കുന്നത്.
പലപ്പോഴും ടോള് പ്ലാസകളില് വാഹന ഉടമകള് ഫീസ് അടയ്ക്കാന് ഫാസ്ടാഗ് സ്റ്റിക്കര് ഉയര്ത്തിപ്പിടിച്ച് നില്ക്കുന്നത് പലപ്പോഴും കാണാറുണ്ട്. ശരിയായി പിടിച്ചില്ലെങ്കില് ടോള് ഗേറ്റുകളില് സ്ഥാപിച്ചിട്ടുള്ള ക്യാമറകള്ക്ക് ഫാസ്ടാഗ് റീഡ് ചെയ്യാന് സാധിക്കില്ല. പിന്നീട് ടോള് ചാര്ജ് പിരിക്കാന് ടോള് ബൂത്ത് തൊഴിലാളികള് ഹാന്ഡ്ഗണ് ഉപയോഗിച്ച് അവരെ മാന്വലായി സ്കാന് ചെയ്യേണ്ടിവരും.
ഇത്തരത്തില് വിന്ഡ് സ്ക്രീനില് ഫാസ്ടാഗ് സ്റ്റിക്കര് ഒട്ടിക്കാത്ത വാഹനങ്ങള് ടോള് പ്ലാസകളില് കാലതാമസം വരുത്തുകയും മറ്റുള്ളവര്ക്ക് അസൗകര്യമുണ്ടാക്കുകയും ചെയ്യുന്നുവെന്ന് ഹൈവേ അതോറിറ്റി പറഞ്ഞു. ഇനി മുതല് വിന്ഡ്സ്ക്രീനില് ഒട്ടിച്ച ഫാസ്ടാഗ് ഇല്ലാത്ത വാഹനങ്ങള് ടോള് തുകയുടെ ഇരട്ടിയാണ് നല്കേണ്ടിവരിക. ഇന്ത്യയിലെ ദേശീയ പാതകളിലുടനീളമുള്ള എല്ലാ ടോള് പ്ലാസകളും ഉടന് തന്നെ പുതിയ മാര്ഗനിര്ദ്ദേശം നടപ്പിലാക്കാന് പോകുകയാണ്.
മുന്വശത്തെ വിന്ഡ്ഷീല്ഡില് ഫാസ്ടാഗ് ഘടിപ്പിച്ചില്ലെങ്കില് ഇരട്ടി യൂസര് ഫീ ഈടാക്കാന് എല്ലാ ഉപയോക്തൃ ഫീസ് കളക്ഷന് ഏജന്സികള്ക്കും കണ്സഷനര്മാര്ക്കും വ്യാഴാഴ്ച നല്കിയ അറിയിപ്പില് പറയുന്നു. ടോള് ഗേറ്റുകളിലെ ഗതാഗതം കൂടുതല് സുഗമമാക്കാന് ഈ നീക്കം സഹായിക്കുമെന്നാണ് പ്രതീക്ഷിക്കുന്നത്. വാഹന ഉടമകള് വിന്ഡ്സ്ക്രീനില് ഫാസ്ടാഗ് സ്റ്റിക്കറുകള് ഒട്ടിക്കാതിരിക്കാന് ഒന്നിലധികം കാരണങ്ങള് ഉണ്ട്.
വിന്ഡ്സ്ക്രീനില് സ്റ്റിക്കറുകള് തിങ്ങിനിറഞ്ഞ് നില്ക്കുന്നത് കാണാന് ചില വാഹന ഉടമകള്ക്ക് താല്പര്യമില്ല എന്നതാണ് ഒന്നമത്തെ കാരണം. എന്നാല് മറ്റു ചിലര് വ്യത്യസ്ത വാഹനങ്ങള്ക്കായി ഒന്നിലധികം ഫാസ്ടാഗുകള് ഉപയോഗിക്കുന്നു. ഇത്തരക്കാരെ ലക്ഷ്യമിട്ടാണ് ഇനി മുതല് ഫാസ്ടാഗ് സ്റ്റിക്കര് ഒട്ടിക്കാത്തവരില് നിന്ന് ഇരട്ടി ഫീസ് ഈടാക്കാന് ഹൈവേ അതോറിറ്റി ലക്ഷ്യമിടുന്നത്. ഇത്തരം വാഹനങ്ങളെ കരിമ്പട്ടികയില് പെടുത്താമെന്നും അറിയിച്ചു.
ദേശീയ പാതകളിലെ ടോള് പ്ലാസകളില് ഉപയോക്താക്കള്ക്കുള്ള പുതിയ മാര്ഗനിര്ദ്ദേശം പ്രദര്ശിപ്പിക്കാന് ഹൈവേ അതോറിറ്റി ആവശ്യപ്പെട്ടിട്ടുണ്ട്. വിന്ഡ്സ്ക്രീനില് ഫാസ്ടാഗ് ഘടിപ്പിക്കാത്ത വാഹനങ്ങളുടെ ചിത്രങ്ങള് തുടര്നടപടികള്ക്കായി ടോള് ഗേറ്റുകളില് സ്ഥാപിച്ചിട്ടുള്ള സിസിടിവി ക്യാമറകള് വഴി പകര്ത്തുമെന്നും അധികൃതര് അറിയിച്ചു. ഇന്ത്യയിലെ ദേശീയ പാതകളിലെ ടോള് പ്ലാസകള് അധികം വൈകാതെ അപ്രത്യക്ഷമാകും. ദേശീയ പാതകളിലുടനീളം ജിപിഎസ് അടിസ്ഥാനമാക്കിയുള്ള ടോള് പിരിവ് സാങ്കേതികവിദ്യ ഉടന് നടപ്പിലാക്കാന് കേന്ദ്രം പദ്ധതിയിടുന്നു.
വരാനിരിക്കുന്ന ഗ്ലോബല് നാവിഗേഷന് സാറ്റലൈറ്റ് സിസ്റ്റം (ജിഎന്എസ്എസ്) അടിസ്ഥാനമാക്കിയുള്ള ടോള് പിരിവ് സംവിധാനം ഗതാഗതം സുഗമമാക്കുമെന്ന് മാത്രമല്ല ഹൈവേ അതോറിറ്റിയുടെ വരുമാനം 10,000 കോടി രൂപയെങ്കിലും വര്ധിപ്പിക്കുമെന്നും കേന്ദ്രമന്ത്രി നിതിന് ഗഡ്കരി പറഞ്ഞു. ചില ദേശീയ പാതകളില് ഇതിന്റെ പൈലറ്റ് പ്രെജക്ട് നടന്ന് കൊണ്ടിരിക്കുകയാണ്. തുടക്കത്തില് നിലവിലുള്ള ഫാസ്ടാഗ് മാത്രമുള്ള പാതകള്ക്കൊപ്പം ജിഎന്എസ്എസ് അടിസ്ഥാനമാക്കിയുള്ള ടോള് പിരിവുകള്ക്കായി പ്രത്യേക പാതകള് നിലനിര്ത്തും.
അവസാനം ടോള് ഗേറ്റുകളിലെ എല്ലാ പാതകളും ജിഎന്എസ്എസ് പാതകളാക്കി മാറ്റും. ദേശീയ പാതകളിലെ ടോളുകളില് പ്രവേശിക്കുന്ന വാഹനങ്ങളെ വെര്ച്വല് ടോള് ബൂത്തുകള് വഴിയാണ് ട്രാക്ക് ചെയ്യുക. ഈ വെര്ച്വല് ടോള് ബൂത്തുകളിലൂടെ വാഹനങ്ങള് കടന്നുപോകുമ്പോള് ഉപയോക്താക്കളുടെ ബാങ്ക് അക്കൗണ്ടില് നിന്ന് നേരിട്ട് സഞ്ചരിക്കുന്ന ദൂരത്തെ അടിസ്ഥാനമാക്കി ടോള് ഫീസ് കുറയ്ക്കുകയാണ് ചെയ്യുക. സഞ്ചരിച്ച ദൂരത്തിന് മാത്രം ടോള് നല്കിയാല് മതി എന്നതിനാല് തന്നെ ജനങ്ങള്ക്കും ഇത് ഏറെ ഉപകാരപ്രദമാണ്.
Continue with Google